ଭୁବନେଶ୍ୱର : ଚଳିତ ହକି ବିଶ୍ୱକପର ମ୍ୟାଚ୍ ଯେତିକି ଆଗକୁ ବଢିବଢି ଚାଲିଛି; ଟୁର୍ଣ୍ଣାମେଣ୍ଟର ରୋମାଞ୍ଚ ସେତିକି ବୃଦ୍ଧି ପାଇବାରେ ଲାଗିଛି। ସୋମବାର ପୁଲ୍ ‘ଏ’ରେ ସ୍ପେନ୍ ଓ ଫ୍ରାନ୍ସ ମଧ୍ୟରେ ମୁକାବିଲା ହେବ। ଉଭୟ ଦଳ ସେମାନଙ୍କର ପ୍ରଥମ ମ୍ୟାଚରେ ପରାସ୍ତ ହୋଇଥିବାରୁ ଏହି ମ୍ୟାଚର ଗୁରୁତ୍ୱ ଅଧିକ ବୃଦ୍ଧିପାଇଛି। ସ୍ପେନ୍ ପ୍ରଥମ ମ୍ୟାଚରେ ଅଲିମ୍ପିକ୍ ସ୍ୱର୍ଣ୍ଣ ବିଜେତା ଆର୍ଜେଣ୍ଟିନା ନିକଟରୁ ପରାସ୍ତ ହୋଇଥିଲେ ମଧ୍ୟ ଉତ୍ତମ ଖେଳ ପ୍ରଦର୍ଶନ କରିଥିଲା। ଦଳ ପକ୍ଷରୁ ଏନ୍ରିକ୍ ଗୋଞ୍ଜାଲେଜ୍, ଜୋସେପ୍ ରୋମେଉ ଓ ଭିସେଙ୍କ୍ ରୁଇଜ୍ ଗୋଲଦେବାରେ ସକ୍ଷମ ହୋଇଥିଲେ। କ୍ୱାର୍ଟରଫାଇନାଲ ଦୌଡରେ ତିଷ୍ଠିରହିବା ଲାଗି ସ୍ପେନ୍ ପାଇଁ ଉକ୍ତ ମ୍ୟାଚ ବିଜୟ ନିଶ୍ଚିତ ଆବଶ୍ୟକତା ରହିଛି। ଆହତ କାରଣରୁ ବିଶ୍ୱକପରୁ ବାଦ୍ ପଡ଼ିଥିବା ମିଗୁଏଲ ଡିଲାସଙ୍କ ବଦଳରେ ଦଳର ନେତୃତ୍ୱ ନେଉଥିବା ରିକାର୍ଡୋ ସାଞ୍ଚେଜ ଫ୍ରାନ୍ସ ବିପକ୍ଷରେ ବିଜୟ ନେଇ ଢେର ଆଶାବାଦୀ ରହିଛନ୍ତି। ଆମେ ପ୍ରଥମ ମ୍ୟାଚରେ ସାମାନ୍ୟ ତ୍ରୁଟି କରିଥିଲୁ। ଏହାର ଫାଇଦା ଆର୍ଜେଣ୍ଟିନା ଉଠାଇଥିଲା। ୨ୟ ମ୍ୟାଚରେ ତ୍ରୁଟିକୁ ସୁଧାରି ଖେଳିବା ଉପରେ ଗୁରୁତ୍ୱ ଦେବୁ ବୋଲି ଅଧିନାୟକ ସାଞ୍ଚେଜ୍ କହିଛନ୍ତି। ଅନ୍ୟପକ୍ଷରେ ଫ୍ରାନ୍ସ ମଧ୍ୟ ବିଶ୍ୱକପରେ ପ୍ରଥମ ବିଜୟ ଲାଗି ବ୍ୟଗ୍ରରହିଛି। ପ୍ରଥମ ମ୍ୟାଚରେ ନ୍ୟୁଜିଲାଣ୍ଡ ନିକଟରୁ ୧-୦ ଗୋଲରେ ପରାସ୍ତ ହୋଇଥିବା ଦଳ ସ୍ପେନ ବିପକ୍ଷରେ ବିଜୟ ନେଇ ଆଶା ରଖିଛି। ଅଧିନାୟକ ଭିକ୍ଟର ଚାର୍ଲେଟ ନ୍ୟୁଜିଲାଣ୍ଡ ବିପକ୍ଷରେ ଭଲ ଖେଳି ଗୋଟିଏ ଗୋଲ ଦେଇଥିଲେ। ଟମ୍ ଜେନ୍ଷ୍ଟିସ, ଭିକ୍ଟର ଲକ୍ଉଡ୍ ପ୍ରମୁଖ ଭଲ ଫର୍ମରେ ରହିଥିବାରୁ ଦଳ ସ୍ପେନକୁ ପରାସ୍ତ କରିବା ନେଇ ଆଶା ରଖିଛି। ବିଶ୍ୱକପରେ ତିଷ୍ଠିରହିବା ଲାଗି ସ୍ପେନ ବିପକ୍ଷ ମ୍ୟାଚ ଆମ ପାଇଁ ଗୁରୁତ୍ୱପୂର୍ଣ୍ଣ। ଏବେ ଆମକୁ ଶ୍ରେଷ୍ଠ ଖେଳ ପ୍ରଦର୍ଶନର ସମୟ ଆସିଛି ବୋଲି ପ୍ରଶିକ୍ଷକ ଜିରାନ ଡେଲ୍ମି କହିଛନ୍ତି।
Popular Categories
Previous article
Next article