ଚୌଦ୍ୱାର : ଚୌଦ୍ୱାର ସହରାଞ୍ଚଳ ପ୍ରାଥମିକ ସ୍ୱାସ୍ଥ୍ୟକେନ୍ଦ୍ର ଉନ୍ନତ ସ୍ୱାସ୍ଥ୍ୟସେବା ପ୍ରଦାନ କ୍ଷେତ୍ରରେ ଉଲ୍ଲେଖନୀୟ କାର୍ଯ୍ୟ ପାଇଁ କେନ୍ଦ୍ର ସରକାରଙ୍କ ଉତ୍କର୍ଷତା ସମ୍ମାନରେ ସମ୍ମାନିତ ହୋଇଛି । ସାଇ ସଂଗଠନ ଦ୍ୱାରା ପରିଚାଳିତ ଏହି ସ୍ୱାସ୍ଥ୍ୟକେନ୍ଦ୍ର କେନ୍ଦ୍ର ସରକାରଙ୍କ ଜାତୀୟ କ୍ୱାଲିଟି ଆସ୍ୟୁରାନ୍ସ ଷ୍ଟାଣ୍ଡାର୍ଡ଼ ( ଏନ୍.କ୍ୟୁ.ଏ.ଏସ୍) ସର୍ଭେରେ ୯୬.୦୫ ପ୍ରତିଶତ ନମ୍ବର ରଖି ଏହି ସମ୍ମାନ ଜନକ ସାର୍ଟିଫିକେଟ ହାସଲ କରିବାରେ ସକ୍ଷମ ହୋଇଛି । ଗତ ଅଗଷ୍ଟ ମାସରେ କେନ୍ଦ୍ର ସ୍ୱାସ୍ଥ୍ୟ ଓ ପରିବାର କଲ୍ୟାଣ ମନ୍ତ୍ରଣାଳୟ ପକ୍ଷରୁ ଡ. ଜଗଦୀଶ ସିଂ ଓ ଡ. ରୁବି ସିହ୍ନା ଏହି କେନ୍ଦ୍ର ପରିଦର୍ଶନରେ ଆସି ଏଠାରେ ଯୋଗାଇ ଦିଆ ଯାଉଥିବା ୧୨ଟି ବିଭିନ୍ନ ସ୍ୱାସ୍ଥ୍ୟସେବାର ମାନ ଯାଞ୍ଚ ଓ ମୂଲ୍ୟାୟନ କରିଥିଲେ । ଉନ୍ନତ ସ୍ୱାସ୍ଥ୍ୟସେବା ଯୋଗାଇ ଏହି ସ୍ୱାସ୍ଥ୍ୟକେନ୍ଦ୍ର ଜାତୀୟସ୍ତରରେ ସମ୍ମାନିତ ହୋଇଥିବାରୁ ପୌରାଧ୍ୟକ୍ଷା ମାନସୀ ସ୍ୱାର୍ଣ୍ଣପ୍ରଭା ସାମଲ,ଉପାଧ୍ୟକ୍ଷ ଶୁଭେନ୍ଦୁ ସାମଲ, ପୌର ନିର୍ବାହୀ ଅଧିକାରୀ ସଂଜୀବ କୁମାର ମହାପାତ୍ର ତଥା ସମସ୍ତ କାଉନସିଲର ସ୍ୱାସ୍ଥ୍ୟକେନ୍ଦ୍ରର ମୁଖ୍ୟ ଚିକିତ୍ସକ ଡା. ରବୀନ୍ଦ୍ର କୁମାର ମହାପାତ୍ର ଓ ସମସ୍ତ ସ୍ୱାସ୍ଥ୍ୟ କର୍ମଚାରୀ ମାନଙ୍କୁ ଶୁଭେଚ୍ଛା ଓ ଧନ୍ୟବାଦ ପ୍ରଦାନ କରିଛନ୍ତି । କଟକ ଜିଲ୍ଲା ମୁଖ୍ୟ ଚିକିତ୍ସାଧିକାରୀ , ସହକାରୀ ଜିଲ୍ଲା ଚିକିତ୍ସା ଅଧିକାରୀ ପ୍ରମୁଖ ମଧ୍ୟ ଚୌଦ୍ୱାର ପ୍ରାଥମିକ ସ୍ୱାସ୍ଥ୍ୟକେନ୍ଦ୍ରର କର୍ମକର୍ତ୍ତାଙ୍କୁ ଶୁଭେଚ୍ଛା ଜଣାଇଛନ୍ତି ।
Comments are closed.