ସମାଜ ଡିଜିଟାଲ ଡେସ୍କ: ମହାରାଷ୍ଟ୍ରରେ ଜାତୀୟତା କଂଗ୍ରେସ ପାର୍ଟି(ଏନସିପି)ରୁ ୪ ବରିଷ୍ଠ ନେତା ଇସ୍ତଫା ଦେଇଛନ୍ତି। ଗତ ଲୋକସଭା ନିର୍ବାଚନରେ ଦଳର ନିରାଶଜନକ ପ୍ରଦର୍ଶନ ପରେ ଦଳର ମୁଖ୍ୟ ଅଜିତ ପାଓ୍ବାରଙ୍କ କାର୍ଯ୍ୟରେ ଅସନ୍ତୁଷ୍ଠ ହୋଇ ଏହି ନେତାମାନେ ଇସ୍ତଫା ଦେଇଥିବା ଜଣାପଡ଼ିଛି। ସେମାନେ ହେଲେ ପିମ୍ପରି-ଚିଞ୍ଚଓ୍ବାଡ ଶାଖା ମୁଖ୍ୟ ଅଜିତ ଗଭାନେ, ଛାତ୍ର ନେତା ୟଶ ସାଣେ, ପୂର୍ବତନ କର୍ପୋରେଟର ରାହୁଲ ଭୋଶଲେ ଏବଂ ପକଞ୍ଜ ଭାଲେକାର। ଏମାନେ ସମସ୍ତେ ଏବେ ଶରଦ ପାଓ୍ବାରଙ୍କ ଗୋଷ୍ଠୀକୁ ଫେରିବା ନେଇ ସୂଚନା ମିଳିଛି। ତେବେ ଆଗାମୀ ଦିନରେ ମହାରାଷ୍ଟ୍ରରେ ବିଧାନସଭା ନିର୍ବାଚନ ହେବାକୁ ଥିବାବେଳେ ଏହା ପୂର୍ବରୁ ୪ ବରିଷ୍ଠ ନେତା ଏନସିପି ଛାଡ଼ିବା ପରେ ଅଜିତଙ୍କ ନେତୃତ୍ଵାଧୀନ ଏନସିପିକୁ ଶକ୍ତ ଝଟ୍କା ମିଳିଛି ବୋଲି କୁହାଯାଉଛି।
ଗତ ଲୋକସଭା ନିର୍ବାଚନରେ ଅଜିତଙ୍କ ଏନସିପି ମାତ୍ର ଗୋଟିଏ ଆସନରେ ବିଜୟୀ ହୋଇଥିଲା। କିନ୍ତୁ ଶରଦ ପାଓ୍ବାରଙ୍କ ନେତୃତ୍ଵାଧୀନ ଏନସିପି-ଏସସିପି ୧୦ ଆସନରେ ପ୍ରାର୍ଥୀ ଦେଇଥିବାବେଳେ ୮ ଆସନରେ ଜିତିଥିଲା। ସୂଚନାଯୋଗ୍ୟ, ଅଜିତ ପାଓ୍ବାର ଏବଂ ତାଙ୍କ ଦାଦା ଶରଦ ପାଓ୍ବାରଙ୍କ ମଧ୍ୟରେ ମତଭେଦ ଯୋଗୁ ଏନସିପି ଭାଙ୍ଗି ଦୁଇଟି ଦଳରେ ପରିଣତ ହୋଇଛି। କୋର୍ଟଙ୍କ ଆଦେଶକ୍ରମେ ମୂଳ ଏନସିପି ଅଜିତଙ୍କ ଅକ୍ତିଆରରେ ଥିବାବେଳେ ଶରଦ ପାଓ୍ବାର ଏନସିପି-ଏସସିପି ଦଳ ଗଠନ କରିଛନ୍ତି।
Comments are closed.