ସମୁଦ୍ରରୁ ଠାବ ହୋଇଥିବା ସନ୍ଦିଗ୍ଧ ଯୁବକ ପୁଲିସ ହେପାଜତରେ

ପାରାଦ୍ୱୀପ : ଦୂର ସମୁଦ୍ର ମଧ୍ୟରୁ ସନ୍ଦିଗ୍ଧ ଅବସ୍ଥାରେ ଏକ ଟ୍ରଲରରେ ଚଢିଯାଇଥିବା ଯୁବକକୁ ମତ୍ସ୍ୟଜୀବୀ ମାନେ ପାରାଦୀପ ମେରାଇନ ପୁଲିସକୁ ହସ୍ତାନ୍ତର କରିଛନ୍ତି । ସନ୍ଦିଗ୍ଧ ଯୁବକଙ୍କୁ ଅଠରବାଙ୍କି ଡାକ୍ତରଖାନା ଅଣାଯାଇ ସ୍ୱାସ୍ଥ୍ୟ ପରୀକ୍ଷା କରାଯାଇଛି ।  ତାଙ୍କ ଘର ଝାଡ଼ଖଣ୍ଡ ବୋଲି ଯୁବକ ଜଣଙ୍କ ପୁଲିସକୁ କହିଛି ।
ଗତକାଲି ବିଳମ୍ବିତ ରାତିରେ ସମୁଦ୍ର ଉପକୁଳରୁ ୭୧ ନଟିକାଲ ମାଇଲ ଦୂରରେ ମାଛ ଧରିବାକୁ ଯାଇଥିବା ଓମ୍ ନମଃ ଶିବାୟ ଟ୍ରଲରଟି ଲଙ୍ଗର ପକାଇଥିବା ବେଳେ ସମ୍ପୃକ୍ତ ଯୁବକ ଜଣଙ୍କ ଟ୍ରଲର ଉପରକୁ ଚଢି ଯାଇଥିଲେ। ଟ୍ରଲରରେ ଥିବା ମତ୍ସ୍ୟଜୀବୀ ମାନେ ଅଜଣା ବ୍ୟକ୍ତିଙ୍କୁ ଦେଖି ଭୟଭୀତ ହୋଇପଡ଼ିଥିଲେ । ସନ୍ଦିଗ୍ଧ ଯୁବକଙ୍କ ସମ୍ପର୍କରେ ପୁଲିସକୁ ଖବର ଦେଇଥିଲେ। ପୁଲିସ ନିର୍ଦ୍ଦେଶରେ ତାଙ୍କୁ ପାରାଦୀପ ଆଣି ମେରାଇନ ପୁଲିସକୁ ହସ୍ତାନ୍ତର କରିଛନ୍ତି । ସମ୍ପୃକ୍ତ ଯୁବକଙ୍କୁ ପ୍ରଥମେ ଅଠରବାଙ୍କୀ ମେଡିକାଲ୍କୁ ନେଇ ସ୍ୱାସ୍ଥ୍ୟ ପରୀକ୍ଷା କରାଇବା ପରେ ମେରାଇନ ଥାନାରେ ଅଟକ ରଖି ପଚରାଉଚରା ଜାରି ରଖିଛି । ଯୁବକ ଜଣଙ୍କର ନାଁ କୁଶ ତିର୍କୀ ଓରାଓଁ ଏବଂ ତାଙ୍କ ଘର ଝାଡ଼ଖଣ୍ଡ ବୋଲି କହିଛି । ସେ ବିଭିନ୍ନ ସମୟରେ ବିଭିନ୍ନ କଥା କହୁଥିବା ଜଣାପଡିଛି । ତେବେ ସେ ଜଣେ ମାନସିକ ବିକାର ଗ୍ରସ୍ତ ରୋଗୀ କିମ୍ବା ଧରାପଡିବା ପରେ ଏଭଳି ଅଭିନୟ କରୁଛି ସେନେଇ ପୁଲିସ ତଦନ୍ତ କରୁଛି । ତେବେ ସେ ଦୂର ସମୁଦ୍ର ମଧ୍ୟକୁ କେମିତି ଗଲେ, ସେ ଏକା କି ତାଙ୍କ ସହ ଆଉ କିଏ ଥିଲେ ତାହା ତଦନ୍ତ ପରେ ସ୍ପଷ୍ଟ ହେବ ବୋଲି ସୂଚନା ମିଳିଛି।