‘ପେଥାଇ’ର ପ୍ରଭାବ ; କ୍ଷତିଗ୍ରସ୍ତ ଚାଷୀଙ୍କୁ ମିଳିବ ସହାୟତା

ଭୁବନେଶ୍ବର : ସାମୁଦ୍ରିକ ଝଡ ‘ପେଥାଇ’ ଦୁର୍ବଳ ହୋଇ ବାତ୍ୟାର ରୂପ ନେଇଛି। ଏହାର ପ୍ରଭାବରେ ସାରା ରାଜ୍ୟରେ ସାମାନ୍ୟରୁ ମଧ୍ୟମ ଧରଣର ବର୍ଷା ଲାଗି ରହିଛି। ବର୍ଷା ଯୋଗୁଁ ଅନେକ ସ୍ଥାନରେ ଧାନ ଫସଲ ନଷ୍ଟ ହୋଇଥିବା ଖବର ମିଳିଛି। ବିଲରେ ପାଚିଲା ଧାନ ଫସଲ ଏବଂ କଟା ହୋଇଥିବା ଧାନ ଗଜା ହେବାର ସମ୍ଭାବନା ସୃଷ୍ଟି ହୋଇଛି। ତେବେ ଧାନ ଫସଲ କ୍ଷତି ପାଇଁ ସହାୟତା ମିଳିବ ବୋଲି ସ୍ବତନ୍ତ୍ର ରିଲିଫ କମିଶନର ବିଷ୍ଣୁପଦ ସେଠୀ ସୂଚନା ଦେଇଛନ୍ତି। ପେଥାଇ ପ୍ରଭାବରେ ରାଜ୍ୟର କିଛି ସ୍ଥାନରେ ପ୍ରବଳ ବର୍ଷା ହୋଇଛି। ଝାରସୁଗୁଡାରେ ୭୫.୫ମିମି ଓ ସମ୍ବଲପୁରରେ ୭୫.୩ମିମି ବର୍ଷା ରେକର୍ଡ କରାଯାଇଛି। ବର୍ଷା ଯୋଗୁଁ ଧାନ ଫସଲ ନଷ୍ଟ ହୋଇଥିଲେ କ୍ଷତିଗ୍ରସ୍ତଙ୍କୁ ସହାୟତା ପ୍ରଦାନ କରାଯିବ ବୋଲି ସରକାର ନିଷ୍ପତ୍ତି ନେଇଛନ୍ତି । ଫସଲ ବୀମା ଅନୁସାରେ ସହାୟତା ସହ ଏସ୍‌ଡିଆର୍‌ଏଫରୁ ସହାୟତା ଦିଆଯିବ ବୋଲି କୁହାଯାଇଛି। ଜିଲ୍ଲାପାଳମାନଙ୍କ ଠାରୁ କ୍ଷୟକ୍ଷତି ରିପୋର୍ଟ ମିଳିବା ପରେ ତାକୁ ଅନୁଧ୍ୟାନ କରାଯିବ ବୋଲି ରିଲିଫ କମିଶନର ସୂଚନା ଦେଇଛନ୍ତି।