କାମାକ୍ଷାନଗର: କାମାକ୍ଷାନଗର ଉପଖଣ୍ଡର ପରଜଙ୍ଗ ନିର୍ବାଚନ ମଣ୍ଡଳୀ କଙ୍କଡାହାଡ଼ ବ୍ଲକ କଣ୍ଟାପାଳରେ କର୍ମୀ ସମ୍ମିଳନୀକୁ ଯାଇ ହଟହଟା ହେଲେ ବିଧାୟକ ନୃସିଂହ ଚରଣ ସାହୁ। ସାଥିରେ ଥିଲେ ନୂତନ ପର୍ଯ୍ୟବେକ୍ଷକ ଦାୟିତ୍ୱ ପାଇଥିବା ଆଶିଷ ଚକ୍ରବର୍ତ୍ତୀ। ଚାଷ ଜମିକୁ ଜଳସେଚନ ସମସ୍ୟା ନେଇ ଉଭୟଙ୍କୁ ଘେରିଲେ ପଂଚାୟତର ଚାଷୀ।
ସୂଚନା ମୁତାବକ, ଆଜି ପର୍ଯ୍ୟବେକ୍ଷକ ଆଶିଷ ଚକ୍ରବର୍ତ୍ତୀ ଓ ପରଜଙ୍ଗ ବିଧାୟକ ନୃସିଂହ ଚରଣ ସାହୁ ପରଜଙ୍ଗ ନିର୍ବାଚନ ମଣ୍ଡଳୀର ପ୍ରଥମେ ପରଜଙ୍ଗ ପାଣି ପଂଚାୟତଠାରେ କର୍ମୀ ସମ୍ମିଳନୀ କରିଥିବା ବେଳେ, ଅପରାହ୍ନରେ କଙ୍କଡାହାଡ଼ ବ୍ଲକର କଣ୍ଟାପାଳ କଲ୍ୟାଣ ମଣ୍ଡପଠାରେ କର୍ମୀ ସମ୍ମିଳନୀ ପାଇଁ ଯାଇଥିଲେ। ସେଠାରେ ଉଭୟଙ୍କୁ ପଂଚାୟତର ଚାଷୀମାନେ ତୀବ୍ର ବିରୋଧ କରିଥିବା ଦେଖିବାକୁ ମିଳିଥିଲା। ଚାଷୀଙ୍କ ଜମିକୁ ବର୍ଷା ଦିନରେ କେନାଲରେ ପାଣି ନ ଆସିବାରୁ ଏକର ଏକର ଜମି ପଡ଼ିଆ ପଡ଼ୁଛି। ଚାଷୀମାନଙ୍କ କହିବା ମୁତାବକ, ଅନେକ ଥର କେନାଲରେ ପାଣି ନ ଆସିବାରୁ ଅଭିଯୋଗ କରିଥିଲେ ମଧ୍ୟ କର୍ଣ୍ଣପାତ କରୁନାହାନ୍ତି ବିଧାୟକ ନୃସିଂହ ଚରଣ ସାହୁ ବୋଲି କହିଛନ୍ତି ଚାଷୀମାନେ। ଯଦି ଆଗାମୀ ଦିନରେ ଚାଷୀମାନଙ୍କ ସମସ୍ୟାର ସମାଧାନ ନ ହୁଏ ତାହାଲେ କଣ୍ଟାପାଳ ପଞ୍ଚାୟତରେ ସଂଗଠନ କରାଇଦେବୁ ନାହିଁ ବୋଲି ଚାଷୀମାନେ ଚେତାବନୀ ଦେଇଥିଲେ।
