ଆଜିର ସମୟରେ ଅର୍ଥର ମୂଲ୍ୟ କିଏ ବା ନଜାଣେ ଏବଂ ଯଦି ଟଙ୍କା ଅଛି, ତେବେ ପ୍ରତ୍ୟେକ ବ୍ୟକ୍ତି ତାଙ୍କ ଜୀବନରେ ସମସ୍ତ ପ୍ରକାରର ଭୌତିକ ସୁବିଧା ପାଇବା ସହ ଏକ ବିଳାସପୂର୍ଣ୍ଣ ଜୀବନ ବଞ୍ଚିପାରିବ। କିନ୍ତୁ କିଛି ଲୋକ ଖୁବ୍ ଶୀଘ୍ର ଧନୀ ହେବା ଆଶାରେ ବିଭିନ୍ନ ରାସ୍ତା ଆପଣାଇ ଥାଆନ୍ତି। ଆଚାର୍ଯ୍ୟ ଚାଣକ୍ୟ ତାଙ୍କ ନୀତି ମାଧ୍ୟମରେ ଅସତ୍ ଉପାୟ ଅର୍ଜିତ ଧନ ବିଷୟରେ ଏପରି କିଛି କହିଛନ୍ତି, ଯାହା ପ୍ରତ୍ୟେକ ବ୍ୟକ୍ତି ଜାଣିବା ଆବଶ୍ୟକ।
ଆଚାର୍ଯ୍ୟ ଚାଣକ୍ୟ କହିଛନ୍ତି ଯେ, ଯେଉଁମାନେ ଭୁଲ ତଥା ଅସତ୍ ଉପାୟରେ ଅର୍ଥ ଉପାର୍ଜନ କରନ୍ତି, ଏହିପରି ଟଙ୍କା ସେମାନଙ୍କୁ କିଛି ସମୟ ପାଇଁ ଅନୁଭବ କରାଇପାରେ ଯେ ସେମାନେ ଧନୀ। ଏହି ଅର୍ଥ ଦ୍ବାରା ଆପଣ କିଛି ସୁଖ ସୁବିଧା ନିଶ୍ଚୟ ପାଇପାରିବେ, କିନ୍ତୁ ଏପରି ଟଙ୍କା ନିଶ୍ଚିତ ଭାବରେ ଆପଣଙ୍କ ମନରେ ଆତ୍ମଗ୍ଲାନୀ ଅନୁଭବ କରାଇବ।
ଚୋରୀ ଅର୍ଥ : ଆଚାର୍ଯ୍ୟ ଚାଣକ୍ୟଙ୍କ କହିବାନୁସାରେ, ଯଦି ଆପଣ ଟଙ୍କା ଚୋରି କରି ନିଜ ଧନ ବୃଦ୍ଧି କରୁଥାଆନ୍ତି, ତେବେ ଏହା ଅଧିକ ସମୟ ତିଷ୍ଠି ନଥାଏ। ଏହି ଧନ ଆପଣଙ୍କୁ କେବେହେଲେ ସୁଖ ଦେଇପାରିବ ନାହିଁ। ଯଦି ଆପଣ କୌଣସି ପ୍ରକାରେ ଏପରି ଟଙ୍କା ରୋଜଗାର କରନ୍ତି, ତେବେ ଏହା ଆପଣଙ୍କ ସହିତ ଅଧିକ ସମୟ ରହେ ନାହିଁ ଏବଂ ଏହା କୌଣସି କାର୍ଯ୍ୟରେ ବ୍ୟର୍ଥ ହୋଇଯାଏ।
ପ୍ରତାରଣା କରି ଅର୍ଥ ଉପାର୍ଜନ : ଯଦି କାହା ସହ ପ୍ରତାରଣା କରି ଅର୍ଥାତ୍ ଧୋକା ଦେଇ ଆପଣ ତାଙ୍କ ଧନ ପ୍ରାପ୍ତ କରୁଛନ୍ତି, ତେବେ ଏହା ଆପଣଙ୍କ ପାଖରେ ଅଧିକ ଦିନ ରହେନାହିଁ। ଜଣାପଡ଼ିବା ପରେ ଏପରି ଲୋକଙ୍କୁ ସମାଜରେ ସମ୍ମାନ ମିଳେନାହିଁ। ଯଦି ଆପଣ କାହାକୁ ପ୍ରତାରଣା କରି ଟଙ୍କା ରୋଜଗାର କରନ୍ତି, ତେବେ ଏପରି ଟଙ୍କା କଦାପି ସୁଖସମୃଦ୍ଧ ଆଣିବ ନାହିଁ ଏବଂ ଏହା ଆପଣଙ୍କ ହାତରୁ ବର୍ବାଦ ହୋଇଯିବ।
ଆଚାର୍ଯ୍ୟ ଚାଣକ୍ୟ କହିଛନ୍ତି ଯେ, ଯେଉଁମାନେ ଭୁଲ କାମ କରି ଟଙ୍କା ରୋଜଗାର କରନ୍ତି କିମ୍ବା ଗରୀବଙ୍କ ଟଙ୍କା ହାତେଇ ନିଅନ୍ତି, ଏପରି ଲୋକଙ୍କ ଘରେ କେବେହେଲେ ଲକ୍ଷ୍ମୀ ବାସ କରନ୍ତି ନାହିଁ। ଏହିପରି ଲୋକଙ୍କ ଟଙ୍କା ଦୁର୍ଘଟଣା କିମ୍ବା କିଛି ରୋଗରେ ଖର୍ଚ୍ଚ ହୋଇଥାଏ।
