ବାସୁଦେବପୁର : ବାସୁଦେବପୁର ଥାନା ପଛ ପାଖରେ ଥିବା ଧନେଶ୍ବର ରାଉତଙ୍କ ଘରୁ ଲୁଟ ହୋଇଛି। ବନ୍ଦ ରହିଥିବା ଘରୁ କଳାକନା ବୁଲାଇଛନ୍ତି ଲୁଟେରା। ପାଖାପାଖି ୧୫ ଲକ୍ଷରୁ ଉର୍ଦ୍ଧ ଟଙ୍କାର ସୁନା ଗହଣା ସମେତ କେତେକ ସାମଗ୍ରୀ ଚୋରି କରି ନେଇଛନ୍ତି। ବେଙ୍ଗାଲୁରରେ ଚିକିତ୍ସା ପାଇଁ ଯାଇଥିବା ଶ୍ରୀ ରାଉତ ଘରକୁ ଫେରି ଏଭଳି ଘଟଣା ଜାଣି ଥାନାରେ ଅଭିଯୋଗ କରିଛନ୍ତି।
ସୂଚନାନୁଯାୟୀ, ପ୍ରାତଃ ଭ୍ରମଣରେ ଯାଉଥିବା ବେଳେ ଶ୍ରୀ ରାଉତ ଦୁର୍ଘଟଣାର ଶିକାର ହୋଇଥିଲେ। ଭୁବନେଶ୍ୱରରେ ଚିକିତ୍ସା ପରେ ଅଧିକ ଚିକିତ୍ସା ପାଇଁ ବେଙ୍ଗାଲୁରୁ ଯାଇଥିଲେ। ସେଠାରେ ମେରୁଦଣ୍ଡରେ ଅସ୍ତ୍ରୋପଚାର ପରେ ପୁଅ ପାଖରେ ରହୁଥିଲେ। ଘରର ଦାୟିତ୍ବ ନିଜର ଶଳା ଓ ଷଢୁକୁ ଦେଇଥିଲେ। ସେମାନେ ସକାଳ ଓ ସନ୍ଧ୍ୟାରେ ରାଉତଙ୍କ ଘରେ ବୁଲି ଯାଇଥିଲେ। ଗତ ଦୁଇଦିନ ସେମାନେ ଆଉ ଘରକୁ ଆସିନଥିଲେ। ଏହି ସୁଯୋଗରେ କେହି ଘରର ତାଲା ଭାଙ୍ଗି ଉପର ତଳ ଦୁଇ ମହଲାରୁ ଲୁଟ କରିଥିଲେ। ଆଲମୀରା ଭାଙ୍ଗି ସୁନାରୂପା ଲୁଟି ନେଇଥିଲେ। ଗତ ମଙ୍ଗଳବାର ରାତିରେ ରାଉତ ଦମ୍ପତି ଘରେ ପହଁଚିବା ପରେ ଘରର ଏଭଳି ଘଟଣା ଦେଖି ହତବାକ ହୋଇଥିଲେ। ପୁଲିସ ପ୍ରାଥମିକ ତଦନ୍ତ କରି ଫେରିଛି। ୧୫ ଲକ୍ଷରୁ ଉର୍ଦ୍ଧ ଟଙ୍କାର ସୁନା ଗହଣା ଚୋରି ହୋଇଥିବା ବେଳେ ଅନ୍ୟାନ୍ୟ ଜିନିଷ ଆକଳନ ହୋଇନଥିବା ଶ୍ରୀ ରାଉତ କହିଛନ୍ତି।
