ନିଟ-ନେଟ ବିବାଦ, ପିଲାଙ୍କ ପରିଶ୍ରମର ଫଳ ଦେବ କିଏ

ଡେସ୍କ: ନିଟ ୟୁଜି ବିବାଦ ଥମି ନ ଥିବା ବେଳେ ୟୁଜିସି ନେଟ ବିବାଦ ସମଗ୍ର ଛାତ୍ର ସମାଜକୁ ଅସ୍ଥିର କରିଛି। ଏହି ପ୍ରସଙ୍ଗ ନେଇ ଏବେ ଅନେକ ପ୍ରଶ୍ନ ମୁଣ୍ଡ ଟେକିଛି। ଆଜି ଛାତ୍ରଛାତ୍ରୀମାନେ ଏ ନେଇ ବିରୋଧ ପ୍ରଦର୍ଶନ କରିଛନ୍ତି। ଏହି ବିଷୟରେ କେତେକ ଛାତ୍ର ସଂଗଠନ ପ୍ରଶ୍ନ କରିଛନ୍ତି ଯେ ନିଟ ୟୁଜି ମେଡିକାଲ ପ୍ରବେଶିକା ପରୀକ୍ଷାରେ ହୋଇଥିବା ଅନିୟମିତତାରେ କିଛି ବଡ଼ବଡ଼ିଆଙ୍କୁ ସୁରକ୍ଷା ଦେବା ଆଳରେ ଓ ଲୋକଙ୍କୁ ସେହି ପ୍ରସଙ୍ଗ ଠାରୁ ଦୁରେଇ ରଖିବା ପାଇଁ ୟୁଜିସି ନେଟ ପରୀକ୍ଷା ବାତିଲ କରାଯାଇଛି।

ସେମାନେ ପ୍ରଶ୍ନ କରିଛନ୍ତି ଯେ ଯଦି ସାଇବର ସଂସ୍ଥା ଜାଣିଥିଲା, ତେବେ ପରୀକ୍ଷା ପୂର୍ବରୁ ଅନିୟମିତତା ହେବ ବୋଲି କାହିଁକି ଜଣାଇଲା ନାହିଁ ଓ ସଂସ୍ଥା ଜଣାଇବା ପରେ କୌଣସି ତଦନ୍ତ କମିଟି ଗଠନ ନ କରି କିମ୍ବା ସିବିଆଇକୁ ତଦନ୍ତ ଦାୟିତ୍ୱ ଦେବା ପୂର୍ବରୁ ତର୍ଜମା ନ କରି ହଠାତ ୟୁଜିସି ନେଟ ପରୀକ୍ଷା ବାତିଲ କରିବା ପଛରେ କେଉଁ ରହସ୍ୟ ଅଛି। ଛାତ୍ର ସଂଗଠନ ଗୁଡିକ ପ୍ରଶ୍ନ କରିଛନ୍ତି ଯେ ଯଦି କେନ୍ଦ୍ର ସରକାର ଏତେ ସଜାଗ ତାହେଲେ ନିଟ ୟୁଜି ପରୀକ୍ଷାରେ ଅନିୟମିତତା ପ୍ରସଙ୍ଗ ଜଣାପଡିବା ପରେ ସରକାର ସମ୍ପୃକ୍ତ ପରୀକ୍ଷା ବାତିଲ କଲେନାହିଁ କାହିଁକି? ନିଟ ୟୁଜି ମେଡିକାଲ ପ୍ରବେଶିକା ପରୀକ୍ଷାରେ ମାଇନସ ମାର୍କିଙ୍ଗ ବ୍ୟବସ୍ଥା ଥିଲା ବେଳେ କେଉଁ ଆଧାରରେ ଓ କେଉଁ ନିୟମ ଅନୁଯାୟୀ ୭୦ରୁ ୮୦ ପ୍ରତିଶତ ଗ୍ରେସ ମାର୍କ ଦେଇଥିଲେ। ଏଭଳି ଏକ ଗୁରୁତ୍ୱପୂର୍ଣ୍ଣ ପରୀକ୍ଷାରେ ୭୦% ଗ୍ରେସ ମାର୍କ ଦେବା ଭାରତ ଇତିହାସରେ ପ୍ରଥମ ବୋଲି ଛାତ୍ରଛାତ୍ରୀ ମାନେ କହିଛନ୍ତି।

ଯେଉଁ ଛାତ୍ରଛାତ୍ରୀମାନେ ଗ୍ରେସ ମାର୍କ ପାଇଛନ୍ତି ସେମାନଙ୍କ ଅଭିଭାବକ ମାନେ ସରକାରୀ କଳର କେଉଁ ସ୍ଥାନରେ ଅବସ୍ଥାପିତ ଓ ସେମାନେ କେଉଁ ନେତା ଓ ମନ୍ତ୍ରୀଙ୍କ ସହ ସମ୍ପର୍କିତ ଏବଂ ସେମାନଙ୍କ ଠାରୁ କେତେ ପରିମାଣର ଅର୍ଥ ଆଦାୟ କରାଯାଇଛି, ତାହା ସ୍ପଷ୍ଟ କରିବାକୁ ସେମାନେ ଦାବି କରିଛନ୍ତି।

ଅନ୍ୟପକ୍ଷରେ କେନ୍ଦ୍ର ଶିକ୍ଷାମନ୍ତ୍ରୀ ପୂର୍ବରୁ ସାମ୍ବାଦିକ ସମ୍ମିଳନୀରେ କଠୋର ପଦକ୍ଷେପ ନେବେ ବୋଲି କହୁଥିବା ବେଳେ ଆଜି କହିଛନ୍ତି ଯେ ୟୁଜିସି ନେଟ ପ୍ରଶ୍ନପତ୍ର ଡାର୍କ ୱେବ ଓ ଟେଲିଗ୍ରାମରେ ଘୁରି ବୁଲୁଥିଲା କିନ୍ତୁ ଏହାର କୌଣସି ପ୍ରମାଣ କାହିଁକି ଉପସ୍ଥାପନ କରାଯାଇ ନାହିଁ ବୋଲି ଛାତ୍ର ସଂଗଠନ ଗୁଡିକ ପ୍ରଶ୍ନ କରିଛନ୍ତି।

ବର୍ଷ ବର୍ଷ ଧରି ଛାତ୍ରଛାତ୍ରୀମାନେ ଉଭୟ ନିଟ ୟୁଜି ମେଡିକାଲ ପ୍ରବେଶିକା ଓ ୟୁଜିସି ନେଟ ପରୀକ୍ଷା ପାଇଁ ଦିନରାତି ଏକ କରି ପରିଶ୍ରମ କରି ପରୀକ୍ଷା ଦେଇ ସାରିଥିବା ବେଳେ ପୁଣି ପରୀକ୍ଷାରେ ସେମାନେ କେତେ ସଫଳତା ପାଇବେ ତାହା ମଧ୍ୟ ପ୍ରଶ୍ନବାଚୀ।