କଲ୍ୟାଣସିଂହପୁର: ରାୟଗଡା ଜିଲା କଲ୍ୟାଣସିଂହପୁର ବ୍ଲକ କରପା ପଞ୍ଚାୟତ ବିଜୟନଗରରେ ପାନୀୟ ଜଳ ସମସ୍ୟା ପ୍ରତିବାଦରେ ଗାଁର ମହିଳାମାନେ ପମ୍ପ ହାଉସରେ ତାଲା ପକାଇବା ଘଟଣା ବିଭିନ୍ନ ଖବର କାଗଜରେ ପ୍ରକାଶ ପାଇବା ପରେ ପଞ୍ଚାୟତ ତରଫରୁ ଟ୍ରାକ୍ଟର ଟାଙ୍କି ଓ ମେକ୍ସ ପିକପ ଭ୍ୟାନରେ ଦୁଇଟି ଟାଙ୍କି ଦ୍ୱାରା ଗ୍ରାମକୁ ପାଣି ଯୋଗାଇ ଦିଆଯାଉଛି । ଯେପର୍ଯ୍ୟନ୍ତ ଧରି ବୋରୱେଲ ମରାମତି ନ ହୋଇ ପାଣି ଯୋଗାଇ ଦିଆଯାଇ ନାହିଁ ସେପର୍ଯ୍ୟନ୍ତ ଟାଙ୍କି ଯୋଗେ ପାଣି ଯୋଗାଇ ଦିଆଯିବ ବୋଲି ସରପଞ୍ଚ କହିଛନ୍ତି ।
ପ୍ରକାଶ ଥାଉକି, ପ୍ରାୟ ୩ ମାସ ହେବ ବିଶୁଦ୍ଧ ପାନୀୟ ଜଳ ପାଇଁ ଗ୍ରାମବାସୀ ନାହିଁ ନ ଥିବା ଅସୁବିଧାର ସମ୍ମୁଖୀନ ହେଉଥିଲେ । ଏହାକୁ ନେଇ ପଞ୍ଚାୟତ ଅଧିକାରୀଠାରୁ ସରପଞ୍ଚ ବ୍ଲକ ପର୍ଯ୍ୟନ୍ତ ସମସ୍ତଙ୍କୁ ଲିଖିତ ଭାବେ ଜଣାଇବା ସହ ବାରମ୍ବାର ଗୁହାରି କରି ଆସୁଥିଲେ ମଧ୍ୟ କେହି ହେଲେ କର୍ଣ୍ଣପାତ କରୁ ନ ଥିଲେ । ଗତକାଲି ଗ୍ରାମର ମହିଳାମାନେ ଏକତ୍ରିତ ହୋଇ ବିଜୟନଗର ପମ୍ପ ହାଉସରେ ତାଲା ପକାଇ ଦେଇଥିଲେ । ନୂତନ ବୋରୱେଲ ଖନନ କରି ସେଥିରେ ନୂତନ ପାଇପ ଲାଇନ ସଂଯୋଗ କରି ପାଣି ଯୋଗାଇଦେବା ପାଇଁ ଦାବି କରିଥିଲେ । ନହେଲେ ଆଗାମୀ ଦିନରେ ରାଜରାସ୍ତାକୁ ଓହ୍ଲାଇବାକୁ ପଛାଇବୁ ନାହିଁ ବୋଲି ଗ୍ରାମର ମହିଳା ଓ ପୁରୁଷମାନେ କହିଥିଲେ । ଏନେଇ ବିଭିନ୍ନ ଖବର କାଗଜରେ ଖବର ପ୍ରକାଶ ପାଇଥିଲା।
