କଲ୍ୟାଣସିଂହପୁର: ରାୟଗଡ଼ା ଜିଲ୍ଲା କଲ୍ୟାଣସିଂହପୁର ବ୍ଲକରେ ମାଙ୍କଡ଼ଙ୍କ ଉପଦ୍ରବ ଯୋଗୁଁ ଲୋକେ ବିରକ୍ତ ଓ ଅତିଷ୍ଠ ହୋଇ ବନବିଭାଗକୁ ଗୁହାରି କରିଥିଲେ । ଏହାକୁ ନେଇ ବନ ବିଭାଗ ପକ୍ଷରୁ ଏକ ଟ୍ରାକ୍ଟର ଡାଲାରେ ଜାଲି ବାନ୍ଧି ଯନ୍ତା ତିଆରି କରି ସେହି ଭିତରେ ଖାଇବା ସାମଗ୍ରୀ ରଖାଯାଇଥିଲା । ଯାହା ଫଳରେ ଆଜି କିଛି ମାଙ୍କଡ଼ ଉକ୍ତ ଜାଲରେ ଫସିଥିବା ଦେଖିବାକୁ ମିଳିଛି । ସେମାନଙ୍କୁ ନେଇ କଳାହାଣ୍ଡି ଜିଲ୍ଲା ବିଜେପୁର ପଞ୍ଚାୟତ ନିକଟସ୍ଥ ଜଙ୍ଗଲରେ ଛାଡ଼ି ଆସିଥିବା ଜଣାପଡିଛି । ଗ୍ରାମରେ ପୂର୍ବରୁ କମ୍ ସଂଖ୍ୟକ ମାଙ୍କଡ଼ ରହିଥିଲେ, ଯାହା ବର୍ତ୍ତମାନ ଚାରି ଗୁଣ ବଢି ଯାଇଛି । ମାଙ୍କଡ଼ ଆକ୍ରମଣରେ ବହୁ ଲୋକ ଶିକାର ହୋଇଛନ୍ତି। ମାଙ୍କଡ଼ମାନେ ଖାଇବାକୁ ନ ପାଇ ଘରମାନଙ୍କରେ ପଶି ରୋଷେଇ ହୋଇଥିବା ଖାଦ୍ୟ ଖାଇ ଫିଙ୍ଗି ଦେଉଛନ୍ତି। ଅନ୍ୟ ଜିନିଷ ଖାଇବା ସହ ଡବା ସହିତ ନେଇ ଚାଲି ଯାଉଛନ୍ତି। ଯାହା ଫଳରେ ଲୋକମାନେ ଘରେ ତାଟି କବାଟ ବନ୍ଦ କରି ରହୁଛନ୍ତି। ଏହାକୁ ନେଇ ବନଖଣ୍ଡ ଅଧିକାରୀଙ୍କୁ ବାରମ୍ବାର ଲିଖିତ ଭାବେ ଜଣାଇଥିଲେ ଲୋକେ। କିନ୍ତୁ ଏ ଦିଗରେ କୌଣସି ପଦକ୍ଷେପ ନିଆଯାଇ ନଥିଲା । ବନବିଭାଗର ଏପରି ପଦକ୍ଷେପକୁ ଅଞ୍ଚଳବାସୀ ପ୍ରଶଂସା କରୁଛନ୍ତି। ଏହା କିଛି ଦିନ ଧରି ଚାଲିବ ବୋଲି ବନ ବିଭାଗ ପକ୍ଷରୁ କୁହାଯାଇଛି ।
Comments are closed.