ବିଶ୍ବଜିତ୍‌ଙ୍କୁ ପିଟି ମାରିଥିଲା କେୟାର ଟେକର: ସୂଚନା ଦେଲେ ଡିସିପି

ଭୁବନେଶ୍ବର : ଭୁବନେଶ୍ବର ଉପକଣ୍ଠ ବାଲିଅନ୍ତାର ବିଶ୍ବଜିତ୍ ନାୟକ ମୃତ୍ୟୁ ଘଟଣାରେ ନୂଆ ମୋଡ ସାମ୍ନାକୁ ଆସିଛି। ଅଭିଯୁକ୍ତ ମହିଳା ସୁଙ୍କି ରଣାଙ୍କୁ ପୁଲିସ ଗିରଫ କରିଛି। ଭୁବନେଶ୍ବର ଡିସିପି ଘଟଣା ସମ୍ପର୍କରେ ସୂଚନା ଦେଇଛନ୍ତି। ହଠାତ୍ ରାଗିଯାଇ ସୁଙ୍କି ବିଶ୍ବଜିତଙ୍କୁ ହତ୍ୟା କରିଥିବା ଡିସିପି କହିଛନ୍ତି। ଅଭିଯୁକ୍ତ ସୁଙ୍କିଙ୍କ ଘର ଝାରସୁଗୁଡାରେ ହୋଇଥିବା ସୂଚନା ମିଳିଛି। ପୂର୍ବରୁ ମଧ୍ୟ ଏକ ହତ୍ୟା ମାମଲାରେ ସୁଙ୍କି ସଜ୍ଜା କାଟିଛନ୍ତି। ୨୦୦୫ ମସିହାରେ ନିଜ ଯା ଙ୍କୁ ହତ୍ୟା ଅଭିଯୋଗରେ ସୁଙ୍କିଙ୍କୁ ୧୨ ବର୍ଷ ଜେଲ ହୋଇଥିଲା। ନିଜ ସ୍ବାମୀଙ୍କ ସହ ପରକୀୟା ସମ୍ପର୍କକୁ ନେଇ ସୁଙ୍କି ନିଜ ଯାଆଙ୍କୁ ହତ୍ୟା କରିଥିଲେ।

୧୨ବର୍ଷ ଜେଲ ଦଣ୍ଡ ଭୋଗିବା ପରେ ସେ ଏକ ଆଶ୍ରମରେ ରହୁଥିଲେ । ସେହି ଆଶ୍ରମକୁ ବିଶ୍ବଜିତଙ୍କ ମାଆ ଯାଆନ୍ତି।  ଏବଂ ସେହିଠାରେ ହିଁ ବିଶ୍ବଜିତ ସହ ସାକ୍ଷାତ ହୋଇଥିଲା।  ପରେ ସୁଙ୍କି ବିଶ୍ବଜିତର କେୟାର ଟେକର ଭାବେ କାମ କରୁଥିଲେ । ତେବେ ଘଟଣା ଘଟିବା ଦିନ ଆଶ୍ରମକୁ ଯିବାକୁ ଜିଦ କରି ବିଶ୍ବଜିତ୍ ସହ ପାଟିତୁଣ୍ଡ କରିଥିଲେ । ବଚସା ଉଗ୍ର ହେବାରୁ ସୁଙ୍କୁ କାଠ ଫାଳିଆରେ ବିଶ୍ବଜିତଙ୍କୁ ହତ୍ୟା କରିଥିଲା। ପରେ ସେଠାରୁ ଖସି ଯାଇ ସୁଙ୍କି ପୁରୀ ପଳାଇଥିଲେ । ଅଭିଯୁକ୍ତ ସୁଙ୍କିଙ୍କୁ ପୁରୀରୁ ଧରାଯାଇଥିବାବେଳେ ହତ୍ୟାରେ ବ୍ୟବହୃତ ଅସ୍ତ୍ରଶସ୍ତ୍ର ମଧ୍ୟ ଜବତ କରାଯାଇଛି। ତେବେ ଅଧିକ ପଚରାଉଚରା ପାଇଁ ସୁଙ୍କି ଙ୍କୁ ରିମାଣ୍ଡ ଅଣାଯିବା ନେଇ ସୂଚନା ଦେଇଛନ୍ତି ଡିସିପି।