ଗୋପାଳପୁର: ଗୋପାଳପୁର ଥାନା ଅନ୍ତର୍ଗତ ଗୋଳାବନ୍ଧ ଆର୍ମି ଏ ଡ଼ି କଲେଜ ପରିସରରୁ ଜଣେ ଯୁବକଙ୍କ ଝୁଲନ୍ତା ଅବସ୍ଥାରେ ଏକ ମୃତ ଦେହକୁ ପୁଲିସ ଉଦ୍ଧାର କରିଛି। ମୃତକ ଜଣକ ହେଲେ ଉତ୍ତର ପ୍ରଦେଶର ରାହୁଲ ଅଗ୍ରୱାଲ (୩୭)। ମୃତ ରାହୁଲ ନିଜ ପରିବାର ସହ ନିକଟସ୍ଥ ମାୟାପୁରିରେ ଏକ ଭଡ଼ା ଘରେ ରହୁଥିଲେ। ସେ ଆର୍ମି କ୍ୟାମ୍ପସ ପରିସରରେ ଦୁଇ ବର୍ଷ ହେଲା ଏକ କ୍ୟାଣ୍ଟିନ ଚଳାଉ ଥିଲେ। ସେ ଗତକାଲି ଘରକୁ ଫେରିନଥିଲେ। ଆଜି ଭୋର ସମୟରେ ତାଙ୍କ ସ୍ତ୍ରୀ କ୍ୟାଣ୍ଟିନକୁ ଯାଇ ଦେଖିବା ବେଳେ ଭିତର ପଟେ କବାଟ ବନ୍ଦ ଥିବାରୁ ସ୍ଥାନୀୟ ଅଧିକାରୀ ମାନଙ୍କୁ ଜଣାଇଥିଲେ। ଅଧିକାରୀ ମାନେ ପହଞ୍ଚି କବାଟ ଭାଙ୍ଗି ଦେଖିବା ବେଳକୁ ରାହୁଲ ଏକ ପ୍ଲାଷ୍ଟିକ ଦଉଡିରେ ଝୁଲନ୍ତା ଅବସ୍ଥାରେ ଥିଲେ। ଏ ନେଇ ମୃତକ ରାହୁଲଙ୍କ ସ୍ତ୍ରୀ ଗୋପାଳପୁର ଥାନାରେ ଲିଖିତ ଅଭିଯୋଗ କରିଥିଲେ। ଅଭିଯୋଗ ପ୍ରକାରେ ପୁଲିସ ଘଟଣାସ୍ଥଳରେ ପହଞ୍ଚି ଝୁଲନ୍ତା ଶବକୁ ଉଦ୍ଧାର କରିଥିଲେ। ଅଭିଯୋଗକୁ ଭିତ୍ତି କରି ପୁଲିସ ଏକ ଅପମୃତ ମାମଲା ରୁଜୁ କରି ଶବ ବ୍ୟବଛେଦ ନିମନ୍ତେ ପଠାଇବା ସହ ତଦନ୍ତ କରୁଛି।
Comments are closed.