ଲଣ୍ଡନ : ବ୍ରିଟିଶ ମହାରାଣୀ ଏଲିଜାବେଥ୍ ଦ୍ବିତୀୟଙ୍କ ତରଫରୁ ଇଂଲଣ୍ଡର ପୂର୍ବତନ କ୍ରିକେଟ ଅଧିନାୟକ ଆଲିଷ୍ଟର କୁକ୍ଙ୍କୁ ନାଇଟ୍ ଉପାଧି ପ୍ରଦାନ କରାଯାଇଛି। ଫଳରେ ସେ ଏଣିକି ସାର୍ ଆଲିଷ୍ଟର କୁକ୍ ନାମରେ ପରିଚିତ ହେବେ। କୁକ୍ଙ୍କ ବ୍ୟତୀତ ଇଂଲଣ୍ଡର ପୂର୍ବତନ ରଗ୍ବୀ ଅଧିନାୟକ ବିଲ୍ ବିମୋଣ୍ଟଙ୍କୁ ମଧ୍ୟ ନାଇଟ୍ ଉପାଧି ପ୍ରଦାନ କରାଯାଇଛି। ୩୪ ବର୍ଷୀୟ କୁକ୍ ୨୦୦୬ରେ ଭାରତ ବିପକ୍ଷରେ ପ୍ରଥମ ଟେଷ୍ଟ ମ୍ୟାଚ ଖେଳି ନିଜର ଆନ୍ତର୍ଜାତିକ କ୍ରିକେଟ କ୍ୟାରିୟର ଆରମ୍ଭ କରିଥିଲେ। ସଂଯୋଗବଶତଃ ୨୦୧୮ରେ ଭାରତ ବିପକ୍ଷରେ ଶେଷ ଟେଷ୍ଟ ଖେଳି କୁକ୍ ଅବସର ନେଇଥିଲେ। ଦୀର୍ଘ ୧୨ ବର୍ଷ ମଧ୍ୟରେ ସେ ୧୬୧ଟି ଟେଷ୍ଟରୁ ୪୫.୩୫ ହାରରେ ୧୨,୪୭୨ ରନ ସ୍କୋର କରିଛନ୍ତି। ଇତିମଧ୍ୟରେ ୩୩ଟି ଶତକ ଓ ୫୭ଟି ଅର୍ଦ୍ଧଶତକ ଅନ୍ତର୍ଭୁକ୍ତ। ଦିନିକିଆ ଫର୍ମାଟରେ ସେ ୯୨ଟି ମ୍ୟାଚରୁ ୫ଟି ଶତକ ସହ ୩୨୦୪ ରନ ସ୍କୋର କରିଛନ୍ତି। କୁକ୍ ୫୪ଟି ଟେଷ୍ଟରେ ଇଂଲଣ୍ଡ ଦଳର ନେତୃତ୍ବ ନେଇଥିବାବେଳେ ୨୪ଟିରେ ବିଜୟୀ ହୋଇଛନ୍ତି। ୨୨ଟି ଟେଷ୍ଟ ହାରିଥିବାବେଳେ ଅବଶିଷ୍ଟ ୧୩ଟି ଟେଷ୍ଟ ଅମୀମାଂସିତଭାବେ ଶେଷ ହୋଇଛି।
