ଉତ୍ତରାଖଣ୍ଡ ଟନେଲ ଭୁଶୁଡ଼ିବା ଘଟଣା : ରିଲିଫ୍ ଓ ଉଦ୍ଧାର କାର୍ଯ୍ୟ ଜାରି
ଟନେଲ୍ରେ ଫଶି ରହିଥିବା ଶ୍ରମିକ ସୁରକ୍ଷିତ ଅଛନ୍ତି
ଡେରାଡୁନ : ଉତ୍ତରାଖଣ୍ଡର ଉତ୍ତରକାଶୀ ଜିଲ୍ଲାରେ ନିର୍ମାଣାଧୀନ ସିଲ୍କୟାରା ଟନେଲ୍ ଭୁଶୁଡ଼ି ପଡ଼ିବା ଘଟଣାରେ ଆଜି ଦ୍ୱିତୀୟ ଦିନ ପାଇଁ ରିଲିଫ୍ ଓ ଉଦ୍ଧାର କାର୍ଯ୍ୟ ଜାରି ରହିଛି । ଉତ୍ତରକାଶୀ ଜିଲ୍ଲାପାଳ ଅଭିଷେକ ରୁହେଲା
କହିଛନ୍ତି, ଟନେଲ୍ରୁ ଭାଙ୍ଗିପଡ଼ିଥିବା ଅଂଶକୁ ହଟାଇବା ଲାଗି ଯୁଦ୍ଧକାଳୀନ ଭିତ୍ତିରେ କାର୍ଯ୍ୟ ଜାରି ରହିଛି । ଟନେଲ୍ରେ ଫଶି ରହିଥିବା ଶ୍ରମିକମାନେ ସୁରକ୍ଷିତ ଓ ନିରାପଦ ଅଛନ୍ତି ଏବଂ ସେମାନଙ୍କୁ ପର୍ଯ୍ୟାପ୍ତ ପରିମାଣରେ ଖାଦ୍ୟ ଏବଂ ପାଇପ୍ ଯୋଗେ ଅମ୍ଳଜାନ ଯୋଗାଇ ଦିଆଯାଉଛି ।
ଉତ୍ତରାଖଣ୍ଡ ମୁଖ୍ୟମନ୍ତ୍ରୀ ପୁଷ୍କର ସିଂ ଧାମି ଘଟଣାସ୍ଥଳ ପରିଦର୍ଶନ କରି ରିଲିଫ୍ ଏବଂ ଉଦ୍ଧାର କାର୍ଯ୍ୟ ତଦାରଖ କରିଛନ୍ତି। ମୁଖ୍ୟମନ୍ତ୍ରୀ କହିଛନ୍ତି, ଏହି ଉଦ୍ଧାରକାର୍ଯ୍ୟ ଲାଗି ସମସ୍ତ ସହାୟତା ଯୋଗାଇଦେବା ସକାଶେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ତାଙ୍କୁ ଆଶ୍ୱାସନା ଦେଇଛନ୍ତି । ଟନେଲରେ ଫଶି ରହିଥିବା ଲୋକମାନଙ୍କ ଜୀବନ ବଞ୍ଚାଇବା ନିମନ୍ତେ
ରାଜ୍ୟ ଓ କେନ୍ଦ୍ର ସରକାର ସମସ୍ତ ପ୍ରକାର ପ୍ରଚେଷ୍ଟା ଜାରି ରଖିଛନ୍ତି । ଫଶି ରହିଥିବା ପ୍ରାୟ ୪୦ ଜଣ ଲୋକଙ୍କୁ ଉଦ୍ଧାର କରିବା ପାଇଁ ଜାତୀୟ ବିପର୍ଯ୍ୟୟ ପ୍ରଶମନ ବାହିନୀ, ରାଜ୍ୟ ବିପର୍ଯ୍ୟୟ ପ୍ରଶମନ ବାହିନୀ ସମେତ ଅନେକ ସଂସ୍ଥା ଏବଂ ବିଶେଷଜ୍ଞ ଏହି କାର୍ଯ୍ୟରେ ନିୟୋଜିତ ଅଛନ୍ତି ।
ମିଳିଥିବା ସୂଚନା ଅନୁଯାୟୀ, ଏହି ଟନେଲ୍ ଭିତରେ ରହିଯାଇଥିବା ଶ୍ରମିକମାନେ ମୁଖ୍ୟତଃ ଝାଡ଼ଖଣ୍ଡ, ଉତ୍ତର ପ୍ରଦେଶ, ଓଡ଼ିଶା, ବିହାର ଏବଂ ପଶ୍ଚିମବଙ୍ଗର । ସୂଚନାଯୋଗ୍ୟ, ରବିବାର ଭୂସ୍ଖଳନ ଯୋଗୁଁ ଟନେଲ୍ର ଏକ ଅଂଶ
ଭାଙ୍ଗି ପଡ଼ିବାରୁ ୪୦ ଜଣ ଶ୍ରମିକ ୧୫୦ ମିଟର ତଳେ ଫଶି ରହିଛନ୍ତି । ସବୁଦିନିଆ ଯାତାୟତ ରାସ୍ତା ପାଇଁ ଋଷିକେଶ-ଯମୁନେତ୍ରୀ ଜାତୀୟ ରାଜପଥରେ ଏହି ଟନେଲ୍ ନିର୍ମାଣ ହେଉଛି।
Comments are closed.