ଆଠଗଡ : ଆଠଗଡ ଉପଖଣ୍ଡ ଅଞ୍ଚଳରେ ଚୋରା ଦେଶୀମଦ, ଗଞ୍ଜେଇ ଓ ଅନ୍ୟାନ୍ୟ ମାଦକ ଦ୍ରବ୍ୟର ଚୋରା ଚାଲାଣକୁ ରୋକିବା ପାଇଁ ଅବକାରୀ ଆୟୁକ୍ତ ନରସିଂହ ଭୋଳ ନିର୍ଦ୍ଦେଶ ଦେଇଛନ୍ତି । ଏହି ପରିପ୍ରେକ୍ଷୀରେ ଶନିବାର ବାଗଧରିଆ ମହାନଦୀ ପୋଲ ଦେଇ ଚୋରା ଗଞ୍ଜେଇ ଚାଲାଣ ହେଉଥିବା ସୂଚନା ପାଇ ଜିଲ୍ଲା ଅବକାରୀ ଅଧିକ୍ଷକ ଦେବାଶିଷ ପଟେଲ ସେଠାରେ ପାଟ୍ରୋଲିଂ କରି ଗଞ୍ଜେଇ ଚାଲାଣକାରୀଙ୍କୁ ଧରିବାକୁ ଆଠଗଡ ଅବକାରୀ ଉପଅଧିକ୍ଷକଙ୍କୁ ନିର୍ଦ୍ଦେଶ ଦେଇଥିଲେ। ଉପଅଧିକ୍ଷକ ପ୍ରମୋଦ କୁମାର ପଣ୍ଡାଙ୍କ ନେତୃତ୍ୱରେ ଏକ ଅବକାରୀ ଦଳ ଶନିବାର ବାଗଧରିଆ ପୋଲର ଅନତି ଦୂରରେ ପାଇକବାରବାଟୀ ଛକଠାରେ ଜଗି ରହିଥିବାବେଳେ ସନ୍ଦେହଜନକ ଭାବେ ଆସୁଥିବା ମହିନ୍ଦ୍ରା ସ୍କର୍ପିଓ ଗାଡିଟି ଅଟକାଇ ଯାଞ୍ଚ କରିଥିଲେ । ଯାଞ୍ଚ ସମୟରେ ସେଥିରେ ପ୍ରାୟ ୧୦୦କେଜି ଗଞ୍ଜେଇ ଏକାଧିକ ପ୍ୟାକେଟରେ ତିଗିରିଆ ଆଡକୁ ଚାଲାଣ ହେଉଥିବା ଦେଖିବାକୁ ପାଇଥିଲେ । ଗଞ୍ଜେଇ ସହିତ ସ୍କର୍ପିଓ ଗାଡି ଜବତ କରାଯିବା ସହ ୨ଜଣ ଚାଲାଣକାରୀଙ୍କୁ ଗିରଫ କରାଯାଇଥିଲା । ଗିରଫ ହୋଇଥିବା ୨ଜଣ ଅଭିଯୁକ୍ତ ହେଲେ ତିଗିରିଆ ଥାନା ନୂଆପାଟଣା ଅଞ୍ଚଳର କୃପାସିନ୍ଧୁ ବେହେରାଙ୍କ ପୁଅ ମୋହନ ବେହେରା (୩୯) ଏବଂ ଗଜପତି ଜିଲ୍ଲାର ଅଡବା ଥାନା ଅନ୍ତର୍ଗତ ଉତ୍ତମପୁର ଗ୍ରାମର ବୃନ୍ଦାବନ ବିରୋଙ୍କ ପୁଅ ସିନୁ ବିରୋ(୨୦) ବୋଲି ଅବକାରୀ ବିଭାଗ ସୁତ୍ରରୁ ଜଣାପଡିଛି । ଉଭୟଙ୍କୁ ରବିବାର କୋର୍ଟ ଚାଲାଣ କରାଯାଇଥିବା ଜଣାପଡିଛି । ଆଠଗଡ ଅବକାରୀ ନିରୀକ୍ଷକ କେଶବ ଚନ୍ଦ୍ର ଦାସ, ଉପନିରୀକ୍ଷକ ସୌମ୍ୟରଞ୍ଜନ ମାଝି, ନରସିଂହପୁର ଅବକାରୀ ଉପନିରୀକ୍ଷକ ଅରୁଣ ଭୋଇଙ୍କ ସମେତ ବହୁ ଅବକାରୀ ଅଧିକାରୀ ଓ କର୍ମଚାରୀ ଏହି ଚଢାଉରେ ଅଂଶଗ୍ରହଣ କରିଥିଲେ।
Popular Categories
Previous article
Next article