ପିପିଲି: ଏକ ଚୋରି ଘଟଣାରେ ମାମଲା ରୁଜୁ ପାଇଁ ଜଣେ ସିକୁ୍ୟରିଟି ସଂସ୍ଥାର ମାଲିକଙ୍କ ଠାରୁ ୨୦ ହଜାର ଟଙ୍କା ଲାଞ୍ଚ ନେବା ବେଳେ ଶନିବାର ପୂର୍ବାହ୍ନରେ କୌଶଲ୍ୟାଗଙ୍ଗ ଫାଣ୍ଡି ଅଧିକାରୀ ଏସ୍ଆଇ ବେଣୁଧର ରାୟ ଭିଜିଲାନ୍ସ ହାତରେ ଧରା ପଡିଛନ୍ତି ।
ସୂଚନା ଅନୁଯାଇ, ଭୁବନେଶ୍ୱର ପାଣ୍ଡବନଗରରେ ଥିବା ଆର୍ବିଏମ୍ ଗୃପ ଅଫ୍ ସିକୁ୍ୟରିଟି ସଂସ୍ଥା ପକ୍ଷରୁ କୌଶଲ୍ୟାଗଙ୍ଗ ସ୍ଥିତ କୃପାଜଳ ଗୃପ୍ ଅଫ୍ ଇନଷ୍ଟିଚୁ୍ୟସନ୍ସର ବିଭିନ୍ନ ସଂସ୍ଥାରେ ସିକୁ୍ୟରିଟି କର୍ମଚାରୀ ନିୟୋଜିତ ଅଛନ୍ତି । ତେବେ ଗତ ଫେବୃଆରୀ ୧୫ ତାରିଖ ରାତିରେ କୃପାଜଳ ଆଇଟିଆଇ ବିଭାଗ ପରିସରରୁ ୨୫ଟି ଲୁହା ଆଙ୍ଗେଲ ଓ ୨ବଣ୍ଡଳ ଲୁହା କଣ୍ଟାତାର ଆଦି ଚୋରି ହୋଇଥିଲା । ଏସଂପର୍କରେ ଉକ୍ତ ସିକୁ୍ୟରିଟି ସଂସ୍ଥାର ମାଲିକ ତଥା ବାଲିପାଟଣା ଥାନା ବନମାଳିପୁର ଭାପୁର ଅଞ୍ଚଳର ବିଜୟ କୁମାର ଷଡଙ୍ଗୀ କୌଶଲ୍ୟାଗଙ୍ଗ ଫାଣ୍ଡିରେ ସେହିମାସ ୧୬ ତାରିଖରେ ଲିଖିତ ଅଭିଯୋଗ କରିଥିଲେ । ତେବେ ପୁଲିସ ମାମଲା ରୁଜୁ କରିନଥିଲା । ଚୋରଙ୍କୁ ଧରି ଚୋରୀ ସାମଗ୍ରୀ ଉଦ୍ଧାର କରିବା ବଦଳରେ ପୁଲିସ ଅଭିଯୋଗକାରୀଙ୍କୁ ବାରମ୍ବାର ଫାଣ୍ଡିକୁ ଦଉଡାଇଥିଲା । ଏସଂପର୍କରେ ଶ୍ରୀମିଶ୍ର ଉପରିସ୍ଥ ପୁଲିସ ଅଧିକାରୀଙ୍କୁ ଅବଗତ କରିଥିଲେ ମଧ୍ୟ କୌଣସି ସୁଫଳ ମିଳିନଥିଲା । ତେବେ ମାମଲା ରୁଜୁ କରିବା ପାଇଁ ଫାଣ୍ଡି ଅଧିକାରୀ ଏସ୍ଆଇ ବେଣୁଧର ରାୟ ମୋଟାଅଙ୍କର ଅର୍ଥ ଦାବି କରିଥିଲେ । ଏସଂପର୍କରେ ଶ୍ରୀଷଡଙ୍ଗୀ ଭୁବନେଶ୍ୱର ଭିଜିଲାନ୍ସ ବିଭାଗରେ ଅଭିଯୋଗ କରିଥିଲେ । ଶନିବାର ପୂର୍ବାହ୍ନରେ କୌଶଲ୍ୟାଗଙ୍ଗ ଫାଣ୍ଡି ଅଧିକାରୀଙ୍କ କାର୍ଯ୍ୟାଳୟ ମଧ୍ୟରେ ଶ୍ରୀଷଡଙ୍ଗୀଙ୍କ ଠାରୁ ୨୦ ହଜାର ଟଙ୍କା ଲାଞ୍ଚ ନେବା ବେଳେ ଭିଜିଲାନ୍ସ ହାତରେ ଏସ୍ଆଇ ବେଣୁଧର ରାୟ ଧରାପଡିଥିଲେ । ଭିଜିଲାନ୍ସ ପୁଲିସ ସେଠାରୁ କେତେକ ଗୁରୁତ୍ୱପୂର୍ଣ୍ଣ କାଗଜପତ୍ର ଜବତ କରିବା ସହ ଶ୍ରୀରାୟଙ୍କୁ ଗିରଫ କରି ଭୁବନେଶ୍ୱର ନେଇ ଯାଇଥିବା ସୂଚନା ମିଳିଛି । ଏହି ଘଟଣାଟି ସ୍ଥାନୀୟ ଅଞ୍ଚଳରେ ଚର୍ଚ୍ଚାର ପ୍ରସଙ୍ଗ ପାଲଟିଛି ।