ଗୋପାଳପୁର : ଚଳିତ ମାସ ୧୮ ତାରିଖରେ ଗୋପାଳପୁର କଲେଜ ନିକଟରେ ଥିବା ପ୍ରମୋଦ କିସାନ ସେବା କେନ୍ଦ୍ର ଇଣ୍ଡିଆନ ଅଏଲ ପେଟ୍ରୋଲ ପମ୍ପର ମ୍ୟାନେଜର କେ. ଆଶିଷ ରାଓ ୧୧ ଲକ୍ଷ ୨୨ ହଜାର ୨୩୩ ଟଙ୍କା ନେଇ ଫେରାର ହୋଇଥିବା ନେଇ ପମ୍ପ ମାଲିକ ଚିତ୍ତ ରଞ୍ଜନ ପାଢ଼ୀ ଥାନାରେ ଲିଖିତ ଅଭିଯୋଗ କରିଥିଲେ । ଅଭିଯୋଗ ପ୍ରକାରେ ପୁଲିସ ୨୦୪/୨୪ ମାମଲା ରୁଜୁ କରି ତଦନ୍ତ ଆରମ୍ଭ କରିଥିଲା । ଆଜି ଅଭିଯୁକ୍ତ କେ. ଆଶିଷ ବ୍ରହ୍ମପୁର କୋର୍ଟରେ ଆତ୍ମସମର୍ପଣ କରିଥିବା ନେଇ ଗୋପାଳପୁର ଥାନା ଅଧିକାରୀ ପ୍ରଶାନ୍ତ କୁମାର ମଲ୍ଲିକ ସୂଚନା ଦେଇଛନ୍ତି ।
ସୂଚନା ପ୍ରକାରେ ଗୋପାଳପୁର କଲେଜ ନିକଟରେ ଥିବା ପ୍ରମୋଦ କିସାନ ସେବା କେନ୍ଦ୍ର ଇଣ୍ଡିଆନ ଅଏଲ ପେଟ୍ରୋଲ ପମ୍ପର ମ୍ୟାନେଜର କେ. ଆଶିଷ ରାଓଙ୍କୁ ପମ୍ପର ମାଲିକ ଚିତ୍ତ ରଞ୍ଜନ ପାଢ଼ୀ ୧୭ ତାରିଖରେ ପେଟ୍ରୋଲ ପମ୍ପର ବିକ୍ରି ହୋଇଥିବା ଦୁଇ ଦିନର ୧୧ ଲକ୍ଷ ୨୨ ହଜାର ୨୩୩ ଟଙ୍କା ମୋନାର୍କ ଛକ ସ୍ଥିତ ଆକ୍ସିସ ବ୍ୟାଙ୍କରେ ଜମା କରିବାକୁ ପଠାଇଥିଲେ । କିଛି ସମୟ ପରେ ମ୍ୟାନେଜରକୁ ଫୋନ କରି ଜମା କରିବା କଥା ନେଇ ପଚାରି ବୁଝିଥିଲେ । ତାହାର କିଛି ସମୟ ପରେ ଜମା ହୋଇନଥିବା ଜାଣିପାରି ପୁଣି ଫୋନ କରିଥିଲେ । କିନ୍ତୁ ମ୍ୟାନେଜର ଫୋନ ବନ୍ଦ ଥିଲା । ମ୍ୟାନେଜର ଟଙ୍କା ଧରି ଫେରାର ହୋଇଯାଇଥିବା ଜାଣିପାରି ଗୋପାଳପୁର ଥାନାରେ ଲିଖିତ ଅଭିଯୋଗ କରିଥିଲେ ।
