ଗୁରୁଡିଝାଟିଆ: ଆଠଗଡ ବନଖଣ୍ଡ ଅନ୍ତର୍ଗତ ଖୁଣ୍ଟୁଣୀ ବନାଞ୍ଚଳର ବଣିଆବନ୍ଧ ସଂରକ୍ଷିତ ଜଙ୍ଗଲରେ ଥିବା ଏକ ପୋଖରୀରୁ ୯ମାସର ହାତୀ ଛୁଆର ମୃତଦେହ ଉଦ୍ଧାର କରାଯାଇଛି। ହାତୀ ମୃତ୍ୟୁର ପ୍ରକୃତ କାରଣ ଜଣାପଡିନାହିଁ। ଆଜି ଆଠଗଡ ବ୍ଲକ ପ୍ରାଣୀ ଚିକିତ୍ସକ ଆସି ମୃତଦେହ ବ୍ୟବଚ୍ଛେଦ କରିବା ପରେ ହାତୀ ମୃତ୍ୟୁର ପ୍ରାଥମିକ ରହସ୍ୟ ଉନ୍ମୋଚନ ହେବ। ପ୍ରକାଶ ଯୋଗ୍ୟ ଢେଙ୍କାନାଳ ବନଖଣ୍ଡ ଅଞ୍ଚଳରୁ ଦୁଇଟି ହାତୀ ସହ ୩ଟି ଛୁଆହାତୀ ବଣିଆବନ୍ଧ ସଂରକ୍ଷିତ ଜଙ୍ଗଲ ପାଶ୍ୱର୍କୁ ଆସୁଥିଲେ। ସେମାନଙ୍କ ଭିତରୁ ଗୋଟିଏ ଦନ୍ତାହାତୀ ଥିବାବେଳେ ଗୋଟିଏ ମାଆ ହାତୀ ରହିଥିଲା ଓ ୩ଟି ଛୁଆ ରହିଥିଲେ। ନିକଟସ୍ଥ ପୋଖରୀରେ ହାତୀ ଛୁଆଟି ପଶିଯାଇଥିବା ବେଳେ ବାହାରକୁ ବାହାରି ପାରନଥିଲା। ଫଳରେ ପୋଖରୀ ଭିତରେ ପାଣି ପିଇ ମରିଯାଇ ଥିବାର ସନ୍ଦେହ କରାଯାଉଛି ବୋଲି ବନାଞ୍ଚଳ ଅଧିକାରୀ ନୀଳମାଧବ ସାହୁ କହିଛନ୍ତି। ଘଟଣାସ୍ଥଳରେ ବନ ବିଭାଗର ଅଧିକାରୀ ଓ ପ୍ରାଣୀ ଚିକିତ୍ସକ ପହଞ୍ଚି ହାତୀକୁ ବାହାର କରିଥିଲେ।
