ବଲାଙ୍ଗିର : ବଲାଙ୍ଗିର ସଦର ଥାନା ଅନ୍ତର୍ଗତ ଖୁଜେନପାଲି ଗାଁର ଧୀରମନ ବକୁଳଙ୍କ ପୁଅ ତ୍ରିନାଥ ବକୁଳଙ୍କର ଅଂଶୁଘାତରେ ମୃତ୍ୟୁ ହୋଇଥିବା ପରିବାର ପକ୍ଷରୁ ଅଭିଯୋଗ ହୋଇଛି। ସୂଚନା ଅନୁସାରେ, ତ୍ରିନାଥ ଶନିବାର ମାଙ୍କୁ ବାଇକରେ ନେଇ ବଲାଙ୍ଗିର ତେଲିଗୋଠ ପଡ଼ାରେ ଚାଲିଥିବା ଦଶାହ କାର୍ଯ୍ୟରେ ଯୋଗ ଦେଇଥିଲେ। ଅପରାହ୍ନ ପ୍ରାୟ ୨ଟାରେ ଟାଣ ଖରାରେ ବାଇକରେ ମା’ଙ୍କ ସହ ଗାଁକୁ ଫେରିଥିଲେ। ଘରେ ପହଞ୍ଚିବା ପରେ ତ୍ରିନାଥ ଅସୁସ୍ଥ ହୋଇ ପଡ଼ିଥିଲେ। ଦେହରୁ ଝାଳ ବାହାରିବା ସହ ଶୋଷ ଅନୁଭବ କରିଥିଲେ। ପରିବାର ଲୋକେ ପାଣି ପିଆଇବା ପରେ ବି ସେ ସୁସ୍ଥ ହୋଇନଥିଲେ। ଶେଷରେ ତ୍ରିନାଥଙ୍କୁ ଚିକିତ୍ସା ପାଇଁ ବଲାଙ୍ଗିର ଭୀମଭୋଇ ଡାକ୍ତରଖାନାରେ ଭର୍ତ୍ତି କରିଥିଲେ। ଡାକ୍ତର ସ୍ବାସ୍ଥ୍ୟ ପରୀକ୍ଷା ପରେ ତ୍ରିନାଥଙ୍କୁ ମୃତ ଘୋଷଣା କରିଥିଲେ। ତ୍ରିନାଥ ଘରର ବଡ଼ପୁଅ ହୋଇଥିବାବେଳେ ତାଙ୍କ ପତ୍ନୀ, ୧ ବର୍ଷର ଶିଶୁପୁତ୍ର, ବାପା-ମାଁ, ସାନଭାଇ, ଅଜା-ଆଇ ଓ ସମ୍ପର୍କୀୟ ରହିଛନ୍ତି। ଶବ ବ୍ୟବଚ୍ଛେଦ ପରେ ପରିବାର ଲୋକଙ୍କୁ ହସ୍ତାନ୍ତର କରାଯାଇଛି। ଅଂଶୁଘାତରେ ତ୍ରିନାଥଙ୍କ ମୃତ୍ୟୁ ହୋଇଥିବା ନେଇ ବଡ଼ବାପା କାମଦେବ ବକୁଳ ଓ ପରିବାର ଲୋକେ ଅଭିଯୋଗ କରିଛନ୍ତି। ଅନ୍ୟପକ୍ଷରେ ଶବ ଦେହରେ ଅଂଶୁଘାତର କୌଣସି ଲକ୍ଷଣ ନଥିବା ବ୍ୟବଚ୍ଛେଦ କରିଥିବା ଡାକ୍ତର ଚନ୍ଦନ ସାମନ୍ତରାୟ ପ୍ରକାଶ କରିଛନ୍ତି। ତ୍ରିନାଥଙ୍କ ପରିବାରକୁ ସରକାରୀ ସହାୟତା ଯୋଗାଇ ଦେବାକୁ ପରିବାର ଓ ଗ୍ରାମବାସୀ ଦାବି କରିଛନ୍ତି। ଅଂଶୁଘାତରେ ତ୍ରିନାଥଙ୍କ ମୃତ୍ୟୁ ଅଭିଯୋଗ ପରେ ପ୍ରଶାସନ ପକ୍ଷରୁ ତଦନ୍ତ ଆରମ୍ଭ ହୋଇଛି। ବଲାଙ୍ଗିର ତହସିଲଦାର ସୁନୀଲ ମେହେରଙ୍କ ନିର୍ଦେଶକ୍ରମେ ଖୁଜେନପାଲି ରାଜସ୍ବ ନିରୀକ୍ଷକ ସ୍ବପ୍ନ ପୁଟେଲ ଗାଁରେ ପହଞ୍ଚି ପଚରାଉଚୁରା କରିଛନ୍ତି।
Popular Categories
Previous article
Next article