ଡେସ୍କ: ଆଜି ନବୀନ ନିବାସରେ ପଶ୍ଚିମବଙ୍ଗ ମୁଖ୍ୟମନ୍ତ୍ରୀ ସୁଶ୍ରୀ ମମତା ବାନାର୍ଜୀ ଓ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ମଧ୍ୟରେ ହୋଇଥିବା ସାକ୍ଷାତ ଆଲୋଚନାକୁ ନେଇ ଚର୍ଚ୍ଚା ଲାଗି ରହିଛି। ୨୦୨୪ ସାଧାରଣ ନିର୍ବାଚନ ଲାଗି ତୃତୀୟ ମେଣ୍ଟ ଗଠନ ଉଦ୍ଦେଶ୍ୟରେ ମମତା ନବୀନଙ୍କ ସମର୍ଥନ ଲୋଡୁଥିବା ପୂର୍ବରୁ କଳ୍ପନାଜଳ୍ପନା ପ୍ରକାଶ ପାଇଥିଲେ ମଧ୍ୟ ଏହା କେବଳ ଏକ ସୌଜନ୍ୟମୂଳକ ସାକ୍ଷାତ ଥିଲା ବୋଲି ରୋକଠୋକ ଗଣମାଧ୍ୟମକୁ କହିଛନ୍ତି ସୁଶ୍ରୀ ବାନାର୍ଜୀ।
ସେ କହିଛନ୍ତି ଯେ ଆଜି ସାକ୍ଷାତ ଆଲୋଚନା କାଳରେ ଦେଶର ସୁରକ୍ଷା ଓ ଗଣତାନ୍ତ୍ରିକ ଅଧିକାର ସମ୍ପର୍କରେ ମତ ବିନିମୟ ହୋଇଛି। ଆମ ଦେଶବାସୀ କିଭଳି ସୁରକ୍ଷିତ ଓ ନିରାପଦ ରହିବେ ସେ ନେଇ ଆଲୋଚନା ହୋଇଛି। ନିର୍ବାଚନକୁ ଆହୁରି ୧ ବର୍ଷ ଥିବା ବେଳେ ସେ ନେଇ ଏବେ ଠାରୁ କାହିଁକି ଆଲୋଚନା କରିବୁ ବୋଲି ସେ ପାଲଟା ପ୍ରଶ୍ନ କରିଛନ୍ତି। ସେ କହିଥିଲେ ଯେ କିଛି ରାଜନୈତିକ ବିଷୟକୁ ନବୀନ ଜି ସମର୍ଥନ କରନ୍ତି ନାହିଁ ଏବଂ କିଛି ବିଷୟକୁ ସେ ମଧ୍ୟ ସମର୍ଥନ କରନ୍ତି ନାହିଁ।
ତେବେ ମମତାଙ୍କ ଦେଶର ସୁରକ୍ଷା ଓ ଗଣତାନ୍ତ୍ରିକ ଅଧିକାର ସମ୍ପର୍କିତ ମତ କେନ୍ଦ୍ରର ବିଜେପି ସରକାରକୁ ଇସାରା କରୁନାହିଁ ତ? ଏବେ ଅଦାନୀ ଗ୍ରୁପ ମାମଲାକୁ ନେଇ ସଂସଦରେ ଦେଖାଦେଇଥିବା ଅଚଳାବସ୍ଥା ଓ ଅନେକ ସମୟରେ ଲୋକମତ ବିରୋଧୀ କାର୍ଯ୍ୟ ପାଇଁ ପ୍ରକାରାନ୍ତରେ ମମତା ଅଣ୍ଟା ଭିଡୁଛନ୍ତି କି ନାହିଁ ତାହା ସମୟ କହିବ।
