ପାଟଣା : କେନ୍ଦୁଝର ଜିଲା ପାଟଣା ବ୍ଲକ ଅନ୍ତର୍ଗତ ରାଜନଗର ବାଲିଯାତ୍ରାରୁ ଗତ ମଙ୍ଗଳବାର ରାତି ୧୦ଟା ସମୟରେ ଏକ ବାଇକ ଚୋରି ହୋଇଥିବା ନେଇ ବାଇକ ମାଲିକ ସାହାରପଡ଼ା ବ୍ଲକ ଅନ୍ତର୍ଗତ ମହ୍ଲାରପଦା ଗ୍ରାମର ମହେଶ ସିଂହ ତୁରୁମୁଙ୍ଗା ଥାନାରେ ଅଭିଯୋଗ କରିଥିଲେ। ବାଇକ ମାଲିକ ବାଇକକୁ ଫେରି ପାଇବା ପାଇଁ ବିଭିନ୍ନ ଅଞ୍ଚଳରେ ଖୋଜାଖୋଜି କରିବା ପରେ ଗୁରୁବାର ଶୁକୃଳି ବଜାରରୁ ଚୋରି ବାଇକ ଚଳାଉଥିବା ଉକ୍ତ ବାଇକକୁ ପାଇ ଯୁବକକୁ ରରୁଆଁ ପୁଲିସର ଜିମା ଦେଇଥିଲେ ।
ଚୋରି ମାମଲା ତୁରୁମୁଙ୍ଗା ଥାନାରେ ହୋଇଥିବା କାରଣରୁ ରରୁଆଁ ପୁଲିସ ବାଇକ ସହ ଯୁବକକୁ ତୁରୁମୁଙ୍ଗା ପୁଲିସର ଜିମା ଦେଇଛି। ତୁରୁମୁଙ୍ଗା ଥାନା ଏଏସଆଇ ଦେବେନ୍ଦ୍ର ମୁର୍ମୁ ରରୁଆଁ ଥାନାରୁ ବାଇକ ସହ ଯୁବକଙ୍କୁ ନିଜ ହେପାଜତକୁ ଆଣି ତଦନ୍ତ କରୁଥିବାବେଳେ ପ୍ରକୃତରେ ଯୁବକ ଜଣଙ୍କ ବାଇକ ଚୋର କି ନୁହଁ ତାର ତଦନ୍ତ କରି ଗିରଫ କରି କୋର୍ଟ ଚାଲାଣ କରାଯିବ ବୋଲି କହିଛନ୍ତି । ଅଟକ ଥିବା ଯୁବକ ଜଣଙ୍କ ରରୁଆଁ ଥାନା ସୁରୁବାଲି ଗ୍ରାମର ଅମିତ କୁମାର ବେହେରା ଓ ସେ ଜଣେ ୱେବ ସାମ୍ବାଦିକ ବୋଲି ଜଣାପଡ଼ିଛି। ବାଇକ ଚୋରି ନେଇ ତୁରୁମୁଙ୍ଗାରେ ୩୧୨/୨୦୨୪ ମୂଳେ ଏକ ଚୋରି ମାମଲା ରୁଜୁ ହୋଇଛି। ତେବେ ଏନେଇ ବାଇକ ମାଲିକଙ୍କୁ ଯୋଗାଯୋଗ କରାଯିବାରେ ତାଙ୍କ ବାଇକର କିଛି ଲୋନ ନଥିବା ସୂଚନା ଦେଇଛନ୍ତି।
