ଟିଟିଲାଗଡ଼: ଆସନ୍ତା ୬ରେ ରାଜ୍ୟ ୫-ଟି ସଚିବଙ୍କ ଟିଟିଲାଗଡ଼ ଗସ୍ତ ଥିବା ବେଳେ କଂଗ୍ରେସ ଦଳ ଏହାକୁ ତୀବ୍ର ବିରୋଧ କରିବ ବୋଲି ଚେତାବନୀ ଦେଇଛି। ସ୍ଥାନୀୟ ଜଳାରାମ ଲଜ୍ ପରିସରରେ ଦଳର ନଗର ସଭାପତି ଘିନୁ ଆଡ଼ଜୁଆଡ଼ଙ୍କ ଅଧ୍ୟକ୍ଷତାରେ ଅନୁଷ୍ଠିତ ସାମ୍ବାଦିକ ସମ୍ମିଳନୀରେ ପୂର୍ବତନ ମନ୍ତ୍ରୀ ସୁରେନ୍ଦ୍ର ସିଂଭୋଇ ଯୋଗ ଦେଇ ରାଜ୍ୟରେ ଗଣତନ୍ତ୍ରର ହତ୍ୟା ହୋଇ ଚାଲିଥିବା ଅଭିଯୋଗ କରିଛନ୍ତି। ଦେଶର ଜନତା ସାମ୍ବିଧାନିକ ଵିଧି ବ୍ୟବସ୍ଥା ଅନୁଯାୟୀ ଗଣତାନ୍ତ୍ରିକ ଉପାୟରେ ନିର୍ବାଚିତ କରୁଥିବା ପ୍ରତିନିଧିଙ୍କ ଆଉ କୌଣସି କ୍ଷମତା ନାହିଁ। ଏଠାରେ ଅମଲାତନ୍ତ୍ର ଶାସନ ଚାଲିଛି। ରାଜ୍ୟରେ ନିର୍ବାଚିତ ପ୍ରତିନିଧି ବିଧାୟକ, ସାଂସଦ, ମନ୍ତ୍ରୀଙ୍କୁ କ୍ଷମତାଚ୍ୟୁତ କରି ସରକାରୀ ଅଧିକାରୀ ରାଜ୍ କରୁଛନ୍ତି। ଟିଟିଲାଗଡ଼ ବିଧାୟକ କ୍ୟାବିନେଟ ମନ୍ତ୍ରୀ ପଦରେ ଅଧିଷ୍ଠିତ ଥିବା ବେଳେ ଜଣେ ସଚିବ ଏଠାକୁ ଲୋକଙ୍କ ଅଭିଯୋଗ ଶୁଣିବାକୁ ଆସିବେ। ଏହା ଗଣତାନ୍ତ୍ରିକ ବ୍ୟବସ୍ଥା ପ୍ରତି ଘୋର ଅପମାନ ବୋଲି ପୂର୍ବତନ ମନ୍ତ୍ରୀ ଶ୍ରୀ ସିଂଭୋଇ ପ୍ରକାଶ କରିଛନ୍ତି।
ଅନ୍ୟପକ୍ଷରେ ସ୍ଥାନୀୟ ବିଧାୟିକା ତଥା ମନ୍ତ୍ରୀ ଟୁକୁନି ସାହୁ ବିଭିନ୍ନ ସଂଗଠନ ସହ ସଭା କରି କିଏ କଣ ଦାବି କରିବ ତାହା ସୁନିଶ୍ଚିତ କରିଛନ୍ତି। ଏକ୍ଷେତ୍ରରେ ସମସ୍ତ ସଂଗଠନ ଦୀର୍ଘ ୩୧ ବର୍ଷର ଜିଲ୍ଲା ଦାବି ହିଁ ୫-ଟି ସଚିବଙ୍କ ଆଗରେ ରଖନ୍ତୁ ବୋଲି କଂଗ୍ରେସ ନେତା ଆହ୍ୱାନ କରିଛନ୍ତି। ସାମ୍ବାଦିକ ସମ୍ମିଳନୀରେ କଂଗ୍ରେସ ଦଳର ବରିଷ୍ଠ ନେତା ଡମ୍ବରୁ ଛତ୍ରିଆ, ଦେବାନନ୍ଦ ସାହୁ, ବ୍ଲକ ସଭାପତି ବିକାଶ ପାଣିଗ୍ରାହୀ, ତୁଳସୀ ସାହୁ, ଟିଟିଲାଗଡ଼ ବିଧାନସଭା ନିର୍ବାଚନ ମଣ୍ଡଳୀ ଯୁବ ସଭାପତି ଜ୍ଞାନରଞ୍ଜନ ସରାଫ, ଲିଙ୍ଗରାଜ ତାଣ୍ଡି ପ୍ରମୁଖ ଉପସ୍ଥିତ ଥିଲେ।
Comments are closed.