ନୂଆଦିଲ୍ଲୀ : ସମଲିଙ୍ଗୀ ବିବାହକୁ ଆଇନଗତ ମାନ୍ୟତା ପ୍ରଦାନ ପାଇଁ ହୋଇଥିବା ଆବେଦନର ଶୁଣାଣି ଶୀର୍ଷ ନ୍ୟାୟାଳୟରେ ଜାରି ରହିଛି। ବୁଧବାର ଶୁଣାଣି ସମୟରେ କେନ୍ଦ୍ର ସରକାରଙ୍କ ତରଫରୁ ମାମଲା ପରିଚାଳନା କରୁଥିବା ସଲିସିଟର୍ ଜେନେରାଲ ତୁଷାର ମେହେଟ୍ଟା ନିଜ ଯୁକ୍ତିରେ ଦର୍ଶାଇଥିଲେ ଏହି ମାମଲାର ଶୁଣାଣି ସମୟରେ ଅନେକ ପ୍ରଶ୍ନ ଉଠୁଛି। ଏ ସବୁ ପ୍ରଶ୍ନର ଉତ୍ତର ପାଇଁ ସଂସଦରେ ଆଲୋଚନା ହେବା ଉଚିତ୍। ସମ୍ବିଧାନ ପୀଠ ସମ୍ମୁଖରେ ଯୁକ୍ତି ଉପସ୍ଥାପନ କରି ତୁଷାର ଆହୁରି କହିଥିଲେ ଶୀର୍ଷ ନ୍ୟାୟାଳୟ ଏକ ଜଟିଳ ମାମଲାର ଶୁଣାଣି କରୁଛନ୍ତି। ସମଲିଙ୍ଗୀ ବିବାହର ସାମାଜିକ ପ୍ରଭାବ କ’ଣ ରହିବ ତାହା ବେଶ୍ ଗୁରୁତ୍ବପୂର୍ଣ୍ଣ। ବିବାହର ସଂଜ୍ଞା ନିରୂପଣ କରିବା ଏହି ମାମଲାର ମୌଳିକ ଆବଶ୍ୟକତା। ତେଣୁ ଏ ସମ୍ପର୍କରେ ନିଷ୍ପତ୍ତି ସଂସଦ ଉପରେ ଛାଡ଼ି ଦେବା ସମ୍ପର୍କରେ ଶୀର୍ଷ ନ୍ୟାୟାଳୟ ଚିନ୍ତା କରିବା ଆବଶ୍ୟକ।
ଅନ୍ୟପକ୍ଷରେ ଆବେଦନକାରୀଙ୍କ ତରଫରୁ ମାମଲା ପରିଚାଳନା କରୁଥିବା ସୌରଭ କ୍ରିପାଲ୍ ନିଜ ଯୁକ୍ତିରେ ଦର୍ଶାଇଥିଲେ ସମଲିଙ୍ଗୀ ବିବାହକୁ ଆଇନଗତ ମାନ୍ୟତା ପ୍ରଦାନ କରାନଗଲେ ଗୋଟିଏ ଗୋଷ୍ଠୀ ପ୍ରତି ଏହା ଭେଦଭାବ ବୋଲି ଧରି ନିଆଯିବ। ଏପରି ହେଲେ ଅନେକ ସମଲିଙ୍ଗୀ ଭାରତ ଛାଡ଼ି ଅନ୍ୟ ଦେଶକୁ ଚାଲିଯିବାର ଆଶଙ୍କା ରହିଛି। ସମଲିଙ୍ଗୀ ବିବାହକୁ ଆଇନଗତ ମାନ୍ୟତା ପ୍ରଦାନ ପାଇଁ ସଂସଦ ବିଫଳ ହୋଇଥିବାରୁ ଏ ସମ୍ପର୍କରେ ଶୀର୍ଷ ନ୍ୟାୟାଳୟ ନିଷ୍ପତ୍ତି ନେବା ଉଚିତ୍ ବୋଲି ସେ ଦର୍ଶାଇଥିଲେ। ଆବେନକାରୀଙ୍କ ତରଫରୁ ମାମଲା ପରିଚାଳନା କରୁଥିବା ଅନ୍ୟ ଜଣେ ଆଇନଜୀବୀ ନିଜ ଯୁକ୍ତିରେ ଦର୍ଶାଇଥିଲେ ଜି୨୦ ଗୋଷ୍ଠୀର ୧୨ଟି ଦେଶ ସମଲିଙ୍ଗୀ ବିବାହକୁ ସ୍ବୀକୃତି ପ୍ରଦାନ କରିଛନ୍ତି। ସେହିପରି ବିଶ୍ବର ୩୪ଟି ଦେଶ ସମଲିଙ୍ଗୀ ବିବାହକୁ ସ୍ବୀକୃତି ପ୍ରଦାନ କରିଥିବାରୁ ଭାରତରେ ମଧ୍ୟ ଏହାକୁ ସ୍ବୀକୃତି ମିଳିବା ଉଚିତ୍।
Comments are closed.