ଅନୁଗୁଳ: ମହାବଳ ବାଘ ମହାବୀରର ମୃତଦେହ ପଞ୍ଚନାମା ଓ ବ୍ୟବଚ୍ଛେଦ ପରେ ବନ ବିଭାଗ ପକ୍ଷରୁ ପୋଡି ଦିଆଯାଇଛି । ମହାବୀରର ରହସ୍ୟଜନକ ମୃତ୍ୟୁ କାରଣ ଖୋଜି ବାହାର କରିବା ପାଇଁ ଶୁକ୍ରବାର ଜାତୀୟ ବାଘ ସଂରକ୍ଷଣ କର୍ତ୍ତୃପକ୍ଷ (ଏନଟିସିଏ) ଏବଂ ଡେରାଡୁନସ୍ଥିତ ଜାତୀୟ ବନ୍ୟପ୍ରାଣୀ ପ୍ରତିଷ୍ଠାନ ଡବ୍ଲ୍ୟୁଆଇଆଇ ର ଟିମ ସାତକୋଶିଆରେ ପହଞ୍ଚି ଓଡ଼ିଶା ବନ ବିଭାଗର ବରିଷ୍ଠ ଅଧିକାରୀମାନଙ୍କ ସହିତ ଆଲୋଚନା କରିଛନ୍ତି ।
ସୂଚନାଯୋଗ୍ୟ, ବାଘ ବଂଶ ବୃଦ୍ଧି ପାଇଁ ମଧ୍ୟପ୍ରଦେଶରୁ ଦୁଇଟି ବାଘ ସାତକୋଶିଆ ଅଣାଯାଇଥିଲା। ଗୋଟିଏ ରାଜ୍ୟରୁ ଅନ୍ୟ ରାଜ୍ୟକୁ ବାଘ ସ୍ଥାନାନ୍ତର କରିବା ଥିଲା ଦେଶର ପ୍ରଥମ ଘଟଣା । ସେଥିମଧ୍ୟରୁ ଗୋଟିଏ ହେଉଛି ୩ ବର୍ଷର ଅଣ୍ଡିରା ମହାବୀର ଏବଂ ଅନ୍ୟଟି ୨୭ ମାସର ବାଘୁଣୀ ସୁନ୍ଦରୀ । ମାତ୍ର ୪ ମାସ ପରେ ସାତକୋଶିଆ ଅଭୟାରଣ୍ୟ ମହାବୀରର ମୃତ୍ୟୁ ଘଟିଥିବା ବେଳେ ବାଘୁଣୀ ସୁନ୍ଦରୀ ଅବସ୍ଥା ଏବେ ଅସୁସ୍ଥ ରହିଥିବା ଜଣାପଡିଛି । ସେହିପରି ଗତ କିଛି ଦିନ ତଳେ ଡେବ୍ରିଗଡରେ ଏକ ମହାବଳ ବାଘର ମୃତଦେହ ଠାବ ହୋଇଥିଲା। ଏହି ଘଟଣାଗୁଡିକ ଓଡିଶା ଅଭୟ୍ୟାରଣ୍ୟରେ ଜୀବଜନ୍ତୁ କେତେ ସୁରକ୍ଷିତ ତାହାକୁ ନେଇ ପ୍ରଶ୍ନ ସୃଷ୍ଟି କରିଛି ।
