ସମାଜ ଡିଜିଟାଲ ଡେସ୍କ: ଆନ୍ଧ୍ରପ୍ରଦେଶ ମୁଖ୍ୟମନ୍ତ୍ରୀ ହେବାକୁ ଯାଉଛନ୍ତି ତେଲୁଗୁ ଦେଶମ ପାର୍ଟି (ଟିଡିପି) ମୁଖ୍ୟ ଚନ୍ଦ୍ରବାବୁ ନାଇଡୁ। କେବଳ ମୁଖ୍ୟମନ୍ତ୍ରୀ ନୁହନ୍ତି, କେନ୍ଦ୍ରରେ ମେଣ୍ଟ ସରକାର ଗଢ଼ିବାରେ ବି ତାଙ୍କ ଦଳର ଭୂମିକା ଗୁରୁତ୍ୱପୂର୍ଣ୍ଣ। ତେବେ କିଙ୍ଗ୍ମେକର ସାଜିଥିବା ଚନ୍ଦ୍ରବାବୁଙ୍କୁ ବ୍ୟବସାୟରେ ବି ବଡ଼ ସଫଳତା ମିଳିଛି। ୫ ଦିନ ଭିତରେ ତାଙ୍କ ପରିବାରର ସମ୍ପତ୍ତି ୮୫୮ କୋଟି ଟଙ୍କା ବୃଦ୍ଧି ପାଇଛି।
ଚନ୍ଦ୍ରବାବୁଙ୍କ ପରିବାରର ହେରିଟେଜ ଫୁଡ୍ସ ନାମରେ ଏକ ଡାଏରୀ କମ୍ପାନୀ ରହିଛି। ଗତ ମେ ୩୧ ତାରିଖରୁ ଜୁନ ୪ ତାରିଖ ମଧ୍ୟରେ ଶେୟାର ବଜାରରେ ତାଙ୍କ କମ୍ପାନୀର ଲାଭାଂଶ ୬୪% ବୃଦ୍ଧି ପାଇଛି। ମେ ୩୧ରେ ହେରିଟେଜ ଫୁଡ୍ସର ଗୋଟିଏ ଶେୟାର ମୂଲ୍ୟ ୪୦୩ ଟଙ୍କା ରହିଥିଲା। ଜୁନ ୧ରେ ନିର୍ବାଚନ ସରିବା ପରେ ଏକଜିଟ ପୋଲ୍ ଫଳାଫଳ ପ୍ରକାଶ ପାଇଥିଲା। ଏହା ପର ଦିନଠାରୁ ହେରିଟେଜ ଫୁଡ୍ସର ଶେୟାର ମୂଲ୍ୟ ବୃଦ୍ଧି ପାଇଥିଲା। ଗତ ଶୁକ୍ରବାର ସୁଦ୍ଧା ଶେୟାର ମୂଲ୍ୟ ୬୪ ପ୍ରତିଶତ ବଢ଼଼ି ୬୬୨ ଟଙ୍କାରେ ପହଞ୍ଚିଥିଲା। ଏହି ବୃଦ୍ଧି ଯୋଗୁ ୫ ଦିନ ମଧ୍ୟରେ କମ୍ପାନୀର ମାଲିକାନା ଥିବା ନାଇଡୁ ପରିବାରର ୮୫୮ କୋଟି ଟଙ୍କା ଲାଭ ହୋଇଛି।
ଏହି ଡାଏରୀ କମ୍ପାନୀରେ ନାଇଡୁ ପରିବାରର ୩୫.୭ ପ୍ରତିଶତ ଅଂଶଧନ ରହିଛି। ସେଥିରୁ ଚନ୍ଦ୍ରବାବୁଙ୍କ ସ୍ତ୍ରୀ ନାରା ଭୁବନେଶ୍ୱରୀଙ୍କ ନାମରେ ୨୪.୪ ପ୍ରତିଶତ ଶେୟାର ରହିଛି। ସେ କମ୍ପାନୀର ପରିଚାଳନା ନିର୍ଦ୍ଦେଶକ ଅଛନ୍ତି। ଏହା ସହିତ ପୁଅ ନାରା ଲୋକେଶଙ୍କନାମରେ ୧୦.୮ ପ୍ରତିଶତ ଅଂଶଧନ ଥିବାବେଳେ ପରିବାରର ଅନ୍ୟ ସଦସ୍ୟଙ୍କ ନାମରେ ସ୍ୱଳ୍ପ ଅଂଶଧନ ରହିଛି।
