ସମାଜ ଡିଜିଟାଲ ଡେସ୍କ: କଥାରେ ଅଛି ‘ରଖେ ହରି ତ ମାରେ କିଏ’। ଏହାର ସତ୍ୟତା ମଧ୍ୟ ରହିଛି। ଯାହାକୁ ରକ୍ଷା କରିବାକୁ ସ୍ଵୟଂ ଭଗବାନଙ୍କ ଆଶୀର୍ବାଦ ରହିଥିବ ତା’କୁ କିଏ ମାରିବ ? ଏମିତି ଏକ ଲୋମଟାଙ୍କୁରା ଘଟଣା ସାମ୍ନାକୁ ଆସିଛି ଉତ୍ତର ପ୍ରଦେଶରୁ। ଏକ ୨ ମାସର ଶିଶୁର ଜୀବନଯାତ୍ରା ଯେକୌଣସି ବ୍ୟକ୍ତିଙ୍କୁ ଆଶ୍ଚର୍ଯ୍ୟ କରିବ। ଘଟଣାଟି ଏହିପରି…
ଉତ୍ତରପ୍ରଦେଶର ହମିରପୁର ଅଞ୍ଚଳରୁ ଅଗଷ୍ଟ ୨୬ ତାରିଖରେ ଏକ ନବଜାତ ଶିଶୁକୁ ଉଦ୍ଧାର କରାଯାଇଥିଲା। ଜନ୍ମ ପରେ ଶିଶୁଟିକୁ ଏକ ପୋଲ ଉପରୁ କେହି ଫିଙ୍ଗି ଦେଇଥିଲେ। ସୌଭାଗ୍ୟବଶତଃ ପିଲାଟି ସିଧାସଳଖ ତଳେ ନ ପଡ଼ି ଏକ ଗଛରେ ଲାଖି ଯାଇଥିଲା। କିଛି ଲୋକ ପିଲାଟିର ପାଟି ଶୁଣି ତା’କୁ ଉଦ୍ଧାର କରି ହମିରପୁର ଜିଲା ହସ୍ପିଟାଲରେ ଭର୍ତ୍ତି କରିଥିଲେ। ସେତେବେଳେ ପିଲାଟି ଶରୀରରେ ୫୦ରୁ ଅଧିକ କ୍ଷତ ଚିହ୍ନ ଥିଲା। କୌଣସି ପଶୁ ପିଲାଟିକୁ ଆକ୍ରମଣ ମଧ୍ୟ କରିଥିବାରୁ ତାହାର ବି କ୍ଷତ ଚିହ୍ନ ରହିଥିଲା। ପରେ ପିଲାଟିକୁ ଲାଲା ଲଜପତ ରାଏ ଡାକ୍ତଖାନାକୁ ସ୍ଥାନାନ୍ତର କରାଯାଇଥିଲା। ସେଠାରେ ୨ମାସ ଧରି ଚିକିତ୍ସା ଚାଲିବା ପରେ ପିଲାଟି ସୁସ୍ଥ ହୋଇଛି। ଜନ୍ମାଷ୍ଟମୀ ସମୟରେ ପିଲାଟି ଉଦ୍ଧାର ହୋଇ ହସ୍ପିଟାଲ ଆସିଥିବାରୁ ତା’ର ନାଁ ରଖାଯାଇଛି କ୍ରିଷ୍ଣା।
ଡାକ୍ତର ସଞ୍ଜୟ କାଲା କହିଛନ୍ତି, ପିଲାଟି ଆମ ପାଖକୁ ଆସିବା ସମୟରେ ତା’ ଶରୀର ସାରା କ୍ଷତ ଚିହ୍ନ ରହିଥିଲା। ମା’ବାପା ନ ଥିବାରୁ ନର୍ସମାନେ ତା’ର ବହୁତ ଯତ୍ନ ନେଇଥିଲେ। କ୍ଷତ ଚିହ୍ନ ଯୋଗୁ ଶରୀରକୁ ସ୍ପର୍ଶ କରିବା ସମ୍ଭବ ନ ଥିବାରୁ ସେବିକାମାନେ ଦୂରରେ ରହି ତା’ର ଯତ୍ନ ନେଲେ। ନିଜ ସନ୍ତାନ ପରି ତା’ର ଲାଳନ ପାଳନ କଲେ। ସେ କାନ୍ଦିଲେ ତା’କୁ ଲୋରି ଶୁଣାଇ ଶୁଆଉଥିଲେ। ଧୀରେ ଧୀରେ ପିଲାଟି ସହିତ ସବୁ କର୍ମଚାରୀଙ୍କ ଭାବାବେଗ ଯୋଡ଼ି ହୋଇଯାଇଥିଲା। ୬ ସପ୍ତାହ ଧରି ଚିକିତ୍ସା ଚାଲିବା ପରେ ସେ ସମ୍ପୂର୍ଣ୍ଣ ସୁସ୍ଥ ହୋଇଛି। ସେ ଏହି ଘଟଣାକୁ ନିନ୍ଦା କରିଛନ୍ତି। ଜବଜାତକକୁ ଏପରି ଭାବେ ଏକ ପୋଲ ଉପରୁ ଫିଙ୍ଗିଦେବା ଅତ୍ୟନ୍ତ କ୍ରୁର ମାନସିକତା ବୋଲି ସେ କହିଛନ୍ତି। ଯେଉଁମାନେ ଫିଙ୍ଗିଲେ ସେମାନେ ଚାହିଁଥିଲେ ପିଲାକୁ କେଉଁ ମନ୍ଦିର ପାଖରେ ଛାଡ଼ି ଦେଇପାରିଥାଆନ୍ତେ ବୋଲି ଡା. କାଲା କହିଛନ୍ତି।
ପିଲାଟିକୁ ବର୍ତ୍ତମାନ ଏକ ଶିଶୁ ଯତ୍ନ ଅନୁଷ୍ଠାନକୁ ହସ୍ତାନ୍ତର କରାଯାଇଛି। ହସ୍ପିଟାଲ କର୍ମଚାରୀମାନେ ତା’ର ଦୀର୍ଘ ଜୀବନ ଏବଂ ଉଜ୍ଜ୍ବଳ ଭବିଷ୍ୟତ କାମନା କରିଛନ୍ତି।
