ଭବାନୀପାଟଣା: ନକଲି ସାର୍ଟିଫିକେଟ ବଳରେ ଗ୍ରାମୀଣ ଡାକ ସେବକ ନିଯୁକ୍ତି ପାଇଥିବା ଲୋକଙ୍କୁ ସିବିଆଇ ଟିମ୍ ଜେରା କରୁଛି। ଗତବର୍ଷ ଡାକ ବିଭାଗ ଦ୍ଵାରା ଗ୍ରାମୀଣ ଡାକ ସେବକ ନିଯୁକ୍ତି ହେଇଥିଲା। ସେଥିରେ ଉତ୍ତରପ୍ରଦେଶର ନକଲି ସାର୍ଟିଫିକେଟ ଦେଇ କିଛି ଲୋକ ଚାକିରି ପାଇଥିଲେ। ତେବେ ସାର୍ଟିଫିକେଟ ତନଖିବେଳେ କେତେକ ପ୍ରାର୍ଥୀଙ୍କ ସାର୍ଟିଫିକେଟ ଜାଲ୍ ବୋଲି ଜଣା ପଡ଼ିଥିଲା। ଏନେଇ ବିଭାଗୀୟ ଅଧିକାରୀ ସିବିଆଇରେ ଅଭିଯୋଗ ପରେ ଗୁରୁବାର ସିବିଆଇର ଏକ ୨୦ ଜଣିଆ ଟିମ୍ କଳାହାଣ୍ଡିରେ ଚଢାଉ କରିଛନ୍ତି। ଏହି ଟିମ୍ ନର୍ଲା ଚାରି ଛକର ଏକ କମ୍ପ୍ୟୁଟର ଦୋକାନ ତନଖି କରିଥିଲେ। ପରେ କର୍ଲାମୁଣ୍ଡା ବ୍ଲକର ରିଞ୍ଜା, କୁନ୍ଦେଇପାଲି, ପୁଟିଗାଁ, ଖରଝୁରା ଗାଁର କେତେକ ଆବେଦନକାରୀଙ୍କ ଘରେ ଖାନ ତଲାସୀ ଜାରି ରଖିଛନ୍ତି।
ସେହିଭଳି କେସିଙ୍ଗା ବ୍ଲକ କୁଣ୍ଡାବନ୍ଧ ଗାଁ ପିପାଲପଡ଼ାର ରମେଶ ବିଶ୍ଵାଳଙ୍କୁ ସିବିଆଇ ଟିମ୍ ଖୋଜୁଛି। ଡାକ ସେବକ ପଦବୀରେ ନିଯୁକ୍ତି ପାଇଥିବା ରମେଶ ତଦନ୍ତକାରୀ ଟିମ୍କୁ ଦେଖି ଦୌଡ଼ି ପଳାଇ ଯାଇଥିବାରୁ ତାଙ୍କ ଘରେ ପୁଲିସ ଜଗିଛି। ସେହି ଗାଁର ଅନ୍ୟ ଦୁଇଜଣଙ୍କୁ ମଧ୍ୟ ସିବିଆଇ ଟିମ୍ ପଚରା ଉଚରା କରୁଛି। ଡାକ ବିଭାଗରେ କାର୍ଯ୍ୟରତ ଏହି ଅଞ୍ଚଳର ଜଣେ ବଡ ଅଧିକାରୀ ମଧ୍ୟ ସିବିଆଇ ସ୍କାନରରେ ଥିବା କୁହାଯାଉଛି। ଖବର ଲେଖାଯିବାସୁଦ୍ଧା ବିଭିନ୍ନ ସ୍ଥାନରେ ସିବିଆଇ ଟିମ୍ ଚଢାଉ ଜାରି ରଖିଛି।
Comments are closed.