କେନ୍ଦୁଝରଗଡ଼: କେନ୍ଦୁଝର ପୁରୁଣାସହରସ୍ଥିତ ଓଏସ୍ଏପି ବାଟାଲିୟନ ପରିସରରେ ୧୪ ଓଡ଼ିଶା ବାଟାଲିୟନ ଏନ୍ସିସି କେନ୍ଦୁଝରର ବାର୍ଷିକ ତାଲିମ୍ ଶିବିର ଚଳିତମାସ ୧୭ ତାରିଖରୁ ଆରମ୍ଭ ହୋଇଥିବା ବେଳେ ଏହା ଆସନ୍ତା ୨୬ ତାରିଖରେ ଶେଷ ହେବ। ଏହି ଅବସରରେ ମଙ୍ଗଳବାର ଅପରାହ୍ନରେ ଶିବିରର ଏକ ବିଶେଷ ସତ୍ରରେ କେନ୍ଦୁଝର ଆରକ୍ଷୀ ଅଧିକ୍ଷକ ନିତିନ କୁଶଲକର ମୁଖ୍ୟଅତିଥି ଭାବେ ଯୋଗଦେଇ ପ୍ରଶିକ୍ଷାର୍ଥିଙ୍କୁ ସମାଜ ପ୍ରତି ପୁଲିସର କର୍ତ୍ତବ୍ୟ ଓ ନିଷ୍ଠା ସମ୍ବନ୍ଧରେ ଅବଗତ କରିବା ସହିତ ସମୟର ସଦୁପଯୋଗ କରିବା ପାଇଁ କ୍ୟାଡେଟସ୍ ମାନଙ୍କୁ ଉପଦେଶ ଦେଇଥିଲେ। ଏଥିସହ ଅନ୍ଲାଇନ୍ ଗେମ୍ ଏବଂ ସାମାଜିକ ଗଣମାଧ୍ୟମରେ ଅଧିକ ସମୟ ଅତିବାହିତ ନ କରିବାକୁ ପରାମର୍ଶ ଦେଇଥିଲେ। ୧୪ ଓଡ଼ିଶା ବାଟାଲିୟନ ଏନ୍ସିସି କେନ୍ଦୁଝରର କମାଣ୍ଡିଂ ଅଫିସର ଲେଫ୍ଟନାଣ୍ଟ କର୍ଣ୍ଣେଲ ମୟୁର ଘାର୍ଗେଙ୍କ ଅଧ୍ୟକ୍ଷତାରେ ଅନୁଷ୍ଠିତ ଏହି କାର୍ଯ୍ୟକ୍ରମ ପ୍ରାରମ୍ଭରେ ଲେଫ୍ଟନାଣ୍ଟ ଦୀପକ କୁମାର ଗିରି ସ୍ୱାଗତ ଭାଷଣ ସହ ଅତିôତ ପରିଚୟ ପ୍ରଦାନ କରିଥିଲେ। ସୁବେଦାର ମେଜର ଲକ୍ଷ୍ମୀ ନାରାୟଣ ମଞ୍ଚାସୀନ ହୋଇ କ୍ୟାଡେଟସ୍ ମାନଙ୍କୁ ଉତ୍ସାହିତ କରିଥିଲେ। ସେହିପରି ବୁଧବାର ଏହି ତାଲିମ ଶିବିରରେ କେନ୍ଦୁଝର ବନଖଣ୍ଡ ଅଧିକାରୀ ଧନରାଜ ଏଚ.ଡି ମୁଖ୍ୟଅତିଥି ଭାବେ ଯୋଗଦେଇ ପ୍ରଶିକ୍ଷାର୍ଥୀ ମାନଙ୍କୁ ନିଜର ଏନ୍ସିସି ସମୟର ପୂର୍ବ ଅନୁଭୂତି ବର୍ଣ୍ଣନା କରିବା ସହ ସମାଜ ପ୍ରତି କ୍ୟାଡେଟସ୍ ମାନଙ୍କ କର୍ତ୍ତବ୍ୟ, ଉତ୍ତମ ନାଗରିକ ଆଦି ସମ୍ପର୍କରେ ଆଲୋକପାତ କରିଥିଲେ। ଏହି ଶିବିରରେ କେନ୍ଦୁଝର ଏବଂ ମୟୂରଭଞ୍ଜ ଜିଲାର ୫୮୦ଜଣ କ୍ୟାଡେଟସ୍ ପ୍ରଶିକ୍ଷଣ ନେଉଛନ୍ତି। ଶେଷରେ ଲେଫ୍ଟନାଣ୍ଟ ଧର୍ମେନ୍ଦ୍ର କୁମାର ସାହୁ ଧନ୍ୟବାଦ ଅର୍ପଣ କରିଥିଲେ।
Comments are closed.