କେନ୍ଦୁଝରଗଡ଼଼: ଜିଲା ସ୍ୱାସ୍ଥ୍ୟ ସମିତି କେନ୍ଦୁଝର ଆନୁକୁଲ୍ୟରେ ବୁଧବାର ବିଶ୍ୱ ରକ୍ତଦାତା ଦିବସ ଜିଲା ରେଡକ୍ରସ ଯୁଗ୍ମ ସମ୍ପାଦକ ଏ.ଆର ଖାନଙ୍କ ଅଧ୍ୟକ୍ଷତାରେ ଆୟୋଜିତ ହୋଇଯାଇଛି। ଜିଲା ମୁଖ୍ୟ ଚିକିତ୍ସାଳୟ ଡିଟିୟୁ ସଭାଗୃହରେ ଏହି ଉପଲକ୍ଷେ ଆୟୋଜିତ ଉତ୍ସବରେ ଜିଲା ମୁଖ୍ୟ ଚକିତ୍ସା ଓ ଜନସ୍ୱାସ୍ଥ୍ୟ ଅଧିକାରୀ ଡାକ୍ତର କିଶୋର କୁମାର ପୃଷ୍ଟି ମୁଖ୍ୟଅତିଥି, ଡିପିଏମ ନିତ୍ୟାନନ୍ଦ ବରାଳ ସମ୍ମାନିତ ଅତିଥି, ସମାଜସେବୀ ଧରିତ୍ରୀ ରାଉତ ମୁଖ୍ୟବକ୍ତା, ସହକାରୀ ପ୍ରଫେସର ବୈଦ୍ୟୁତିକ ସସ୍ମିତା ଚୌଧୁରୀ ଅନ୍ୟତମ ଅତିଥି ଭାବେ ଯୋଗଦେଇ ରକ୍ତଦାନ ଓ ରକ୍ତଦାତାଙ୍କ ମହାନତା ସମ୍ପର୍କରେ ବିସ୍ତୃତ ଆଲୋଚନା କରିଥିଲେ। ଚଳିତ ବର୍ଷର ଶୀର୍ଷକ ‘ରକ୍ତଦାନର ୨୦ବର୍ଷ ପୂର୍ତ୍ତି ପାଳନ:ଧନ୍ୟବାଦ ସମସ୍ତ ରକ୍ତଦାତାଙ୍କୁ’ ସମ୍ପର୍କରେ ମଞ୍ଚାସୀନ ଅତିଥିଗଣ ବିସ୍ତୃତ ଭାବେ ଆଲୋକପାତ କରିବା ସହ ରକ୍ତଦାନ ଭଳି ଏକ ପୂଣ୍ୟ କାର୍ଯ୍ୟ ପାଇଁ ବିଶେଷକରି ଯୁବବର୍ଗ ଆଗେଇ ଆସିବାକୁ ଆହ୍ୱାନ ଦେଇଥିଲେ। ସର୍ବାଧିକ ରକ୍ତଦାନ ପାଇଁ ସରକାରୀ ଯାନ୍ତ୍ରିକ ମହାବିଦ୍ୟାଳୟ କେନ୍ଦୁଝର ଓ ଶ୍ରୀମେଟାଲିକ୍ସ କାରଖାନା ବଡବିଲ ଏବଂ ହରିଚନ୍ଦନପୁରର ଶ୍ରୀନିବାସ ପାଇକରାୟଙ୍କୁ ଶ୍ରେଷ୍ଠ ଶିବିର ଆୟୋଜକ ଭାବେ ଟ୍ରଫି ଓ ମାନପତ୍ର ଦେଇ ସମ୍ବର୍ଦ୍ଧିତ କରାଯାଇଥିଲା। ଏଡିପିଏଚ ସିଓ ଧନୁରାମ ମୁର୍ମୁ ପ୍ରାରମ୍ଭରେ ସ୍ୱାଗତ ଭାଷଣ ପ୍ରଦାନ କରିଥିଲେ।
Popular Categories
Previous article
Next article