ନୂଆଦିଲ୍ଲୀ : ପେଟିଏମ୍ ପେମେଣ୍ଟ୍ସ ବ୍ୟାଙ୍କ ଉପରେ ୩୧ ଜାନୁୟାରୀରେ ରିଜର୍ଭ ବ୍ୟାଙ୍କ ବ୍ୟାନ୍ ଲଗାଇ ଦେଇଥିଲା । ଫାଷ୍ଟ୍ୟାଗ୍, ଓ୍ବାଲେଟ୍ ଏବଂ ଏହାର ବ୍ୟାଙ୍କ ଆକାଉଣ୍ଟରେ ପଇସା ଜମା କରିବା ଉପରେ ମଧ୍ୟ ରୋକ ଲଗାଯାଇଛି । ରିଜର୍ଭ ବ୍ୟାଙ୍କର ସୂଚନା ଅନୁସାରେ ପେଟିଏମର ବ୍ୟାଙ୍କିଂ ସେବା ୨୯ ଫେବୃୟାରୀରୁ କାମ କରିବନି । ନିୟମ ଉଲ୍ଲଙ୍ଗନ ଯୋଗୁଁ ପେଟିଏମ୍ ଉପରେ କଟକଣା ଲଗାଯାଇଛି । କିନ୍ତୁ ଆପଣ ଜାଣିଛନ୍ତି କି, କେଉଁ କେଉଁ ଭୁଲ୍ ଯୋଗୁଁ ପେଟିଏମ୍ ରିଜର୍ଭ ବ୍ୟାଙ୍କର ନଜରକୁ ଆସିଲା ? ଆସନ୍ତୁ ଜାଣିବା…
ପେଟିଏମ୍ ପେମେଣ୍ଟ ବ୍ୟାଙ୍କ ଉପରେ ପ୍ରତିବନ୍ଧକ ଲଗାଇବାର ମୁଖ୍ୟ କାରଣ ହେଉଛି ସଠିକ ପରିଚୟ ବିନା ମଧ୍ୟ ଏଠାରେ କୋଟି କୋଟି ଆକାଉଣ୍ଟ ପ୍ରସ୍ତୁତ ହୋଇଥିଲା । ଏହି ଆକାଉଣ୍ଟ ପାଇଁ କେଓ୍ବାଇସି ପ୍ରକ୍ରିୟା ପୁରା କରାଯାଇନଥିଲା । କେବଳ ଏତିକି ନୁହେଁ, ବିନା ପରିଚୟ ପତ୍ର ବିନା ମଧ୍ୟ କୋଟି କୋଟି ଟଙ୍କାର ନେଣଦେଣ ହେଉଥିଲା । ଯାହା ଫଳରେ ମନି ଲଣ୍ଡ୍ରିଂ ଆଶଙ୍କା ସୃଷ୍ଟି ହୋଇଥିଲା ।
ଆଉ ଏକ ବଡ କାରଣ ହେଉଛି ଗୋଟିଏ ପାନ୍ କାର୍ଡରେ ହଜାରରୁ ଅଧିକ ୟୁଜର୍ସଙ୍କ ଆକାଉଣ୍ଟ ଯୋଡି ହୋଇଥିଲା । ଏହା ବ୍ୟତୀତ ରିଜର୍ଭ ବ୍ୟାଙ୍କ ଜାଣିବାକୁ ପାଇଲା କି ପେଟିଏମ୍ ବ୍ୟାଙ୍କ ନିୟମର ପାଳନ କରୁନି । ରାଜସ୍ବ ସଚିବ ସଞ୍ଜୟ ମଲହୋତ୍ରା କହିଛନ୍ତି କି ଯଦି ଫଣ୍ଡର ହେରାଫେରିର କୌଣସି ପ୍ରମାଣ ମିଳେ ତେବେ ଇଡି ପେଟିଏମ୍ ପେମେଣ୍ଟ୍ସ ବ୍ୟାଙ୍କ ଉପରେ ଯାଞ୍ଚ କରିବ । ଅନ୍ୟପଟେ ପେଟିଏମ୍ ସ୍ପଷ୍ଟ କରିଛି କମ୍ପାନୀ କିମ୍ବା ଏହାର ସିଇଓ ବିଜୟ ଶେଖର ଶର୍ମା ମନି ଲଣ୍ଡ୍ରିଂ ପାଇଁ ଇଡି ଯାଞ୍ଚର ପରିସରରେ ଆସୁନାହାଁନ୍ତି । କହିରଖୁଛୁ ପେଟିଏମ୍ ପେମେଣ୍ଟ୍ସ ବ୍ୟାଙ୍କ ପାଖରେ ପ୍ରାୟ ୩୫ କୋଟି ଇ-ଓ୍ବାଲେଟ୍ ଥିଲା । ଏଥିରୁ ପ୍ରାୟ ୩୧ କୋଟି ଚାଲୁନି । ଅନ୍ୟ ୪ କୋଟି ଆକାଉଣ୍ଟରେ ପଇସା ନାହିଁ କିମ୍ବା ବହୁତ କମ୍ ପଇସାରେ ଚାଲୁଛି । ଅନ୍ୟପଟେ ଲକ୍ଷ ଲକ୍ଷ ଆକାଉଣ୍ଟରେ କେଓ୍ବାଇସି ଅପଡେଟ୍ ହୋଇନି । ଏହି ସବୁ କାରଣ ଯୋଗୁଁ ରିଜର୍ଭ ବ୍ୟାଙ୍କ ନଜରକୁ ଆସିଥିଲା ପେଟିଏମ୍ ପେମେଣ୍ଟ ବ୍ୟାଙ୍କ ।
