ବିଶାଖାପାଟଣାମ୍ : ୨୦୦୧ ମସିହା କେବିସିରେ ମାତ୍ର ୧୪ ବର୍ଷ ବୟସରେ ଷ୍ଟାରପ୍ଲସ୍ର ହଟ ସିଟ୍ ‘କୌନ ବନେଗା କରୋଡ଼ପତି’ରେ ଭାଗ ନେଇ ସମସ୍ତ ୧୫ ପ୍ରଶ୍ନର ଉତ୍ତର ସଠିକ୍ ଭାବେ ଦେଇ ସେ ଚହଳ ସୃଷ୍ଟି କରିଥିଲେ। ଏଥିରେ ଏକ କୋଟି ଟଙ୍କା ଜିତି ସମସ୍ତଙ୍କୁ ଚମକାଇ ଦେଇଥିଲେ । କୋଟିପତି ହେବାର ଇଚ୍ଛା ପୂରଣ କରିବାକୁ ସେ ଏଠାକୁ ଆସିଥିଲେ ବୋଲି ସେ ସମୟରେ କହିଥିଲେ। ସେଇ ସମୟରେ ମେଗାଷ୍ଟାର ଅମିତାଭ ବଚ୍ଚନ ଏବଂ ଲୋକପ୍ରିୟ ଅଭିନେତ୍ରୀ ରବୀନା ଟଣ୍ଡନ ତାଙ୍କର ଖୁବ୍ ପ୍ରଶଂସା କରିଥିଲେ। ସମସ୍ତେ ତାଙ୍କୁ କେବିସି ଜୁନିୟର ଭାବେ ଜାଣନ୍ତି। ସେଇ ଚର୍ଚ୍ଚିତ ବ୍ୟକ୍ତି ଜଣକ ହେଲେ ରବି ମୋହନ ସାଇନି। ଜୟପୁର(ରାଜସ୍ଥାନ)ର ମହାତ୍ମାଗାନ୍ଧୀ ମେଡ଼ିକାଲ କଲେଜରୁ ସଫଳତାର ସହିତ ଡାକ୍ତରୀ ଡିଗ୍ରୀ ହାସଲ କରିଛନ୍ତି। ୨୦୧୨ରେ ଡାକ୍ତରୀ ଶିକ୍ଷା ସମାପ୍ତ ପରେ ସେ ୟୁପିଏସ୍ସି ପରୀକ୍ଷା ଦେଇଥିଲେ। ବିଫଳତାର ସ୍ବାଦ ଚାଖିବା ପରେ ସଫଳତା ପାଇଥିଲେ। ମାତ୍ର ୨୨ ବର୍ଷରେ ଭାରତର ସବୁଠାରୁ କଷ୍ଟକର ପରୀକ୍ଷା ଦେଇ ୟୁପିଏସ୍ସି ଦ୍ବାରା ପରିଚାଳିତ ପରୀକ୍ଷାରେ କୃତକାର୍ଯ୍ୟ ହୋଇଥିଲେ। ଏଥିରେ ସେ ୪୬୧ ରାଙ୍କ ରଖିଥିଲେ। ଯେତେବେଳେ ସେ ପୋରବନ୍ଦରର ଆରକ୍ଷୀ ଅଧିକ୍ଷକ (ଏସ୍ପି) ଭାବେ ନିଯୁକ୍ତି ପାଇଥିଲେ, ସେ ସମୟରେ ସମସ୍ତ ଜାତୀୟ ଗଣମାଧ୍ୟମରେ ବେଶ୍ ଚହଳ ସୃଷ୍ଟି କରିଥିଲେ। ଅନେକ ଯୁବପିଢ଼ି ତାଙ୍କୁ ତାଙ୍କର ଆଦର୍ଶ ବୋଲି ମାନନ୍ତି। ସୂଚନା ଅନୁସାରେ, ସେ ୟୁପିଏସ୍ସିର ମୁଖ୍ୟ ପରୀକ୍ଷାରେ ବି ପ୍ରଥମ ଥରରେ ବିଫଳ ହୋଇଥିଲେ। ତଥାପି ହାର ମାନି ନ ଥିଲେ କି ଭାଙ୍ଗି ପଡ଼ି ନ ଥିଲେ। ହେଲେ ବିଫଳତାରୁ ଅନେକ କିଛି ଶିଖିଥିଲେ ଆଉ ପରବର୍ତ୍ତୀ ସମୟରେ ସଫଳ ହୋଇଥିଲେ।
Popular Categories
Previous article
Next article