ଲଣ୍ଡନ – ୟୁରୋପର ଉତ୍ତର ମାକାଡୋନିଆରେ କ୍ରିମେନ-କଙ୍ଗୋ ହାମୋରେଜିକ୍ ଜ୍ୱରରେ ୨୭ ବର୍ଷିୟ ମହିଳାଙ୍କର ମୃତ୍ୟୁ ହୋଇଛି । ଟିଙ୍କରୁ ଏହି ଜର ବ୍ୟାପିଥାଏ । ଏଥିରେ ସଂକ୍ରମିତ ୪୦ ପ୍ରତିଶତ ଲୋକଙ୍କର ମୃତ୍ୟୁ ହୋଇଥାଏ । ଏହା ସାଧାରଣତଃ କୁକୁର, ଗାଈ ଏବଂ ବିଲେଇ ତଥା ଅନ୍ୟ ଗୃହପାଳିତ ଜୀବଙ୍କ ଶରୀରରରେ ବେଶୀ ଦେଖାଯାଇଥାଏ । ଏହି ପରଜୀବୀ ଅନ୍ୟ ଜୀବଙ୍କର ରକ୍ତ ପିଇ ବଞ୍ଚିଯାଏ ଏବଂ ତାଙ୍କରି ଶରୀରରେ ଅଣ୍ଡା ଦେଇଥାଏ ।
ମହିଳାଙ୍କ ମୃତ୍ୟୁ ପରେ ତାଙ୍କ ସହ କାମ କରୁଥିବା ୬୭ ଜଣଙ୍କୁ ଏବେ ସଙ୍ଗରୋଧରେ ରଖାଯାଇଛି । ଏହା ମଣିଷ ଠାରୁ ମଣିଷଙ୍କୁ ମଧ୍ୟ ବ୍ୟାପିଥାଏ ।
ମହିଳା ଜଣଙ୍କ ଜୁଲାଇ ୧୯ ତାରିଖରେ ବୁଲିବା ପାଇଁ ଯାଇଥିବା ବେଳେ ତାଙ୍କୁ କାହାଠାରୁ ଟିକ୍ ବା ଟିଙ୍କ ବ୍ୟାପିଥିଲା । ଏହାର ୪ ଦିନ ପରେ ସେ ଅସୁସ୍ଥ ହୋଇଯାଇଥିଲେ । ପରେ ତାଙ୍କୁ ଥଣ୍ଡା ପରି ଲକ୍ଷଣ ଦେଖା ଦେଇଥିଲା । ଆଖି ଲାଲ ସହ ନାକରୁ ସିଙ୍ଘାଣୀ ବାହାରିବା ଏବଂ ଶ୍ୱାସ କ୍ରିୟାରେ ଅସୁବିଧା ହୋଇଥିଲା । ପରେ ଆଖିରୁ ରକ୍ତ ବାହାରିବା ଆରମ୍ଭ ହୋଇଥିଲା । ପ୍ରବଳ ଜର ସହ ଘୋଳା ବିନ୍ଧା ହୋଇଥିଲା ।
ତାଙ୍କ ଶରୀରରେ ବିଭିନ୍ନ ଗୁରୁତ୍ୱପୂର୍ଣ୍ଣ ଅଙ୍ଗରେ ରକ୍ତ ବାହାରିବା ଯୋଗୁଁ ମୃତ୍ୟୁ ହୋଇଛି । ଏବେ ଏହି ସଂକ୍ରମଣ ଆଫ୍ରିକା ସହ ଏସିଆ ଏବଂ ମଧ୍ୟପ୍ରାଚ୍ୟରେ ଦେଖାଯାଉଛି । ପାଣି ପାଗ ପରିବର୍ତ୍ତନ ଯୋଗୁଁ ଏହା ଏବେ ୟୁରୋପରେ ଦେଖା ଯାଇଥିବା କଥା କୁହାଯାଉଛି । ଏଥିରେ ଅନେକ ଲୋକଙ୍କର ମୃତ୍ୟୁ ହୋଇଥିବା ବିଶ୍ୱ ସ୍ୱାସ୍ଥ୍ୟ ସଙ୍ଗଠନ ରିପୋର୍ଟରେ ଦର୍ଶାଯାଇଛି ।
