ନୂଆଦିଲ୍ଲୀ : ବିଜେପିର ପ୍ରସ୍ତାବିତ ରଥଯାତ୍ରାକୁ ଅନୁମତି ନ ଦେବା ପ୍ରସଙ୍ଗରେ ସୁପ୍ରିମକୋର୍ଟ ମଙ୍ଗଳବାର ମମତା ବାନାର୍ଜୀଙ୍କ ନେତୃତ୍ବ ପଶ୍ଚିମବଙ୍ଗ ସରକାରଙ୍କୁ ନୋଟିସ ଜାରି କରିଛନ୍ତି। ନୋଟିସରେ ବିଜେପିର ରଥଯାତ୍ରାକୁ କାହିଁକି ରାଜ୍ୟ ସରକାର ଅନୁମତି ଦେଉ ନାହାନ୍ତି ତାର ଉତ୍ତର ଦେବାକୁ କୁହାଯାଇଛି। ଜାନୁଆରୀ ୧୫ରେ ସୁପ୍ରିମକୋର୍ଟ ଏହା ଉପରେ ଶୁଣାଣି କରିବେ। ‘ଗଣତନ୍ତ୍ର ସୁରକ୍ଷା’ ନାମରେ ବିଜେପି ପଶ୍ଚିମବଙ୍ଗରେ ଏକ ରଥଯାତ୍ରା ଆୟୋଜନ କରିବାକୁ ଯାଉଥିବାବେଳେ ରାଜ୍ୟ ସରକାର ଏହାକୁ ଅନୁମତି ଦେଇ ନାହାନ୍ତି। କଲକାତା ହାଇକୋର୍ଟଙ୍କ ଜଣିକିଆ ବିଚାରପତି ପୀଠ ବିଜେପିର ରଥଯାତ୍ରାକୁ ଅନୁମତି ଦେଇଥିବାବେଳେ ଡିସେମ୍ବର ୨୧ରେ ହାଇକୋର୍ଟଙ୍କ ଦୁଇଜଣିଆ ବିଚାରପତି ପୀଠ ଏହାକୁ ଖାରଜ କରିଥିଲେ। ହାଇକୋର୍ଟଙ୍କ ରାୟ ବିରୋଧରେ ବିଜେପି ସୁପ୍ରିମକୋର୍ଟରେ ଆବେଦନ କରିଛି।
