ସମାଜ ଡିଜିଟାଲ ଡେସ୍କ: ‘ଶିବଖୋଡିରେ ମହାଦେବଙ୍କୁ ଦର୍ଶନ କରି ବସରେ ଫେରୁଥିଲୁ। ଏହି ସମୟରେ ହଠାତ୍ ବସ ଉପରକୁ ଆତଙ୍କବାଦୀମାନେ ଗୁଳିମାଡ଼ କଲେ। ଡ୍ରାଇଭର ଭୟରେ ନିୟନ୍ତ୍ରଣ ହରାଇବାରୁ ବସଟି ଏକ ଖାଲକୁ ଖସିପଡ଼ିଲା। ଦୁର୍ଘଟଣା ପରେ ବି ଆତଙ୍କବାଦୀମାନେ ଛାଡ଼ି ନ ଥିଲେ। ବସ ଉପରକୁ ଆଖିବୁଜା ଗୁଳିମାଡ଼ କରି ଚାଲିଥିଲେ। ଶ୍ରଦ୍ଧାଳୁମାନଙ୍କ ଚିତ୍କାରରେ ସେହି ସ୍ଥାନ କମ୍ପୁଥିଲା। ଏହାରି ଭିତରେ ମୁଁ ମୋ ୨ ସାଥୀଙ୍କୁ ଖୋଜିବାରେ ଲାଗିଥିଲି। ଏହି ସମୟରେ ହଠାତ୍ ଏକ ଗୁଳି ଆସି ମୋ ପିଠିରେ ବାଜିଲା। ଆଉ ଗୋଟିଏ ଗୁଳି ବାଜିବା ପୂର୍ବରୁ ଗଛ ଆଢୁଆଳରେ ଲୁଚି ଯାଇଥିଲି। ଗୋଟିଏ ସେକେଣ୍ଡ ଏପଟ ସେପଟ ହୋଇଥିଲେ ମୁଁ ବି ସେହିଠାରେ ମୃତ୍ୟୁକୁ ସାମ୍ନା କରିଥାନ୍ତି। ’ ଆତଙ୍କବାଦୀ ଆକ୍ରମଣ ସମୟରେ ଏପରି ଲୋମଟାଙ୍କୁରା ଅନୁଭୂତି ବଖାଣିଛନ୍ତି ଜଣେ ଶ୍ରଦ୍ଧାଳୁ ବଣ୍ଟି। ସେ ଗ୍ରେଟରନୋଏଡାର ବାସିନ୍ଦା। ଜାମ୍ମୁ-କାଶ୍ମୀରର ରିୟାସୀରେ ଘଟିଥିବା ଆତଙ୍କବାଦୀ ଆକ୍ରମଣରେ ସେ ଗୁରୁତର ଆହତ ହୋଇ ଏବେ ରିୟାସୀ ଜିଲା ଚିକିତ୍ସାଳୟରେ ଚିକିତ୍ସିତ ହେଉଥିବାବେଳେ ଗଣମାଧ୍ୟମକୁ ନିଜ ଅନୁଭୂତି ବଖାଣିଛନ୍ତି। ସେ ନିଜ ଦୁଇ ପଡ଼ୋଶୀଙ୍କ ସହିତ ତୀର୍ଥଯାତ୍ରାରେ ଯାଇଥିଲେ।
ଏହି ଆକ୍ରମଣରେ ୧୦ ତୀର୍ଥଯାତ୍ରୀ ପ୍ରାଣ ହରାଇଛନ୍ତି। ସେମାନଙ୍କ ମଧ୍ୟରେ ଜଣେ ଶିଶୁ ମଧ୍ୟ ରହିଛି। ଘଟଣା ପରେ ଏହାର ଏନଆଇଏ ତଦନ୍ତ ନିର୍ଦ୍ଦେଶ ଦିଆଯାଇଛି। ସୁରକ୍ଷାକର୍ମୀମାନେ ସ୍ଥାନୀୟ ଅଞ୍ଚଳକୁ ସିଲ୍ କରି ସର୍ଚ୍ଚ ଅପରେଶନ ଜାରି ରଖିଛନ୍ତି। ଉପରାଜ୍ୟପାଳ ମନୋଜ ସିହ୍ନା ଏହି ଘଟଣାକୁ କଡ଼ା ନିନ୍ଦା କରିବା ସହିତ ପ୍ରାଣ ହରାଇଥିବା ଶ୍ରଦ୍ଧାଳୁଙ୍କ ପରିବାର ପ୍ରତି ସମବେଦନା ଜଣାଇଛନ୍ତି।
