ସମ୍ବଲପୁର: ସମ୍ବଲପୁର ଜିଲା ରେଙ୍ଗାଲି ଥାନା ଅଞ୍ଚଳରେ ୨୦୨୧ରେ ଘଟିଥିବା ନାବାଳିକା ଦୁଷ୍କର୍ମ ଓ ଅପହରଣ ମାମଲାରେ ଦୋଷୀକୁ ସ୍ୱତନ୍ତ୍ର ପୋକ୍ସୋ ଅଦାଲତ ୨୦ ବର୍ଷ ସଶ୍ରମ କାରାଦଣ୍ଡାଦେଶ ଦେବା ସହିତ ୧ ଲକ୍ଷ ଟଙ୍କା ଜରିମାନା କରିଛନ୍ତି ।
ରେଙ୍ଗାଲି ଥାନାଞ୍ଚଳରେ ପୀଡିତା ନାବାଳିକା (୧୪) ତା ମା’ ଓ ବାପାଙ୍କ ସହିତ ରହୁଥିଲା । ତାଙ୍କର ଘର ନିକଟରେ ଅନୁଗୁଳ ଜିଲା ମୂଳ ନିବାସୀ ଅଭିଯୁକ୍ତ ପାପୁନ ବେହେରା ଏକ ଭଡା ଘରେ ରହୁଥିଲା । ପାପୁନ ସେହି ଅଞ୍ଚଳରେ ଏକ ଘରୋଇ କମ୍ପାନୀରେ କାମ କରୁଥିଲା । ସୁଯୋଗ ଦେଖି ପୀଡିତାଙ୍କୁ ବିବାହ ପ୍ରତିଶ୍ରୁତି ଦେଇ ସେପ୍ଟେମ୍ବର ୨୦୨୧ରେ ଅପହରଣ କରି ନେଇଥିଲା। ଅପହରଣ ପରେ ହାଇଦ୍ରାବାଦକୁ ନେଇ ସେଠାରେ ନାବାଳିକାଙ୍କୁ ବାନ୍ଧି ତା’ ସହିତ ଶାରିରୀକ ସମ୍ପର୍କ ରଖିଥିଲା । ପୀଡିତା କୌଣସି କ୍ରମେ ଘରକୁ ଫୋନ ଯୋଗେ ସମସ୍ତ ଘଟଣା ବିଷୟରେ ସୂଚନା ଦେଇଥିଲେ । ଏ ନେଇ ତାଙ୍କ ମା’ବାପା ରେଙ୍ଗାଲି ଥାନାରେ ଲିଖିତ ଅଭିଯୋଗ କରିଥିଲେ । ପୁଲିସ ଏକ ମାମଲା ରୁଜୁ କରି ନାବାଳିକାଙ୍କୁ ଉଦ୍ଧାର କରିବା ସହିତ ଅଭିଯୁକ୍ତକୁ ଗିରଫ କରିଥିଲା । ୧୪ ଜଣ ସାକ୍ଷୀଙ୍କ ବୟାନ ରେକର୍ଡ ପରେ ବିଚାରପତି ଅଭିଳାଷ ସେନାପତି ଅଭିଯୁକ୍ତକୁ ୨୦ ବର୍ଷ ସଶ୍ରମ କାରାଦଣ୍ଡ ସହିତ ୧ ଲକ୍ଷ ଟଙ୍କାର ଜରିମାନା ଆଦେଶ ଦେଇଥିଲେ। ଜରିମାନା ଅନାଦାୟ ହେଲେ ଆଉ ଏକ ବର୍ଷ ସଶ୍ରମ କାରାଦଣ୍ଡ ଭୋଗିବାକୁ ମାନ୍ୟବର ଅଦାଲତ ନିର୍ଦ୍ଦେଶ ଦେଇଛନ୍ତି । ଏହି ମାମଲାକୁ ସ୍ୱତନ୍ତ୍ର ସରକାରୀ ଓକିଲ ସନ୍ତୋଷ କୁମାର ପଣ୍ଡା ପରିଚାଳନା କରିଥିଲେ।
Comments are closed.