ଇସଲାମାବାଦ- ପାକିସ୍ତାନର ସାଧାରଣ ନିର୍ବାଚନରେ କୌଣସି ବି ରାଜନୈତିକ ଦଳକୁ ପୂର୍ଣ୍ଣ ବହୁମତ ମିଳିନାହିଁ । ପୂର୍ବତନ ପ୍ରଧାନମନ୍ତ୍ରୀ ଇମରାନ୍ ଖାନ୍ଙ୍କ ସମର୍ଥନରେ ଅନେକ ସ୍ୱାଧୀନ ପ୍ରାର୍ଥୀ ନିର୍ବାଚନ ଜିତିଥିବା କଥା ସେ ଦାବୀ କରିଛନ୍ତି । ପୂର୍ବତନ ପ୍ରଧାନମନ୍ତ୍ରୀ ନଓ୍ୱାଜ ସରିଫ ମଧ୍ୟ ତାଙ୍କ ଦଳ ଅଧିକ ଆସନ ଜିତିଥିବା କଥା କହିଛନ୍ତି । ପାକିସ୍ତାନ ସେନା ଏବେ ନଓ୍ୱାଜ ସରିଫଙ୍କୁ ପ୍ରଧାନମନ୍ତ୍ରୀ ପଦ ଦେବା ପାଇଁ ଚାହୁଛି ।
ସରିଫ ସମସ୍ତ ରାଜନୈତିକ ଦଳ ଏବେ ଏକାଠି ହୋଇ ପାକିସ୍ତାନର ଉନ୍ନତି ପାଇଁ କାମ କରିବା ପାଇଁ ଆହ୍ୱାନ ଦେଇଛନ୍ତି । ପାକିସ୍ତାନ ସେନା ଚଳିତ ନିର୍ବାଚନରେ ନଓ୍ୱାଜଙ୍କ ପିଏମ୍ଏଲ୍ ଏନ୍କୁ ସମର୍ଥନ କରୁଥିଲା । ନଓ୍ୱାଜ ସରିଫଙ୍କ ଦଳ ମଧ୍ୟ ନିର୍ବାଚନ ଜିତିବ ବୋଲି ଦୃଢ ଆଶାବାଦୀ ଥିଲା । ଇମରାନ୍ଙ୍କ ଦଳକୁ ଅସିଦ୍ଧ ଘୋଷଣା କରାଯାଇଥିଲା । ମାତ୍ର ତାଙ୍କ ଦଳ ସମର୍ଥିତ ସ୍ୱାଧୀନ ପ୍ରାର୍ଥୀମାନେ ୯୨ଟି ଆସନରେ ବିଜୟୀ ହୋଇଛନ୍ତି । ପିଏମ୍ଏଲ୍ ଏନ୍ , ନଓ୍ୱାଜ ସରିଫଙ୍କ ଦଳ ୭୩ଟି ଆସନରେ ବିଜୟ ଲାଭ କରିଛି । ପିପିପି ୫୪ଟି ଏବଂ ଏମ୍କ୍ୟୁଏମ୍୧୭ଟି ଆସନରେ ଜିତିଛି ।
୨୬୫ରୁ ୨୫୫ ଆସନର ଫଳାଫଳ ଘୋଷଣା ହୋଇସାରିଲାଣି । ସରକାର ଗଠନ ପାଇଁ ଗୋଟିଏ ଦଳକୁ ଅତି କମ୍ରେ ୧୩୩ଟି ଆସନରେ ବିଜୟ ଲାଭ କରିବା ଦରକାର । ଆଉ ୬୦ ଜଣ ସଦସ୍ୟଙ୍କୁ ଚୟନ କରାଯାଉଥିବାରୁ ୩୩୬ ଆସନ ବିଶିଷ୍ଟ ପାକିସ୍ତାନ ସଂସଦରେ ୧୬୯ ହେଲେ ବହୁସଂଖ୍ୟକ ସରକାର ଗଠନ କରାଯାଇ ପାରିବ ।
ନଓ୍ୱାଜ ସରିଫ ତିନିଥର ପାକିସ୍ତାନର ପ୍ରଧାନମନ୍ତ୍ରୀ ଭାବେ କାର୍ଯ୍ୟଭାର ତୁଲାଇଛନ୍ତି । ଏବେ ସେ ସ୍ୱାଧୀନ ଏବଂ ଅନ୍ୟ ଦଳମାନଙ୍କର ସମର୍ଥନରେ ସରକାର ଗଠନ କରିବେ ବୋଲି ଆଶା କରିଛନ୍ତି । ଏବେ ସେ ପିପିପି ନେତା ବିଲଓ୍ୱାଲ ଭୁଟୋ ଏବଂ ତାଙ୍କ ବାପା ଅସିଫ ଅଲି ଭୁଟୋଙ୍କ ସହ ଆଲୋଚନା କରିଛନ୍ତି । ତେବେ ନଓ୍ୱାଜ ସରିଫ ସେନାର ସହାୟତାରେ ସରକାର ଗଠନ କରିବା ପାଇଁ ପ୍ରୟାସ ଆରମ୍ଭ କରିଥିବା ବେଳେ ଇମରାନ୍ ଖାନ୍ ମଧ୍ୟ ସରକାର ଗଠନ ପାଇଁ ସଜବାଜ ହେଉଛନ୍ତି ।
