ଗଞ୍ଜାମ: ଗଞ୍ଜାମ ବ୍ଲକ ଅନ୍ତର୍ଗତ ହୁମା ହାଟ ପଡ଼ିଆଠାରେ ହେଉଥିବା ପ୍ରସିଦ୍ଧ ପଞ୍ଚୁ ଦୋଳ ଯାତ୍ରା ପ୍ରବଳ ଉତ୍ସାହ, ଉଦ୍ଧିପନା, ଜନସାମଗ ମଧ୍ୟରେ ରବିବାର ପୂର୍ବାହ୍ନରୁ ଆରମ୍ଭ ହୋଇଛି। ପଞ୍ଚୁ ଦୋଳ ଯାତ୍ରାକୁ ଯାଉଥିବା ସମସ୍ତ ଠାକୁର ନିଜ ନିଜର ସାହି ଗ୍ରାମ ବିରାଟ ଶୋଭାଯାତ୍ରାରେ ପରିକ୍ରମା ସାରି ହୁମାସ୍ଥିତ ଜାତୀୟ ରାଜପଥରେ ଏକତ୍ରିତ ହୋଇଥିଲେ। ସେଠାରୁ କ୍ରମାନ୍ୱୟରେ ଯାତ୍ରା ପଡ଼ିଆ ଅଭିମୁଖେ ଯାଇଥିଲେ। ଗଡ଼ ହୁମା ଛକ ନିକଟରେ ହରି ହର ଭେଟ କାର୍ଯ୍ୟକ୍ରମ ହୋଇଥିଲା। ପରେ ସମସ୍ତ ଠାକୁର ଯାତ୍ରା ପଡ଼ିଆରେ ପହଞ୍ଚିଥିଲେ। ପୂର୍ବରୁ ନିର୍ଦ୍ଧାରିତ ଠାକୁରମାନଙ୍କ ସ୍ଥାନରେ ଠାକୁରମାନେ ବସିଥିଲେ। ତା’ପରେ ସମସ୍ତ ଠାକୁରଙ୍କ ଆଗରେ କୀର୍ତ୍ତନ ମଣ୍ଡଳୀ ଦ୍ଵାରା ଘଣ୍ଟ ମୃଦଙ୍ଗ ବାଦ୍ୟ ପରିବେଷଣ ହୋଇଥିଲା। ଅପରାହ୍ନରେ ଦୁଇଟି ରାମାୟଣ ନାଟକ ପରିବେଷଣ ହୋଇଥିଲା। ତାହା ସୋମବାର ମଧ୍ୟାହ୍ନରେ ସମାପିତ ହେବ। ସୋମବାର ଦିନ ମହା ମିଳନ ପର୍ବ ଅନୁଷ୍ଠିତ ହେବା ପରେ ଯାତ୍ରା ସମାପିତ ହେବା ସହ ପୁଣି ପଟୁଆର ଯୋଗେ ଠାକୁରମାନେ ନିଜ ନିଜ ଗ୍ରାମକୁ ଫେରିବେ। ଏହି ଯାତ୍ରା ଦେଖିବାକୁ ବହୁ ଶ୍ରଦ୍ଧାଳୁ ଭିଡ଼ ହୋଇଥିଲା। ଯାତ୍ରା କମିଟି ଓ ପୁଲିସ ପକ୍ଷରୁ ଶାନ୍ତି, ଶୃଙ୍ଖଳା ସହ ଯାତ୍ରା ପରିଚାଳନା କରାଯାଇଥିଲା। ଏହି ଯାତ୍ରାକୁ ହୁମା ଗ୍ରାମର ବିଭିନ୍ନ ସାହି ଯଥା ବଡ଼ ସାହି, ଗୋପୀନାଥ ସାହି, କେଉଟ ସାହି ଓ ଅନ୍ୟାନ ସାହିର ଛଅଟି ଠାକୁର ଏବଂ କଣ୍ଟିଆଗଡ଼, ଖଟୁଆ କୁଦା, ଝାଡ଼ କୁଦା, ଗଡ଼ ହୁମା, ବେଲପଡା, କଳାଯମୁନା, ଲୁଂଘୁରି ପ୍ରଭୃତି ଗ୍ରାମର ମୋଟ ୧୩ଠାକୁର ଏହି ଯାତ୍ରାକୁ ଆସିଥିଲେ। ସେହିପରି ଖଣ୍ଡ ଦେଉଳି ଗ୍ରାମରେ ଓ ବଳରାମପୁର ଗ୍ରାମରେ ମଧ୍ୟ ପଞ୍ଚୁ ଦୋଳ ଯାତ୍ରା ଅନୁଷ୍ଠିତ ହେଉଛି। ରମ୍ଭା ଥାନା ପକ୍ଷରୁ ଯାତ୍ରା ପାଇଁ ବ୍ୟାପକ ବନ୍ଦୋବସ୍ତ କରାଯାଇଥିଲା।
Comments are closed.