ସାଲେପୁର: କେନାଲରେ ପାଣି ନଆସିବାରୁ ଚାଷୀ କୂଳ ହତାଶ। ଏହିଭଳି ଦୃଶ୍ୟ ଦେଖିବାକୁ ମିଳିଛି ସାଲେପୁର ବ୍ଲକ ଛୋଟିନଟରା, କାଳିଦାହି, ସିଢ଼ୋ, କରମୁଆଁ ଏହି ଚାରି ଗୋଟି ଗ୍ରାମମାନଙ୍କରେ। ଧାନ ଚାଷ ଜମି ଫାଟି ଆଁ କରିଛି। ତଳି ସବୁ ଗଜା ମରୁଡି ହୋଇ ସାରିଲାଣି। ରୁଆ ବିଲ ସବୁ ଶୁଖିକି ଧଳା ପଡ଼ିଗଲାଣି। ଚାଷୀମାନଙ୍କ କହିବାନୁସାରେ ୫ ନମ୍ବର କେନାଲର ଉପରେ ମୁଣ୍ଡରେ ତଥା ଛାଣିପୁର ପଞ୍ଚାୟତ କୁଆପୋଲ ତଳେ ଥିବା ସୌପୁନି ଭାଙ୍ଗି ପାଣି ସବୁ ଗୋବରୀ ନଦୀକୁ ପଳାଇ ଯାଉଛି। ଫଳରେ କେନାଲର ତଳମୁଣ୍ଡରେ ଥିବା ଏହି ଗାଁର ଚାଷୀମାନେ ଜଳସେଚନ ସୁବିଧାରୁ ବଞ୍ଚିତ ହେଉଛନ୍ତି। ଏବେ ଏହି ଚାଷୀମାନେ ଚାଷ କରିବା ପାଇଁ କେବଳ ବର୍ଷା ପାଣି ଉପରେ ନିର୍ଭର କରୁଛନ୍ତି। ବାରମ୍ବାର ବିଭାଗୀୟ ଅଧିକାରୀଙ୍କୁ ଏହି ସୌପୁନିର ମରାମତି ବା ପୁନରୁଦ୍ଧାର ବାବଦରେ ଅଭିଯୋଗ କରିବା ସତ୍ତ୍ବେ କୌଣସି ସୁଫଳ ମିଳୁନାହିଁ। ଯଦି ସରକାର ଏହା ଉପରେ ଦୃଷ୍ଟି ଦିଅନ୍ତେ ଚାଷୀକୂଳ ବଞ୍ଚିଯାଆନ୍ତେ ବୋଲି ଏହି ଗ୍ରାମର ଅନେକ ଚାଷୀ ସରକାରଙ୍କୁ ନିବେଦନ କରିଛନ୍ତି।
Comments are closed.