ନୂଆଦିଲ୍ଲୀ : କଂଗ୍ରେସ ସଭାପତି ମଲ୍ଲିକାର୍ଜୁନ ଖଡ଼ଗେଙ୍କୁ ପଞ୍ଜାବର ସଙ୍ଗରୁର ଅଦାଲତ ସମନ ଜାରି କରିଛନ୍ତି। କଂଗ୍ରେସ ତରଫରୁ କର୍ଣ୍ଣାଟକ ନିର୍ବାଚନ ପାଇଁ ଜାରି ଇସ୍ତାହାରରେ ବଜରଙ୍ଗ ଦଳ ଉପରେ ନିଷେଧାଦେଶ ଜାରି କରାଯିବ ବୋଲି ଦର୍ଶାଯାଇଥିଲା। ଏହାକୁ ବିରୋଧ କରି ପଞ୍ଜାବ ବାସିନ୍ଦା ତଥା ହିନ୍ଦୁ ସୁରକ୍ଷା ପରିଷଦ ପ୍ରତିଷ୍ଠାତା ହିତେଶ ଭରଦ୍ବାଜ ସଙ୍ଗରୁର ଅଦାଲତରେ କଂଗ୍ରେସ ସଭାପତି ମଲ୍ଲିକାର୍ଜୁନଙ୍କ ବିରୋଧରେ ୧୦୦ କୋଟି ଟଙ୍କାର ମାନହାନି ମକଦ୍ଦମା ରୁଜୁ କରିଛନ୍ତି। ନିଜ ଆବେଦନରେ ହିତେଶ ଦର୍ଶାଇଛନ୍ତି କଂଗ୍ରେସ ତରଫରୁ ଜାରି ଇସ୍ତାହାରରେ ବଜରଙ୍ଗ ଦଳକୁ ସିମି, ପିଏଫ୍ଆଇ ଭଳି ଦେଶବିରୋଧୀ ସଂଗଠନ ସହ ତୁଳନା କରାଯାଇଛି। ଏପରି ତୁଳନା ଦ୍ବାରା ବଜରଙ୍ଗ ଦଳର ମର୍ଯ୍ୟାଦା କ୍ଷୁଣ୍ଣ ହୋଇଛି। ତେଣୁ ସେ ଏହି ମାମଲା ରୁଜୁ କରିଛନ୍ତି।
ସୂଚନାଥାଉ କି କର୍ଣ୍ଣାଟକ ନିର୍ବାଚନ ପାଇଁ କଂଗ୍ରେସ ତରଫରୁ ଜାରି ଇସ୍ତାହାରରେ ବଜରଙ୍ଗ ଦଳ ଉପରେ ନିଷେଧାଦେଶ ଜାରି କରାଯିବ ବୋଲି ଦର୍ଶାଯାଇଥିଲା। ଏହାକୁ ନେଇ ବେଶ୍ ରାଜନୀତି ହୋଇଥିଲା। ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ସମେତ ବିଜେପିର ଅନେକ ନେତା ଏହାକୁ ସମାଲୋଚନା କରିଥିଲେ। ଅନ୍ୟପକ୍ଷରେ ପ୍ରଧାନମନ୍ତ୍ରୀ ମୋଦୀ ବଜରଙ୍ଗ ଦଳକୁ ଭଗବାନ ହନୁମାନଙ୍କ ସହ ତୁଳନା କରିଥିବାରୁ ସେ କ୍ଷମା ମାଗିବାକୁ ଦାବି କରିଥିଲା କଂଗ୍ରେସ।
Comments are closed.