ବୁଲନ୍ଦସହର- ଉତ୍ତରପ୍ରଦେଶର ବୁଲନ୍ଦ ସହରରେ ବିଦ୍ୟୁତ୍ ବିଭାଗର କର୍ମଚାରୀମାନେ ବାକିଥିବା ବିଦ୍ୟୁତ୍ ବିଲ୍ ଆଦାୟ କରିବା ପାଇଁ ଯାଇଥିଲେ । ଉତ୍ତରପ୍ରଦେଶ ପଶ୍ଚିମାଞ୍ଚଳ ବିଦ୍ୟୁତ୍ ବିତରଣ ନିଗମ ଲିମିଟେଡ୍ର କର୍ମଚାରୀମାନେ ବୁଲନ୍ଦରସହରର ଜ୍ଞାନ ଲୋକ କଲୋନୀରେ ଥିବା ରାଜେନ୍ଦ୍ର ଚୌଧୁରୀ ନାମକ ବ୍ୟକ୍ତିଙ୍କ ଘରକୁ ବାକିଥିବା ବିଦ୍ୟୁତ୍ ବିଲ୍ ଆଦାୟ କରିବା ପାଇଁ ଯାଇଥିଲେ ।
ରାଜେନ୍ଦ୍ରଙ୍କର ୩.୫୭ ଲକ୍ଷ ଟଙ୍କାରୁ ଅଧିକ ବିଦ୍ୟୁତ ବିଲ୍ ବାକିଥିଲା । ବିଦ୍ୟୁତ୍ ବିଭାଗର କନିଷ୍ଠ ଯନ୍ତ୍ରୀ ଜ୍ୟୋତି ଭାସ୍କର ସିହ୍ନା, ଏସ୍ଡିଓ ରୀନା ଏବଂ ସୁଧୀର, ଇବାଲ୍ ଏବଂ ଇରସାଦ୍ ନାମକ କର୍ମଚାରୀ ଯାଇଥିଲେ । ବିଦ୍ୟୁତ୍ ବିଲ୍ ଆଦାୟ କରିବାକୁ ପ୍ରଥମେ କଥା କଟାକଟି ହେବାରୁ ରାଜେନ୍ଦ୍ର ଏବଂ ତାଙ୍କ ପରିବାର ଲୋକ ବିଦ୍ୟୁତ୍ ବିଭାଗର କର୍ମଚାରୀମାନଙ୍କୁ ବାଡିରେ ପିଟିଥିଲେ । ପରେ ସେମାନଙ୍କୁ ତାଙ୍କ ପୋଷା କୁକୁର ଲଗାଇ ଦେଇଥିଲେ ବୋଲି ଅଭିଯୋଗ ହୋଇଛି ।
ପରେ ସେମାନଙ୍କୁ ବନ୍ଧୁକ ଦେଖାଇ ଧମକାଇଥିବା କଥା ଥାନାରେ ଅଭିଯୋଗ ହୋଇଛି । କନିଷ୍ଠ ଯନ୍ତ୍ରୀ ଜ୍ୟୋତି ଭାସ୍କର ସିହ୍ନାଙ୍କୁ କୁକୁର କାମୁଡି ଦେଇଥିବା ବେଳେ ବାଡି ମାଡରେ ସେ ଆହତ ହୋଇଛନ୍ତି । ତାଙ୍କୁ ରକ୍ଷା କରିବାକୁ ଯାଇ ଅନ୍ୟ କର୍ମଚାରୀମାନେ ସାମାନ୍ୟ ଆହତ ହୋଇଛନ୍ତି । ଥାନାରେ ଏ ନେଇ ମାମଲା ରୁଜୁ ହେବା ପରେ ପୁଲିସ ଅଭିଯୁକ୍ତମାନଙ୍କୁ ଥାନାରେ ଅଟକ ରଖିଛି ।
