ଭାରତକୁ ୨ ଥର ଗୋପନୀୟ ଯାତ୍ରା କରିଛନ୍ତି କାନାଡ଼ା ଗୁଇନ୍ଦା ମୁଖ୍ୟ

ନୂଆଦିଲ୍ଲୀ: କାନାଡ଼ାର ଗୁଇନ୍ଦା ବିଭାଗ ମୁଖ୍ୟ ଡେଭିଡ ଭିଗନିଅଲ୍ଟ ଦୁଇ ଥର ଭାରତକୁ ଗୋପନୀୟ ଯାତ୍ରା କରିଛନ୍ତି। ଗତ ଫେବୃୟାରୀ ଏବଂ ମାର୍ଚ୍ଚରେ ସେ ଭାରତ ଆସିଥିବା ସଦ୍ୟ ଜଣାପଡ଼ିଛି। ଖଲିସ୍ତାନୀ ଆତଙ୍କୀ ହରଦୀପ ସିଂହ ନିଜ୍ଜାର ହତ୍ୟା ମାମଲାର ତଦନ୍ତ ସଂକ୍ରାନ୍ତ ତଥ୍ୟ ଭାରତୀୟ ଅଧିକାରୀଙ୍କୁ ଜଣାଇବା ଲାଗି ସେ ଏଠାକୁ ଆସିଥିଲେ। କିନ୍ତୁ ନିଜ ଯାତ୍ରାକୁ ସେ ସମ୍ପୂର୍ଣ୍ଣ ଗୁପ୍ତ ରଖିଥିଲେ ବୋଲି ମାମଲାର ତଦନ୍ତ କରୁଥିବା ଭାରତୀୟ ଅଧିକାରୀଙ୍କ ନିକଟତମ ସୂତ୍ରରୁ ଜଣାପଡ଼ିଛି।

ଡେଭିଡ ହେଉଛନ୍ତି କାନାଡ଼ା ନିରାପତ୍ତା ଗୁଇନ୍ଦା ସେବା (ସିଏସଆଇଏସ)ର ନିର୍ଦ୍ଦେଶକ। ନିଜ୍ଜାର ହତ୍ୟା ମାମଲାରେ କାନାଡ଼ା ପକ୍ଷରୁ ମଧ୍ୟ ତଦନ୍ତ ଚାଲିଛି। ତଦନ୍ତରୁ ବାହାରିଥିବା ନିଷ୍କର୍ସ ସମ୍ପର୍କରେ ଭାରତୀୟ ତଦନ୍ତକାରୀ ଅଧିକାରୀଙ୍କୁ ଅବଗତ କରାଇବା ଲାଗି ସେ ଏଠାକୁ ଆସିଥିବା କୁହାଯାଉଛି।

ସୂଚନାଯୋଗ୍ୟ, ନିଜ୍ଜାର ହତ୍ୟା ପଛରେ ଭାରତୀୟ ଗୁଇନ୍ଦା ସଂସ୍ଥା ଏଜେଣ୍ଟଙ୍କ ହାତ ରହିଛି ବୋଲି କାନାଡ଼ା ପ୍ରଧାନମନ୍ତ୍ରୀ ଜଷ୍ଟିନ ଟ୍ରୁଡୋ ଅଭିଯୋଗ କରିବା ପରେ ଦୁଇ ଦେଶ ମଧ୍ୟରେ ସମ୍ପର୍କରେ ତିକ୍ତତା ସୃଷ୍ଟି ହୋଇଛି। ମାତ୍ର ଭାରତ ଏହି ଅଭିଯୋଗକୁ ଭିତ୍ତିହୀତ ବୋଲି କହିଛନ୍ତି। ତେବେ ଏହି ମାମଲାରେ କାନାଡ଼ା ପୁଲିସ ୪ ଭାରତୀୟଙ୍କୁ ଗିରଫ କରିବା ପୂର୍ବରୁ କାନାଡ଼ାର ଗୁଇନ୍ଦା ମୁଖ୍ୟ ଡେଭିଡ ଭାରତ ଆସିଥିବା ଜଣାପଡ଼ିଛି।