ନୂଆଦିଲ୍ଲୀ: ମ୍ୟାଁମାର ପଟୁ ଅନୁପ୍ରବେଶ ରୋକିବାକୁ ଭାରତ ସରକାର ୧,୬୪୩ କିଲୋମିଟର ବ୍ୟାପୀ ସୀମାରେ ତାରବାଡ଼ ଘେରାଇବାକୁ ନିଷ୍ପତ୍ତି ନେଇଛନ୍ତି। ଏଥିପାଇଁ ୩୧ ହଜାର କୋଟି ଟଙ୍କା ଖର୍ଚ୍ଚ ହେବ। ବୁଧବାର ବ୍ୟୟ ଅଟକଳକୁ ଭାରତ ସରକାର ମଞ୍ଜୁରୀ ପ୍ରଦାନ କରିଛନ୍ତି। ସୂଚନାଥାଉ କି ଭାରତର ମଣିପୁର, ମିଜୋରାମ, ନାଗାଲାଣ୍ଡ ଓ ଅରୁଣାଚଳ ପ୍ରଦେଶର ସୀମା ମ୍ୟାଁମାରକୁ ଲାଗିଛି। ମ୍ୟାଁମାର ପଟୁ ଭାରତର ବିଭିନ୍ନ ଅଞ୍ଚଳକୁ ଅସ୍ତ୍ରଶସ୍ତ୍ର ଓ ନିଶାଦ୍ରବ୍ୟ ଚୋରାଚାଲାଣ ହେଉଥିବା ବେଳେ ଏହାକୁ ରୋକିବାକୁ ଏହି ନିଷ୍ପତ୍ତି ହୋଇଛି। ମଣିପୁରରେ ଯେଉଁ ହିଂସା ସୃଷ୍ଟି ହୋଇଛି ତାହା ପଛରେ ମ୍ୟାଁମାର ଅନୁପ୍ରବେଶକାରୀ, ଅସ୍ତ୍ରଶସ୍ତ୍ର ଏବଂ ନିଶାଦ୍ରବ୍ୟ ଚୋରାଚାଲାଣର ଭୂମିକା ରହିଥିବା ଭାରତ ତରଫରୁ ଅଭିଯୋଗ ହୋଇଥିଲା। ମଙ୍ଗଳବାର କେନ୍ଦ୍ର ଗୃହମନ୍ତ୍ରୀ ଅମିତ ଶାହା କହିଥିଲେ ଇତିମଧ୍ୟରେ ୩୦ କିଲୋମିଟର ମ୍ୟାଁମାର ସୀମାରେ ତାରବାଡ଼ ଘେରାଇବା କାମ ଶେଷ ହୋଇ ସାରିଛି।
ସୂଚନାଥାଉ କି ଭାରତ-ମ୍ୟାଁମାର ଅବାଧ ଯାତାୟାତ ବ୍ୟବସ୍ଥାକୁ ଭାରତ ସରକାର ରଦ୍ଦ କରି ସାରିଛନ୍ତି। ଏହି ବ୍ୟବସ୍ଥା ଅନୁଯାୟୀ ଉଭୟ ଦେଶର ବାସିନ୍ଦା ବିନା କୌଣସି ବାଧାରେ ପ୍ରତିପକ୍ଷ ଦେଶର ୧୬ କିଲୋମିଟର ପର୍ୟ୍ୟନ୍ତ ଯାତ୍ରା କରି ପାରୁଥିଲେ। ଅନ୍ୟପକ୍ଷରେ ମଣିପୁର ସରକାର ସେଠାକାର ଜନସାଧାରଣଙ୍କୁ ନିତ୍ୟ ବ୍ୟବହାର୍ୟ୍ୟ ଦ୍ରବ୍ୟ ସୁଲଭ ମୂଲ୍ୟରେ ଯୋଗାଇ ଦେବାକୁ ୨୫ଟି ଭ୍ରାମ୍ୟମାଣ ଗାଡ଼ିର ବ୍ୟବସ୍ଥା କରିଛନ୍ତି। ସେହିପରି ମଣିପୁର ସରକାର ଉପତ୍ୟକାରେ ଥିବା ଜିଲାଗୁଡ଼ିକରେ ୧୬ ଓ ପର୍ବତାଞ୍ଚଳରେ ଥିବା ଜିଲାଗୁଡ଼ିକରେ ୮ଟି ନୂଆ ସୁଲଭ କେନ୍ଦ୍ର ଖୋଲିଛନ୍ତି। ଏଠାରେ ନିତ୍ୟ ବ୍ୟବହାର୍ୟ୍ୟ ଜିନିଷ ବିକ୍ରି କରାଯାଉଛି।
Comments are closed.