ଦାରିଙ୍ଗିବାଡ଼ି ଆମ୍ବ ଟାକୁଆ ଘଟଣାରେ ଦୁଇ ଅସହାୟ ଶିଶୁଙ୍କୁ ସହଯୋଗର ହାତ ବଢ଼ାଇଲା କିସ୍ ଫାଉଣ୍ଡେସନ୍
ଫୁଲବାଣୀ: କନ୍ଧମାଳ ଜିଲ୍ଲା ଦାରିଙ୍ଗିବାଡ଼ି ବ୍ଲକ୍ ଗଦାପୂର ପଂଚାୟତ ଅନ୍ତର୍ଗତ ମାଣ୍ଡିପଙ୍କା ଗ୍ରାମରେ ଆମ୍ବ ଟାକୁଆ ଖାଇ ଦୁଇ ମୃତ, ଛଅ ଗୁରୁତର ଘଟଣାରେ ଅନୀଲ ପାଟ୍ଟମାଝିଙ୍କ ପତ୍ନୀ ରୁମିତାଙ୍କ ଅକାଳ ମୃତ୍ୟୁ ହୋଇଯାଇଛି । ଫଳରେ ତାଙ୍କର ଅଢ଼େଇ ବର୍ଷର ପୁଅ ଓ ୬ ମାସର ଝିଅ ମାତୃ ସ୍ନେହରୁ ବଞ୍ଚିତ ହୋଇଛନ୍ତି। ସେମାନଙ୍କ ଦୁର୍ଦ୍ଦଶା ସମ୍ପର୍କରେ ଗଣମାଧ୍ୟମରୁ ଜାଣିବା ପରେ କିଟ୍, କିସ୍ ଓ କିସ୍ ଫାଉଣ୍ଡେସନ୍ ପ୍ରତିଷ୍ଠାତା ଡକ୍ଟର ଅଚ୍ୟୁତ ସାମନ୍ତ ସେମାନଙ୍କୁ ସହାୟତାର ହାତ ବଢ଼ାଇଛନ୍ତି। ଦୁଇ ଶିଶୁଙ୍କ ସମ୍ପର୍କରେ ଜାଣିବା ପରେ ସେମାନଙ୍କ ଚଳିବା ପାଇଁ ତୁରନ୍ତ ସେମାନଙ୍କ ବାପା ଅନୀଲଙ୍କୁ କିସ ଫାଉଣ୍ଡେସନର ପ୍ରତିନିଧି ବରୁଣ କୁମାର ସିଂ, ଶିବ ବିଶ୍ଵାଳଙ୍କ ଜରିଆରେ ନଗଦ ୩ ହଜାର ଟଙ୍କା ପ୍ରଦାନ କରିଛନ୍ତି। ସେମାନଙ୍କୁ ୫ବର୍ଷ ବୟସ ହେବା ପର୍ଯ୍ୟନ୍ତ ଏହି ସହାୟତା ରାଶି ବ୍ୟାଙ୍କ ଜରିଆରେ ସେମାନଙ୍କ ନିକଟରେ ପହଞ୍ଚାଇ ଦିଆଯିବ। ୫ବର୍ଷ ବୟସ ହେବାପରେ କିସ୍ ଫାଉଣ୍ଡେସନ୍ ଜରିଆରେ ସେମାନଙ୍କୁ କିସରେ ବିନାଦେୟରେ ପାଠ ପଢ଼ାଇବାର ସମସ୍ତ ବନ୍ଦୋବସ୍ତ କରାଯିବ ବୋଲି ଶ୍ରୀ ସାମନ୍ତ ଘୋଷଣା କରିଛନ୍ତି। ଗୁରୁତ୍ୱପୂର୍ଣ୍ଣ କଥା ହେଉଛି ଜଣେ ଭଲ ଗାୟକ କରିବା ଲକ୍ଷ୍ୟରେ ନିଜ ପୁଅର ନାମ ଏ ଆର୍ ରହମାନ ରଖିଥିବା ରୁମିତାଙ୍କ ସ୍ୱପ୍ନକୁ ସାକାର କରିବା ଦିଗରେ କିସ୍ ଫାଉଣ୍ଡେସନ୍ ନିଶ୍ଚିତ ଭାବେ ପ୍ରୟାସ ଜାରି ରଖିବ ବୋଲି ଶ୍ରୀ ସାମନ୍ତ କହିଛନ୍ତି। ଏହା ସହ ଦୁଇ ଶିଶୁଙ୍କୁ କିସରେ ଉଚ୍ଚଶିକ୍ଷା ସହ ଶିକ୍ଷା ଶେଷରେ ନିଯୁକ୍ତି ବ୍ୟବସ୍ଥା କରାଯିବ। ଏହା ବ୍ୟତୀତ ମାଣ୍ଡିପଙ୍କା ଗ୍ରାମର କିଛି ପିଲା କିସରେ ଏବେ ପାଠ ପଢ଼ୁଛନ୍ତି। ଗ୍ରାମର ଅନ୍ୟ ପିଲାମାନେ ଚାହିଁଲେ ସେମାନେ ମଧ୍ୟ ଆସନ୍ତା ଶିକ୍ଷାବର୍ଷଠାରୁ କିସ୍ରେ ନାମ ଲେଖାଇ ପାଠ ପଢ଼ିପାରିବେ ବୋଲି ଶ୍ରୀ ସାମନ୍ତ ସୂଚନା ଦେଇଛନ୍ତି । ଶ୍ରୀ ସାମନ୍ତ ଓ କିସ୍ ପାଉଣ୍ଡେସନ୍ର ବଦାନ୍ୟତା ପାଇଁ ଅନୀଲ କୃତଜ୍ଞତା ଜଣାଇଥିବା ବେଳେ କିସ୍ ଫାଉଣ୍ଡେସନ୍ର ଏଭଳି କାର୍ଯ୍ୟକୁ ସ୍ଥାନୀୟ ଅଞ୍ଚଳରେ ଭୂୟସୀ ପ୍ରଶଂସା କରାଯାଇଛି।
Comments are closed.