କିଶୋର ସନ୍ଥ ଅଭିନବ ଆରୋରାଙ୍କ ପଛରେ ପଡ଼ିଛି ବିଷ୍ଣୋଇ ଗ୍ୟାଙ୍ଗ୍‌, ହତ୍ୟା ଧମକ ପରେ ଦିଆଗଲା ସୁରକ୍ଷା

ସମାଜ ଡିଜିଟାଲ ଡେସ୍କ: କିଶୋର ସନ୍ଥ ତଥା ଆଧ୍ୟାତ୍ମିକ ବକ୍ତା ୧୦ ବର୍ଷୀୟ ଅଭିନବ ଆରୋରାଙ୍କ ସମସ୍ୟା ଥମିବାର ନାଁ ନେଉନାହିଁ। ନିକଟରେ ସ୍ବାମୀ ରାମଭଦ୍ରାଚାର୍ଯ୍ୟ ତାଙ୍କୁ ମଞ୍ଚରୁ ହଟାଇ “ମୂର୍ଖ” କହିବା ପରେ ବିବାଦ ଦେଖାଦେଇଥିଲା। ଏବେ ଅଭିନାବଙ୍କ ପାଇଁ ଉଭା ହୋଇଛି ଆଉ ଏକ ସମସ୍ୟା। ସଲମାନ ଖାନଙ୍କୁ ହତ୍ୟା ଧମକ ଦେଉଥିବା କୁଖ୍ୟାତ ଗ୍ୟାଙ୍ଗଷ୍ଟର ଲରେନ୍ସ ବିଷ୍ଣୋଇ ଗ୍ୟାଙ୍ଗ୍‌ ଏବେ ଅଭିନବ ଆରୋରାଙ୍କ ପଛରେ ପଡ଼ିଛି। ଏହି ଗ୍ୟାଙ୍ଗ୍‌ ପକ୍ଷରୁ ଅଭିନବଙ୍କୁ ହତ୍ୟା ଧମକ ମିଳିଛି।  ଅଭିନବଙ୍କ ମାଆ ଜ୍ୟୋତି ଅରୋରା ଏନେଇ ମଥୁରା କୋତଓ୍ବାଲି ଥାନାରେ ଏତଲା ଦାୟର କରିଛନ୍ତି। ଏତଲା ଆଧାରରେ ପୁଲିସ ତଦନ୍ତ ଚଳାଇଥିବାବେଳେ ଅଭିନବଙ୍କୁ ସୁରକ୍ଷା ଯୋଗାଇ ଦିଆଯାଇଥିବା ଜଣାପଡ଼ିଛି। ଏବେ ବନ୍ଧୁକଧାରୀ ସୁରକ୍ଷାକର୍ମୀ ତାଙ୍କ ସହ ୨୪ ଘଣ୍ଟା ରହିବେ ବୋଲି ଜଣାପଡ଼ିଛି।

ଅଭିନବଙ୍କ ମାଆ ଜ୍ୟୋତି ଅରୋରାଙ୍କ କହିବାନୁଯାୟୀ, ତାଙ୍କ ନିକଟକୁ ରାତିରେ ଏକ ଅଜଣା ନମ୍ବରରୁ ଫୋନ୍‌ ଆସିଥିଲା, ଯାହା ସେ ଉଠାଇ ପାରି ନଥିଲେ। ପରଦିନ ସନ୍ଧ୍ୟାରେ ସେହି ନମ୍ବରରୁ ଏକ ଧମକପୂର୍ଣ୍ଣ ମେସେଜ୍ ଆସିଥିଲା, ଯେଉଁଥିରେ ତାଙ୍କ ପୁଅକୁ ଜୀବନରୁ ମାରିଦେବାକୁ ଧମକ ଦିଆଯାଇଥିଲା। ଲରେନ୍ସ ବିଷ୍ଣୋଇ ଗ୍ୟାଙ୍ଗ୍‌ ନାଁ ନେଇ ଏହି ଧମକ ଦିଆଯାଇଥିବା ସେ କହିଛନ୍ତି।

ସୂଚନାଯୋଗ୍ୟ, ଅଭିନବ ୧୦ ବର୍ଷ ବୟସରେ ହିଁ ଆଧ୍ୟାତ୍ମିକ ଇନ୍‌ଫ୍ଲୁଏନସର ଭାବରେ ଖ୍ୟାତି ଅର୍ଜନ କରିଛନ୍ତି। ସାମାଜିକ ଗଣମାଧ୍ୟମରେ ତାଙ୍କର ୯.୫ ଲକ୍ଷ ଫଲୋୟର୍ସ ଅଛନ୍ତି, ଯେଉଁଠାରେ ସେ ନିୟମିତ ଭାବରେ ଧାର୍ମିକ ପୋଷ୍ଟ କରନ୍ତି। କେନ୍ଦ୍ରମନ୍ତ୍ରୀ ନିତିନ ଗଡ଼କରୀ ତାଙ୍କୁ ଭାରତର ସର୍ବ କନିଷ୍ଠ ଆଧ୍ୟାତ୍ମିକ ବକ୍ତା ଭାବରେ ସମ୍ମାନିତ କରିଛନ୍ତି।