ପାଟଣା: ବୃଦ୍ଧ ବୃଦ୍ଧାଙ୍କ ଘରକୁ ଯାଇ ମତଦାନ ପାଇଁ ନିର୍ବାଚନ ଆୟୋଗଙ୍କ ପକ୍ଷରୁ ବ୍ୟବସ୍ଥା ଗ୍ରହଣ କରାଯାଇଥିବା ବେଳେ ଜଣେ ୭୫ ବର୍ଷର ବୃଦ୍ଧାଙ୍କୁ ଭତ୍ତା ପ୍ରଦାନ କ୍ଷେତ୍ରର ସମସ୍ୟାକୁ ଯଥାଶୀଘ୍ର ସମାଧାନ କରିବା ପରିବର୍ତ୍ତେ ତାଙ୍କୁ ବାରମ୍ବାର ବ୍ଲକକୁ ଦୌଡା ଯାଉଥିବା ଦେଖିବାକୁ ମିଳିଛି। ଏହି ଘଟଣା ପାଟଣା ବ୍ଲକ ଅନ୍ତର୍ଗତ ଖିରେଇଟାଙ୍ଗିରୀ ଗ୍ରାମର ସିରା ପାତ୍ରଙ୍କ କ୍ଷେତ୍ରରେ ଘଟିଛି। ଖିରେଇଟାଙ୍ଗିରୀ ଗ୍ରାମର ସିରା ପାତ୍ର ୨୦୧୩-୧୪ ମସିହାରୁ ବାର୍ଦ୍ଧକ୍ୟ ଭତ୍ତା ପାଉଛନ୍ତି। ତାଙ୍କୁ ଭତ୍ତା ପରିଚୟ ପତ୍ର ମଧ୍ୟ ମିଳିଛି। ତାଙ୍କର ଓଡ଼ିଶା ଗ୍ରାମ୍ୟ ବ୍ୟାଙ୍କ ଓ ପୋଷ୍ଟାଲ ପେମେଣ୍ଟ ବ୍ୟାଙ୍କରେ ଖାତା ରହି ଥିଲେ ମଧ୍ୟ ତାଙ୍କ ଜମା ଖାତାକୁ ଭତ୍ତା ଅର୍ଥ କିଛି ମାସ ହେଲା ଯାଉନାହିଁ। କୁହାଯାଇଛି କି ତାଙ୍କର କେୱାଇସି ଅପଟୁଡେଟ ହୋଇ ନଥିବାରୁ ତାଙ୍କୁ ଭତ୍ତା ପ୍ରଦାନ କ୍ଷେତ୍ରରେ ସମସ୍ୟା ସୃଷ୍ଟି ହେଉଛି। ଏହି କାରଣରୁ ପ୍ରଚଣ୍ଡ ଖରାରେ ସେ ଗ୍ରାମରୁ ୩୦ କିଲୋମିଟର ଦୂର ବ୍ଲକ କାର୍ଯ୍ୟାଳୟକୁ ଇତି ମଧ୍ୟରେ ୩ ଥର ଆସି ଫେରିବା ପରେ ମଧ୍ୟ ତାକୁ ଆହୁରି ୨ରୁ ୩ ଥର ଆସିବାକୁ ପଡିବ ବୋଲି ବ୍ଲକ ସାମାଜିକ ସୁରକ୍ଷା ବିଭାଗର କର୍ମଚାରୀ ତାଙ୍କୁ କହୁଛନ୍ତି। ଏପରିକି ଏହି ପ୍ରତିନିଧିଙ୍କୁ ମଧ୍ୟ କର୍ମଚାରୀ ସମାନ ଉତ୍ତର ରଖି ଥିବାରୁ କେୱାଇସି ଅପଟୁଡେଟ କରିବା ପାଇଁ କେତେଦିନ ଲାଗେ ଓ ଏହି ବୃଦ୍ଧା ଜଣକୁ ଜାଣିଶୁଣି ହଇରାଣ କରାଯାଉଛି କି ତାହା ତଦନ୍ତ ସାପେକ୍ଷ ହୋଇଥିବାରୁ ଜିଲ୍ଲାପାଳ ଏଥିପ୍ରତି ଦୃଷ୍ଟି ଦେଇ ବୃଦ୍ଧାଙ୍କୁ ତ୍ୱରିତ ନ୍ୟାୟ ଦେବାକୁ ଦାବି ହୋଇଛି।
Popular Categories
Previous article
Next article