ହରଭଙ୍ଗା :ହରଭଙ୍ଗା ବ୍ଲକ ଅନ୍ତର୍ଗତ ବୁରୁବୁଡ଼ା ସରକାରୀ ଉଚ୍ଚ ପ୍ରାଥମିକ ବିଦ୍ୟାଳୟରେ ଦୁଇ ଜଣ ଶିକ୍ଷକ ନିଯୁକ୍ତି ଦାବୀରେ ମଙ୍ଗଳବାର ସକାଳେ ଅଭିଭାବକ ସ୍କୁଲରେ ତାଲା ପକାଇବା ସହ ଛାତ୍ର, ଛାତ୍ରୀ ଧାରଣାରେ ବସି ଏହାର ପ୍ରତିବାଦ ଜଣାଇଥିଲେ। ଫଳରେ ଆଜି ସ୍କୁଲରେ ପାଠପଢ଼ା ସମ୍ପୂର୍ଣ୍ଣ ବ୍ୟାହତ ହୋଇଥିଲା।
ପ୍ରକାଶ ଯେ ବର୍ତ୍ତମାନ ବୁରୁବୁଡ଼ା ଉଚ୍ଚ ପ୍ରାଥମିକ ସ୍କୁଲରେ ପ୍ରଥମରୁ ଅଷ୍ଟମ ଶ୍ରେଣୀ ପର୍ଯ୍ୟନ୍ତ ୧୭୨ଜଣ ଛାତ୍ର ଛାତ୍ରୀ ପାଠପଢୁଛନ୍ତି। ଏମାନଙ୍କ ଶିକ୍ଷାଦାନ ପାଇଁ ୦୫ଜଣ ଶିକ୍ଷକ ରହିଛନ୍ତି। ମାତ୍ର ସ୍କୁଲରେ ଆଉ ଦୁଇଜଣ ଶିକ୍ଷକ ଆବଶ୍ୟକ ରହିଛି। ଏହାକୁ ନେଇ ଅଭିଭାବକ ମହଲରୁ ବିଭିନ୍ନ ସମୟରେ ଦାବୀପରେ ବି ଶିକ୍ଷା ବିଭାଗ ଆଦୌ କର୍ଣ୍ଣପାତ କରୁନଥିବାରୁ ଏହାର ପ୍ରତିବାଦରେ ଆଜି ଅଭିଭାବକମାନେ ସ୍କୁଲରେ ତାଲା ପକାଇବାକୁ ବାଧ୍ୟ ହୋଇଥିଲେ। ଏହି ଘଟଣା ପରେ ବ୍ଲକ ଗୋଷ୍ଠୀ ଶିକ୍ଷା ଅଧିକାରୀ ଅଜୟ କୁମାର ଲୁହା କମଳପୁର ସ୍କୁଲର ଶିକ୍ଷକ ବିପିନ ସାହୁଙ୍କୁ ଏଠାରେ ନିଯୁକ୍ତି ପାଇଁ ନିର୍ଦେଶ ଦେଇଛନ୍ତି। ତେବେ ଅଭିଭାବକମାନେ ଆଉଜଣେ ଶିକ୍ଷକ ନିଯୁକ୍ତି ଦାବୀ କରିଛନ୍ତି।
