ସମାଜ ଡିଜିଟାଲ ଡେସ୍କ: କେନ୍ଦ୍ରରେ ବିଜେପି ନେତୃତ୍ୱାଧୀନ ଜାତୀୟ ଗଣତାନ୍ତ୍ରିକ ମେଣ୍ଟ (ଏନଡିଏ) ସରକାର ଗଠନ କରିବା ଏକ ପ୍ରକାର ନିଶ୍ଚିତ ହୋଇଛି। ସହଯୋଗୀ ଦଳ ଟିଡିପି, ଜେଡିୟୁ, ଏଲଜେପିଆରଭି ପ୍ରମୁଖଙ୍କ ସହାୟତାରେ ଏନଡିଏ କ୍ଷମତାସୀନ ହେବ। ତେବେ ସମର୍ଥନ ଦେବା ବଦଳରେ ମୁଖ୍ୟ ସହଯୋଗୀ ଦଳ ଟିଡିପି ଏବଂ ଜେଡିୟୁ ସରକାର ନିକଟରେ କିଛି ଦାବି କରିପାରନ୍ତି ବୋଲି ଚର୍ଚ୍ଚା ଆରମ୍ଭ ହେଉଛି।
ଅନ୍ୟତମ ସହଯୋଗୀ ଚନ୍ଦ୍ରବାବୁ ନାଇଡୁଙ୍କ ନେତୃତ୍ୱାଧୀନ ଦଳ ଟିଡିପି ଏଥର ଲୋକସଭା ନିର୍ବାଚନରେ ୧୬ ଆସନ ହାତେଇଛି। ବିଜେପି ପରେ ଏନଡିଏରେ ଟିଡିପି ହେଉଛି ସର୍ବାଧିକ ଆସନ ଜିତିଥିବା ଦଳ। ତେଣୁ ଦଳ ସରକାରରେ କିଛି ଗୁରୁତ୍ୱପୂର୍ଣ୍ଣ ବିଭାଗ ଦାବି କରିବ ବୋଲି କୁହାଯାଉଛି।
ଜାତୀୟ ଗଣମାଧ୍ୟମ ରିପୋର୍ଟ ଅନୁସାରେ, ଚନ୍ଦ୍ରବାବୁ ଏନଡିଏକୁ ସମର୍ଥନ ବଦଳରେ ବାଚସ୍ପତି ପଦବୀ ଆଶାରେ ରହିଛନ୍ତି। ସେ ବାଚସ୍ପତି ପଦ ପାଇଁ ଦାବି କରିପାରନ୍ତି ବୋଲି ଚର୍ଚ୍ଚା ହେଉଛି। ସେହିପରି ୩ଟି କ୍ୟାବିନେଟ ମନ୍ତ୍ରୀ ପଦ ଏବଂ ୨ଟି ରାଷ୍ଟ୍ରମନ୍ତ୍ରୀ ପଦବୀ ପାଇଁ ମଧ୍ୟ ଦାବି କରିପାରନ୍ତି।
