ଚେନ୍ନାଇ : ତାମିଲନାଡୁର ତିରୁପଥୁରରେ ସୋମବାର ଏକ ମର୍ମନ୍ତୁଦ ସଡକ ଦୁର୍ଘଟଣା ଘଟିଛି। ଫୁଟପାତ୍ରେ ବସିଥିବା ପ୍ରାୟ ୭ ଜଣଙ୍କୁ ଏକ ଭ୍ୟାନ ଧକ୍ମା ଦେବା ଫଳରେ ସେମାନଙ୍କ ମୃତ୍ୟୁ ଘଟିଛି। ମିଳିଥିବା ପ୍ରାଥମିକ ସୂଚନାନୁଯାୟୀ, ଏହି ଭ୍ୟାନ୍ଟି ରାସ୍ତା କଡରେ ଠିଆ ହୋଇଥିବା ବେଳେ ସେହି ସମୟରେ ଅନ୍ୟ ଏକ ଗାଡି ଭ୍ୟାନଟିକୁ ପଛପଟୁ ଧକ୍କା ଦେଇଥିଲା। ଫଳରେ ଏହି ଭ୍ୟାନଟି ଫୁଟପାତ୍ରେ ଥିବା ଲୋକଙ୍କୁ ଧକ୍କା ଦେଇଥିଲା। ଫୁଟପାତ୍ରେ ବସିଥିବା ଲୋକେ ହିଁ ଏହି ଭ୍ୟାନରେ ଯାଇଥାଆନ୍ତେ ବୋଲି ପୁଲିସ ଠାରୁ ସୂଚନା ମିଳିଛି। ଭ୍ୟାନଟି ଖରାପ ହେବାରୁ ଏହାକୁ ଠିକ୍ କରିବା ପାଇଁ ରାସ୍ତା କଡରେ ରଖାଯାଇଥିଲା। ଖବର ପାଇ ପୁଲିସ ଘଟଣା ସ୍ଥଳରେ ପହଞ୍ଚି ମୃତଦେହ ଜବତ କରିବା ସହ ଘଟଣାର ତଦନ୍ତ ଆରମ୍ଭ କରିଛି।
