ଫୁଲବାଣୀ: ଗ୍ରାହକ ମାନେ ସହଜରେ ଓ ସବୁ ସମୟରେ ଯେଭଳି ଭାବେ ଟଙ୍କା ପାଇ ପାରିବେ ସେଥି ପାଇଁ ପ୍ରାୟ ସମସ୍ତ ବ୍ୟାଙ୍କ ପକ୍ଷରୁ ସହରର ବିଭିନ୍ନ ସ୍ଥାନରେ ଖୋଲାଯାଇଛି ଏଟିଏମ୍ । ତେବେ ଖୋଦ୍ ଫୁଲବାଣୀ ସହରରେ ପ୍ରାୟ ୧୫ଟି ଏଟିଏମ୍ ଥିବା ବେଳେ ହାତ ଗଣତି ମାତ୍ର ୨ଟି ଏଟିଏମକୁ ଛାଡ଼ିଦେଲେ ଅନ୍ୟ ଏଟିଏମ୍ ଗୁଡ଼ିକରେ କୌଣସି ସୁରକ୍ଷା କର୍ମୀ ରହୁନାହାନ୍ତି । ଫଳରେ ଏହାକୁ ନେଇ ଅସୁବିଧାରେ ପଡ଼ୁଛନ୍ତି ହଜାର ହଜାର ସଂଖ୍ୟରେ ଗ୍ରାହକ । ସବୁବେଳେ ଏଟିଏମ୍ ଉପରେ ନିର୍ଭର କରୁଥିବା ଗ୍ରାହକ ମାନେ ଅନେକ ସମୟରେ ଟଙ୍କା ଉଠାଣ ପାଇଁ ନାନା ସମସ୍ୟାରେ ପଡ଼ୁଥିବା ବେଳେ ବିଶେଷ କରି ମହିଳା ଗ୍ରାହକ ମାନେ ନାହିଁ ନଥିବା ଅସୁବିଧାର ସମ୍ମୁଖୀନ ହୋଇଥାନ୍ତି ।
ତେବେ ଗୋଟିଏ ପଟେ ବିଭିନ୍ନ ବ୍ୟାଙ୍କ କର୍ତ୍ତୃପକ୍ଷ ଏଟିଏମ୍ ସେବା ଯୋଗାଇ ଦେବା ପାଇଁ ସମସ୍ତ ଏଟିଏମ୍ ଗ୍ରାହକ ମାନଙ୍କ ଠାରୁ ବାର୍ଷିକ ଦେୟ ନେଉଥିଲେ ମଧ୍ୟ ଖୋଦ୍ ଫୁଲବାଣୀ ସହରରେ ଅସୁରକ୍ଷିତ ହୋଇ ପଡ଼ିଛି ଏଟିଏମ୍ । କେତେକ ଏଟିଏମ୍ ସଂପୂର୍ଣ୍ଣ ମୁକୁଳା ହୋଇ ପଡ଼ୁଥିବା ବେଳେ ଆଉ କେତେକ ଏଟିଏମ୍ ମାସ ମାସ ଧରି ତାଲା ପଡ଼ିରହିଛି । ତେବେ ବର୍ତ୍ତମାନ ପାର୍ବଣ ଋତୁ ଥିବା ଯୋଗୁ ବହୁ ସଂଖ୍ୟରେ ବ୍ୟକ୍ତି ମାନେ ଏଟିଏମ୍ ଉପରେ ନିର୍ଭର କରୁଥିବା ବେଳେ ସନ୍ଧ୍ୟା ହୋଇଗଲେ ଏବେ ଏବେ ଅନେକ ଏଟିଏମ୍ ମାନସିକ ବିକାରଗ୍ରସ୍ତଙ୍କ କବଜାରେ ରହୁଥିବା ଦେଖାଯାଉଛି । ଏନେଇ ବିଭିନ୍ନ ବ୍ୟାଙ୍କ କର୍ତ୍ତୃପକ୍ଷଙ୍କ ନିକଟରେ ଖବର ଥିଲେ ମଧ୍ୟ ଗ୍ରାହକ ମାନଙ୍କର କୌଣସି ପ୍ରକାର ବିରୋଧ ନଥିବା ଯୋଗୁଁ ବ୍ୟାଙ୍କ କର୍ତ୍ତୃପକ୍ଷ ନୀରବ ହୋଇରହୁଛନ୍ତି ।
ଅନେକ ସମୟରେ ଏଟିଏମ୍ ଭିତରେ କେତେକ ମଳତ୍ୟାଗ କରୁଥିବା ଯୋଗୁଁ ପ୍ରାୟ ଦିନେ ଦୁଇଦିନ ପର୍ଯ୍ୟନ୍ତ ଉକ୍ତ ଏଟିଏମ୍ ଭିତରକୁ କେହି ମଧ୍ୟ ପ୍ରବେଶ କରିପାରନ୍ତି ନାହିଁ । ବିଶେଷ କରି ମହିଳା ଗ୍ରାହକ ମାନେ ଟଙ୍କା ଉଠାଣ ପାଇଁ ଯିବା ବେଳେ ଭୟଭୀତ ହୋଇ ଫେରିବାକୁ ବାଧ୍ୟ ହେଉଛନ୍ତି । ଅନେକ ସ୍ଥାନରେ କିଛି ବ୍ୟକ୍ତିମାନେ ଟଙ୍କା କାଢିବାକୁ ଦେଉନାହାନ୍ତି । ଏପରିକି ପାଟିତୁଣ୍ଡ କରିବା ସହିତ ନାନା ପ୍ରକାର ଭୟଭୀତ କରାଉଥିବାର ମଧ୍ୟ ନିଜର ରହିଛି । ଏଭଳି ସ୍ଥଳେ ଲୋକଙ୍କୁ ସେବା ଯୋଗାଇ ଦେବା ପାଇଁ ବିଭିନ୍ନ ସମୟରେ ଜିଲା ପ୍ରଶାସନ ଓ ବିଭିନ୍ନ ବ୍ୟାଙ୍କ ଅଧିକାରୀଙ୍କ ମଧ୍ୟରେ ବୈଠକ ବସୁଥିବା ବେଳେ ଏଦିଗରେ କୌଣସି ପ୍ରକାର ଆଲୋଚନା କରାଯାଉନଥିବା ବେଳେ ଜିଲାପାଳ ଓ ଉଚ୍ଚ ବ୍ୟାଙ୍କ କର୍ତ୍ତୃପକ୍ଷ ଏ ଦିଗରେ ଦୃଷ୍ଟିଦେଇ ପଦକ୍ଷେପ ନେବାକୁ ସମଗ୍ର ଜିଲାରେ ଦାବି ହୋଇଛି ।
